TSRTC: టీఎస్ఆర్టీసీ గుడ్‌న్యూస్‌.. అందుబాటులోకి ‘టీ-9 టికెట్‌’

TSRTC: గ్రామీణ, పట్టణ ప్రయాణికులపై ఆర్థిక భారాన్ని తగ్గించేందుకు టీఎస్‌ఆర్టీసీ కీలక నిర్ణయం తీసుకుంది. పల్లె వెలుగు బస్సులో ప్రయాణించే మహిళలు, వృద్ధుల కోసం ‘టి-9 టిక్కెట్‌’ అందుబాటులోకి వచ్చింది. ఇప్పటికే గ్రేటర్ హైదరాబాద్ పరిధిలో టీ-24, టీ-6, ఎఫ్-24 టిక్కెట్లను అందిస్తున్న సంస్థ.. తొలిసారిగా గ్రామీణ, పట్టణ ప్రయాణికుల సౌకర్యార్థం టీ-9 టికెట్ ను అందుబాటులోకి తీసుకురావాలని నిర్ణయించింది. శుక్రవారం హైదరాబాద్‌లోని బస్‌భవన్‌లో టీఎస్‌ఆర్‌టీసీ ఎండీ వీసీ సజ్జనార్‌ ‘టీ-9 టిక్కెట్‌’ పోస్టర్‌ను ఆవిష్కరించారు.

ఈ నెల 18(ఆదివారం) నుంచి పల్లె వెలుగు బస్సుల్లోని కండక్టర్ల నుంచి ఈ టికెట్ అందుబాటులో ఉంటుందని తెలిపారు. పల్లె వెలుగు బస్సుల్లో ప్రయాణించే మహిళలు మరియు సీనియర్ సిటిజన్లకు ‘T-9 టికెట్’ వర్తిస్తుంది. ఈ టిక్కెట్టు ఉదయం 9 గంటల నుండి సాయంత్రం 6 గంటల వరకు మాత్రమే చెల్లుబాటు అవుతుంది. ఈ టిక్కెట్‌తో రానుపోను ఒకసారి 60 కిలోమీటర్ల లోపు ప్రయాణించవచ్చు. టీఎస్‌ఆర్‌టీసీ యాజమాన్యం ‘టీ-9 టిక్కెట్‌’ ధరను రూ.100గా నిర్ణయించింది. టోల్ గేట్ ఛార్జీలపై మినహాయింపు. ఈ టికెట్ ద్వారా ఒక్కొక్కరికి రూ.20 నుంచి రూ.40 వరకు ఆదా అవుతుందని కంపెనీ ప్రకటించింది. 60 ఏళ్లు పైబడిన సీనియర్ సిటిజన్లు వయస్సు ధృవీకరణ కోసం తమ ఆధార్ కార్డును కండక్టర్‌లకు చూపించడం ద్వారా T-9 టిక్కెట్‌ను పొందవచ్చు.

Read also: Kodali Nani: నవనీత్ కౌర్, సుమలత ఎంపీలు అయ్యారు.. పవన్‌ కల్యాణ్‌ ఇంకా..!

కండక్టర్లు ఈ టిక్కెట్లను ఉదయం 9 గంటల నుంచి సాయంత్రం 4 గంటల వరకు మాత్రమే జారీ చేస్తారు. ఈ టికెట్ తెలంగాణ రాష్ట్రంలో చెల్లుతుంది. పల్లె వెలుగు బస్సుల్లో రోజుకు సగటున 15 లక్షల మంది ప్రయాణిస్తున్నారు. వీరిలో ఎక్కువ మంది మహిళలు, సీనియర్ సిటిజన్లు ఉన్నారు. వారిపై ఆర్థిక భారం తగ్గాలనే ఉద్దేశంతో పల్లెవెలుగు బస్సుల్లో టీఎస్‌ఆర్టీసీ యాజమాన్యం ‘టీ-9 టిక్కెట్‌’ను ప్రారంభించింది. ఈ టిక్కెట్టుతో రూ.100 చెల్లించి 60 కిలోమీటర్ల పరిధిలో రానుపోను ప్రయాణించవచ్చు. గ్రామీణ, పట్టణ ప్రయాణికులు ఈ సౌకర్యాన్ని వినియోగించుకుని సంస్థను ఆదరించాలని టీఎస్‌ఆర్‌టీసీ ఎండీ వీసీ సజ్జనర్‌ కోరారు. గ్రేటర్ హైదరాబాద్ పరిధిలో ఇప్పటికే టీ-24, టీ-6, ఎఫ్-24 టికెట్లను అందుబాటులోకి తెచ్చామని, వాటికి ప్రయాణికుల నుంచి అనూహ్య స్పందన లభిస్తోందని గుర్తు చేశారు. టిక్కెట్‌లకు మంచి స్పందన లభిస్తున్నందున గ్రామీణ, పట్టణ ప్రయాణికుల కోసం తొలిసారిగా ‘టి-9 టిక్కెట్‌’ను ప్రవేశపెట్టినట్లు తెలిపారు. ఈ టికెట్‌కు సంబంధించిన పూర్తి వివరాల కోసం TSRTC కాల్ సెంటర్ నంబర్‌లు 040-69440000, 040-23450033లను సంప్రదించాలని సూచించారు.
Missing Case: మిస్టరీగా హర్షవర్థన్ మిసింగ్ కేస్.. 17 గంటలు దాటిన దొరకని ఆచూకి