ISRO: ఇస్రోకి ఈ ప్రయోగం కీలకం.. ప్రతిష్టాత్మక ప్రయోగాలన్నీ ఈ రాకెట్‌ ద్వారే..

మరో ప్రయోగానికి సిద్ధం అవుతోంది భారత అంతరిక్ష పరిశోధన సంస్థ (ఇస్రో).. నెల్లూరు జిల్లా శ్రీహరికోటలోని సతీష్‌ ధావన్ స్పేస్ సెంటర్ నుంచి జీఎస్ఎల్వీ మార్క్ 3 రాకెట్‌ ప్రయోగానికి కౌంట్‌డౌన్‌ మొదలైంది… ఇవాళ అంటే 23.10.2022న (ఆదివారం) అర్ధరాత్రి జీఎస్ఎల్వీ మార్క్ 3 రాకెట్‌ నింగిలోకి దూసుకెళ్లనుంది.. ఈ ప్రయోగం ద్వారా 5,200 కిలోల బరువు కలిగిన యూకేకు చెందిన 36 నానో ఉపగ్రహాలను నింగిలోకి తీసుకెళ్లి కక్ష్యలోకి ప్రవేశపెట్టనున్నారు.. ఈ నేపథ్యంలో చెంగాళమ్మ పరమేశ్వరి అమ్మవారి దేవస్థానానికి వెళ్లిన ఇస్రో చైర్మన్ డాక్టర్ సోమనాథ్.. అమ్మవారిని దర్శించుకుని ప్రత్యేక పూజలు నిర్వహించారు.. ఆ తర్వాత మీడియాతో మాట్లాడుతూ.. ఇవాళ అర్థరాత్రి జరిగే జీఎస్‌ఎల్‌వీ మార్క్ 3 రాకెట్ ప్రయోగం ఇస్రోకి చాలా కీలకం అన్నారు..

Read Also: GSLV Mk3: జీఎస్ఎల్వీ మార్క్3 ప్రయోగానికి కౌంట్ డౌన్ స్టార్ట్‌

ఇది పూర్తిస్థాయి వాణిజ్య ప్రయోగం.. ఇస్రోలో అతిపెద్ద రాకెట్ ద్వారా ఇతర దేశాల ఉపగ్రహాలను మొదటిసారి పంపుతున్నామని వెల్లడించారు డాక్టర్ సోమనాథ్.. ఇక, త్వరలో చంద్రయాన్, గగన్ యాన్ , మానవ రహిత మానవ సహిత లాంటి ప్రయోగాలన్నీ మార్క్-3 రాకెట్ ద్వారానే చేస్తామని పేర్కొన్నారు. గత నెలలో విఫలమైన ఎస్‌ఎస్ఎల్వీ రాకెట్ స్థానంలో మళ్లీ డిసెంబర్ నెలలో ఈ తరహా ప్రయోగం చేస్తాం అన్నారు డాక్టర్ సోమనాథ్.. నవంబర్ నెలలో పీఎస్‌ఎల్వీ-54 రాకెట్ ప్రయోగం ఉంటుంది. ఈ రాకెట్ ద్వారా OCEAN SAT-3 ఉపగ్రహాన్ని నింగిలోకి పంపుతామన్నారు.. రేపు జరిగే రాకెట్‌కు సంబంధించి రెండో దశలో ద్రవ ఇంధనం నింపుతున్నారు.. కౌంట్ డౌన్ ప్రక్రియ సవ్యంగానే జరుగుతోందని వెల్లడించారు..