అసలే పెట్రోల్, డీజిల్ ధరలతో సతమతం అవుతున్న వాహనదారులకు తెలంగాణ ప్రభుత్వం షాకిచ్చింది. వాహనాల లైఫ్ ట్యాక్స్‌ను పెంచుతూ ప్రభుత్వం ఉత్తర్వులు జారీ చేసింది. దీంతో కొత్తగా కొనుగోలు చేసే బైక్‌లు, స్కూటర్లపై లైఫ్ ట్యాక్స్ పెరగనుంది. ప్రస్తుతం వాహనం ధర రూ.50 వేల లోపు ఉంటే 9 శాతం, రూ.50 వేలకు మించితే 12శాతంగా లైఫ్ ట్యాక్స్ చెల్లించాల్సి ఉంటుంది. తెలంగాణ ఏర్పడ్డాక తొలిసారి మోటర్‌ వాహనాల ట్యాక్సేషన్‌ చట్టం-1963లో 3, 6, 7వ షెడ్యూల్‌లోని వాహనాల లైఫ్ ట్యాక్స్‌ల్లో కొద్దిమేర మార్పులు చేశారు. కొత్త లైఫ్ ట్యాక్స్‌లు సోమవారం నుంచి అమల్లోకి వచ్చినట్లు ప్రభుత్వ ప్రత్యేక ప్రధాన కార్యదర్శి సునీల్‌ శర్మ తెలిపారు.
నూతన నాన్‌ ట్రాన్స్‌పోర్టు వాహనాల విషయంలో వాహనం ధర రూ.5 లక్షల లోపు ఉంటే 13 శాతం, రూ.5 లక్షల- రూ.10 లక్షల లోపు ఉంటే 14 శాతం, రూ.10 లక్షల – రూ.20 లక్షల లోపు ఉంటే 17 శాతం, రూ.20 లక్షలకు పైగా వాహనం ధర ఉంటే 18 శాతంగా లైఫ్ ట్యాక్స్‌ను అధికారులు నిర్ణయించారు.
అదే వాహనం కొనుగోలు చేసిన రెండేళ్ల లోపు అయితే.. వాహనం ధర రూ.5 లక్షల లోపు ఉంటే 12 శాతం, రూ.5 లక్షల నుంచి రూ.10 లక్షల లోపు ఉంటే 13 శాతం, రూ.10 లక్షల నుంచి రూ.20 లక్షల లోపు ఉంటే 16 శాతం, రూ.20 లక్షలకు పైగా ధర ఉంటే 17 శాతం లైఫ్ ట్యాక్స్ చెల్లించాలి. వాహనం కొని ఒక్కో ఏడాది పెరిగే కొద్దీ వాహన ధరపై లైఫ్ ట్యాక్స్ ఒక్కో శాతం తగ్గుతుంది.
ఒకవేళ వాహనం కొనుగోలు చేసి 12 ఏళ్లు దాటితే.. రూ.5 లక్షల లోపు వాహనం ధర ఉంటే 6.5 శాతం, రూ.5 లక్షల నుంచి రూ.10 లక్షల లోపు ఉంటే 7.5 శాతం, రూ.10 లక్షల నుంచి రూ.20 లక్షల లోపు ఉంటే 10.5 శాతం, రూ.20 లక్షలకు పైగా ధర ఉంటే 11.5 శాతం లైఫ్ ట్యాక్స్ చెల్లించాలి.
