Reliance: “కాంపిటీషన్‌కు మేము భయపడం.. రండి చూసుకుందాం..”.. మస్క్‌కు జియో స్ట్రాంగ్ కౌంటర్..

Reliance on Starlink in India: అమెరికా కుబేరుడు ఎలోన్ మస్క్‌కు చెందిన శాటిలైట్ ఇంటర్నెట్ సంస్థ ‘స్టార్‌లింక్’ భారత్‌లోకి ప్రవేశించడంపై గత కొన్ని రోజులుగా పెద్ద ఎత్తున చర్చ నడుస్తోంది. ఈ క్రమంలో భారత టెలికాం మార్కెట్‌లో శాటిలైట్ ఇంటర్నెట్ సేవల్లో పోటీని ఆహ్వానిస్తున్నామని రిలయన్స్ ఇండస్ట్రీస్ స్పష్టం చేసింది. ఇందులో స్టార్‌లింక్ కూడా భాగమేనని పేర్కొంది. అయితే, ఈ రంగంలోకి వచ్చే ప్రతి సంస్థ దేశీయ చట్టాలు, ప్రస్తుత నిబంధనలకు కట్టుబడి పనిచేయాల్సిందేనని తేల్చిచెప్పింది. భారత్‌లో స్టార్‌లింక్ సేవల ప్రారంభానికి ఇక్కడి కొందరు వ్యాపారవేత్తలు, కార్పొరేట్ శక్తులు అడ్డుపడుతున్నాయంటూ మస్క్ ఇటీవల తీవ్ర వ్యాఖ్యలు చేశారు. అలాగే ముకేశ్ అంబానీని ఉద్దేశిస్తూ భారత టెలికాం రంగంలో పోటీ తత్వంపై ప్రశ్నలు గుప్పించారు. మస్క్ ఆరోపణల నేపథ్యంలో రిలయన్స్ స్పందిస్తూ సోషల్ మీడియా వేదికగా ఓ ప్రకటన విడుదల చేసింది. “మేము ఎప్పుడూ పోటీకి భయపడలేదు. వినియోగదారులకు ఎవరు అత్యుత్తమ సేవలను అందిస్తున్నారో నిరూపించుకోవడానికి పోటీనే అతిపెద్ద పరీక్షగా మేము భావిస్తాం” అని తెలిపింది.

తన టెలికాం విభాగమైన ‘జియో ప్లాట్‌ఫార్మ్స్’ ప్రయాణాన్ని రిలయన్స్ ఈ సందర్భంగా గుర్తుచేసింది. 2016లో జియో సేవలు ప్రారంభించినప్పుడు తమకు ఒక్క కస్టమర్ కూడా లేరని, కానీ కేవలం పదేళ్ల కాలంలో జియో వినియోగదారుల సంఖ్య 53 కోట్లకు పైగా పెరిగిందని వెల్లడించింది. భారతీయ పౌరులకు మెరుగైన డిజిటల్ సేవలతో పాటు ప్రపంచంలోనే అత్యంత చవకైన మొబైల్ డేటాను అందుబాటులోకి తీసుకురావడంలో జియో కీలక పాత్ర పోషించిందని కంపెనీ పేర్కొంది. స్టార్‌లింక్‌తో పాటు శాటిలైట్ కమ్యూనికేషన్ రంగంలోకి వచ్చే అన్ని కంపెనీలను తాము ఆహ్వానిస్తున్నామని చెప్పిన రిలయన్స్.. జియోతో సహా ప్రతి ఒక్కరూ భారతీయుల ప్రయోజనాల కోసం, దేశ చట్టాలు, విధానాలకు లోబడి పనిచేయాల్సిందేనని స్పష్టం చేసింది. భారత్‌లో స్వదేశీ, విదేశీ పెట్టుబడులకు, కొత్త ప్రయోగాలకు ఎప్పుడూ స్వాగతం ఉంటుందని, అయితే ఇదంతా చట్ట పరిధిలోనే జరగాలని వివరించింది.

మరోవైపు, శాటిలైట్ కమ్యూనికేషన్ సేవల కోసం దరఖాస్తు చేసుకునే ప్రతి కంపెనీకి ఒకే రకమైన నిబంధనలు, ప్రక్రియలు వర్తిస్తాయని భారత ప్రభుత్వం ఇదివరకే స్పష్టం చేసింది. తమ సొంత శాటిలైట్ నెట్‌వర్క్ సేవలకు సంబంధించి జియో కూడా ప్రస్తుతం ప్రభుత్వ అనుమతుల కోసమే వేచి చూస్తోందని రిలయన్స్ ఈ సందర్భంగా వెల్లడించింది. భారత్‌లో స్టార్‌లింక్ సేవలు ప్రారంభించడానికి సన్నాహాలు చేసుకుంటున్న వేళ రిలయన్స్ చేసిన ఈ ప్రకటన టెలికాం వర్గాల్లో ప్రాధాన్యం సంతరించుకుంది. కాగా శాటిలైట్ కమ్యూనికేషన్ రంగంలో ఏ ఒక్కరి గుత్తాధిపత్యానికి తావులేదని ప్రభుత్వం ఇప్పటికే తేల్చిచెప్పిన సంగతి తెలిసిందే.