ORR Arbitration : సుప్రీంకోర్టులో HMDAకి షాక్.. ORR కేసులో కీలక మలుపు

హైదరాబాద్ మహానగరాభివృద్ధి సంస్థ (హెచ్‌ఎండీఏ)కు సుప్రీంకోర్టులో తీవ్ర ఎదురుదెబ్బ తగిలింది. ఔటర్ రింగ్ రోడ్ (ORR) ఆర్బిట్రేషన్ వ్యవహారంలో తెలంగాణ హైకోర్టు ఇచ్చిన తీర్పును సవాల్ చేస్తూ హెచ్‌ఎండీఏ దాఖలు చేసిన స్పెషల్ లీవ్ పిటిషన్ (SLP)ను అత్యున్నత న్యాయస్థానం శుక్రవారం డిస్మిస్ చేసింది. విచారణ జరిపిన జస్టిస్ నరసింహ, జస్టిస్ అలోక్ ఆరాధేలతో కూడిన ధర్మాసనం హైకోర్టు ఉత్తర్వుల్లో జోక్యం చేసుకునేందుకు స్పష్టంగా నిరాకరించింది.

న్యాయమూర్తి తప్పుకోవాలన్న విజ్ఞప్తి తిరస్కరణ

విచారణ సందర్భంగా న్యాయమూర్తి విచారణ నుంచి తప్పుకోవాలంటూ హెచ్‌ఎండీఏ చేసిన విజ్ఞప్తిని ధర్మాసనం తోసిపుచ్చింది. గతంలో న్యాయమూర్తి కేంద్ర ప్రభుత్వం తరఫున వాదించినంత మాత్రాన, కేసులో పక్షపాతం ఆపాదించడం సరికాదని సుప్రీంకోర్టు వ్యాఖ్యానించింది. ఈ కేసులో ప్రతివాదిగా ఉన్న కేంద్ర ప్రభుత్వంపై ఎలాంటి అభియోగాలు లేదా ఆరోపణలు లేనప్పుడు, ఇక పక్షపాతానికి తావెక్కడ ఉంటుందని హెచ్‌ఎండీఏను ధర్మాసనం ప్రశ్నించింది.

ఆర్బిట్రేషన్ ప్రక్రియకు మరో 4 వారాల గడువు

తెలంగాణ హైకోర్టు ఇచ్చిన తీర్పును సమర్థిస్తూ హెచ్‌ఎండీఏ పిటిషన్‌ను కొట్టివేసిన అత్యున్నత న్యాయస్థానం.. కేసు ముందుకు సాగేందుకు కీలక ఆదేశాలు జారీ చేసింది. ఆర్బిట్రేటర్ నియామకంతో పాటు వారికి చెల్లించాల్సిన ఫీజుల చెల్లింపు ప్రక్రియను పూర్తి చేసేందుకుగాను హెచ్‌ఎండీఏకి మరో నాలుగు వారాల సమయాన్ని కేటాయిస్తూ విచారణను ముగించింది. సుప్రీంకోర్టు ఇచ్చిన ఈ తీర్పుతో ఓఆర్‌ఆర్ ఆర్బిట్రేషన్ వ్యవహారంలో హెచ్‌ఎండీఏకి చట్టపరమైన ఊరట లభించకపోగా, ఆర్బిట్రేషన్ ప్రక్రియను వేగవంతం చేయక తప్పనిసరి పరిస్థితి ఏర్పడింది.