Air Pollution: ఆందోళనకరంగా హైదరాబాద్ వాయు కాలుష్య పరిస్థితి.. ఢిల్లీలో డేంజర్ బెల్స్..

దేశ రాజధాని ఢిల్లీతో పాటు భాగ్యనగరం హైదరాబాద్‌లోనూ వాయు కాలుష్యం తీవ్ర రూపం దాలుస్తోంది. దీపావళి పండుగ వేళ కాల్చిన టపాసులు, వాహనాల నుంచి వెలువడే పొగ కారణంగా రెండు ప్రధాన నగరాల్లోనూ గాలి నాణ్యత పూర్తిగా క్షీణించింది. ఢిల్లీలో ఆదివారం నాడు సగటు గాలి నాణ్యత సూచీ 376 వద్ద నమోదై అత్యంత భారీ డేంజర్ అలర్ట్ కు  చేరింది. సోమవారం నాటికి ఇది మరింత పెరిగి అత్యంత తీవ్రమైన స్థాయికి చేరుకునే అవకాశం ఉందని నిపుణులు హెచ్చరిస్తున్నారు. ముఖ్యంగా జహంగీర్‌పురి ప్రాంతంలో ఏకంగా 463 వరకు గాలి నాణ్యత సూచీ నమోదైంది. నగరంలోని మొత్తం కేంద్రాలలో పరిశీలిస్తే.. చాలా చోట్ల గాలి నాణ్యత ప్రమాదకర స్థాయిని దాటింది. వాహనాల నుంచి వస్తున్న కాలుష్యం గణనీయంగా ప్రభావం చూపగా, చుట్టుపక్కల ప్రాంతాల్లో జరుగుతున్న పంట వ్యర్థాల దహనం కూడా కాలుష్యాన్ని పెంచుతోంది.

మరోవైపు హైదరాబాద్‌లోనూ పరిస్థితి ఆందోళనకరంగా ఉంది. దీపావళి వేళ నగరంలో కాలుష్య స్థాయిలు విపరీతంగా పెరిగిపోయాయి. హైదరాబాద్‌లో లైవ్ గాలి నాణ్యత సూచీ ఏకంగా 321కి చేరుకుని అత్యంత ప్రమాదకర స్థాయికి పడిపోయింది. గాలిలో ప్రాణాంతకమైన ధూళి కణాలు ప్రమాదకర స్థాయిలో నమోదయ్యాయి. పండుగ ఆనందంలో చిన్నారులు, వృద్ధులు తీవ్రమైన గాలి కాలుష్యం కారణంగా శ్వాస తీసుకోవడానికి ఇబ్బంది పడుతున్నారు.

నిబంధనల ప్రకారం కాలుష్య స్థాయిలు ఈ విధంగా పెరిగితే ఆరోగ్యంపై తీవ్ర ప్రభావం పడుతుంది. పండగ పూట వెలువడిన భారీ పొగ వల్ల ఇరు నగరాల ప్రజలు తీవ్ర ఇబ్బందులు ఎదుర్కొంటున్నారు. రాబోయే రోజుల్లో చలికాలం పెరిగే కొద్దీ ఈ కాలుష్య కోరల్లో చిక్కుకోకుండా ప్రజలు తగిన జాగ్రత్తలు తీసుకోవాలని అధికారులు, వైద్యులు సూచిస్తున్నారు.