బ్రిటన్ ప్రధాని రేసులో భారతీయుడు?

ఒకప్పుడు భారత దేశాన్ని దోచుకున్న ఆంగ్లేయులకు ఇప్పుడు ఓ భారతీయుడు ప్రధాని కాబోతున్నాడా? అంటే అవుననే సమాధానం వినిపిస్తోంది. బ్రిటన్ ప్రధాని బోరిస్ జాన్సన్‌పై ప్రస్తుతం ఉద్వాసన కత్తి వేలాడుతోంది. దీంతో తదుపరి ప్రధానిగా ఇన్ఫోసిస్ నారాయణమూర్తి అల్లుడు, భారత సంతత వ్యక్తి, బ్రిటన్ ఆర్ధిక మంత్రి రిషి సూనక్ నియమితులవుతారని బ్రిటన్ మీడియా కథనాలు ప్రచురించింది. 2020 మే నెలలో కరోనా తీవ్రంగా ఉన్న సమయంలో ప్రధాని బోరిస్ పెద్ద ఎత్తున మందు పార్టీ చేసుకున్నారన్న ఆరోపణలు ఇప్పుడు ఆయన మెడకు చుట్టుకున్నాయి.

Read Also: ఘోరం: తినడానికి డబ్బులు లేక కిడ్నీలు అమ్ముకొంటున్నారట

ప్రజలను అప్రమత్తం చేయాల్సిన ప్రధానే నిర్లక్ష్యంగా వ్యవహరించడంపై బ్రిటన్‌లోని ప్రతిపక్ష పార్టీలు మండిపడుతున్నాయి. ఈ నేపథ్యంలో ప్రధాని పదవి నుంచి బోరిస్ జాన్సన్ దిగిపోవాలనే డిమాండ్లు ఊపందుకున్నాయి. ఈ విషయంపై ఇప్పటికే బోరిస్ జాన్సన్ క్షమాపణ కూడా చెప్పారు. అయినా ప్రతిపక్షాలు మాత్రం వెనక్కి తగ్గడం లేదు. దీంతో త్వరలోనే ప్రధాని పదవి నుంచి బోరిస్ జాన్సన్ తప్పుకుంటారని జోరుగా ప్రచారం జరుగుతోంది. ఇదే కనుక నిజమైతే.. భారత సంతతి వ్యక్తి రిషి సూనక్ ప్రధాని అయ్యే అవకాశాలు ఉంటాయి. అన్ని సమీకరణాలు రిషి సూనక్‌కు అనుకూలంగా ఉన్నాయని ప్రచారం జరుగుతోంది.

రిషి సూనక్ తర్వాత విదేశాంగ శాఖ మంత్రి లిజ్ ట్రస్, జాన్సన్ కేబినెట్‌లో కీలక వ్యక్తి అయిన మైకేల్ గోవ్, మాజీ విదేశాంగ, ఆరోగ్య శాఖ మంత్రి జెరిమీ హంట్, ప్రస్తుత ఆరోగ్య శాఖ మంత్రి సాజిద్ జావిద్, ఉప ప్రధాని డొమినిక్ రాబ్ ప్రధాని పదవి రేసులో ఉన్నారు. వీళ్లందరిలో రిషీ సూనక్‌కే ఎక్కువ మంది మొగ్గు చూపుతున్నట్టు మీడియా సంస్థలు ప్రసారం చేస్తున్నాయి.