Harish Rao : సీఎం రేవంత్‌కు బీఆర్ఎస్ భయం పట్టుకుంది.. దమ్ముంటే అసెంబ్లీ రద్దు చెయ్

Harish Rao : “ముఖ్యమంత్రి రేవంత్ రెడ్డి ఎక్కడికి పోయినా నన్ను తిట్టనిదే ఆయనకు తెల్లారదు. నిద్రలో కూడా ఆయన బీఆర్ఎస్ (BRS) పార్టీనే కలవరిస్తున్నారంటేనే ఆయనకు ఎంత భయం పట్టుకుందో అర్థమవుతోంది” అని మాజీ మంత్రి, బీఆర్ఎస్ సీనియర్ నేత తన్నీరు హరీష్ రావు ఎద్దేవా చేశారు. శారీరక ఎత్తుపై ముఖ్యమంత్రి చేసిన వ్యాఖ్యలకు కౌంటర్ ఇస్తూ రేవంత్ రెడ్డి సంకుచిత మనస్తత్వాన్ని ఆయన తీవ్రంగా తప్పుపట్టారు.

నీ ఆలోచనలే పొట్టి.. మా పనితీరులో మేం పొడుగు

“ఏమన్నా అంటే అరడుగులు ఉన్నావ్ అంటూ నా ఎత్తు గురించి, జగదీష్ రెడ్డి పొట్టిగా ఉన్నారంటూ సీఎం మాట్లాడుతున్నారు. మాకు ఆయనలాగా సంకుచిత మనసు, కుంచిత మనస్తత్వం లేవు. మా పనితీరులో మేం ఎప్పుడూ పొడుగే. కానీ సీఎం రేవంత్ రెడ్డి నీ మనసు పొట్టి, నీ ఆలోచనలు పొట్టి, నిజానికి నువ్వే పొట్టిగా ఉన్నావు” అని హరీష్ రావు ఘాటుగా విమర్శించారు. అధికార మదం, అహంకారంతో మాట్లాడుతున్న సీఎం రేవంత్ రెడ్డికి ప్రజలు త్వరలోనే ఉప్పు పాతర వేయడం ఖాయమని హెచ్చరించారు. ప్రతిపక్షాలను తిట్టడం పక్కనబెట్టి, ముందు ప్రజలకు ఇచ్చిన హామీలను నెరవేర్చడంపై సీఎం దృష్టి పెట్టాలని హితవు పలికారు.

తెలంగాణను ఆగం చేయకు.. నువ్వు ముంపు మేస్త్రివి కావొద్దు

ఇటీవల ముగ్గురు ముఖ్యమంత్రులు కలిసి కర్ణాటకలో పెట్టిన మీటింగ్ వెనుక ఉన్న మతలబు ఏంటో చెప్పాలని హరీష్ రావు డిమాండ్ చేశారు. “కృష్ణా, గోదావరి జలాల్లో తెలంగాణకు ఉన్న హక్కులను నువ్వు కాపాడావా? నీకు అన్ని విషయాలు సగం సగమే తెలుసు. అధికారం మొత్తాన్ని కేంద్ర మంత్రి చేతిలో పెట్టేసి తెలంగాణను ఆగం చేయవద్దని నేను ముందే చెప్పాను. నువ్వు గుంపు మేస్త్రివో కాదో నాకు తెలియదు కానీ.. ఈ రాష్ట్రాన్ని ముంచేసే ‘ముంపు మేస్త్రి’ మాత్రం కావొద్దు” అంటూ ఘాటు వ్యాఖ్యలు చేశారు.

దమ్ముంటే అసెంబ్లీ రద్దు చేయి.. ప్రజల్లో తేల్చుకుందాం!

రాబోయే 2028 నుండి 2034 వరకు తామే అధికారంలో ఉంటామని సీఎం రేవంత్ రెడ్డి పదే పదే చెప్పుకోవడాన్ని హరీష్ రావు తప్పుపట్టారు. “నీకు అంత దమ్ము, ధైర్యం ఉంటే వెంటనే అసెంబ్లీని రద్దు చేసి ప్రజల్లోకి పోదాం రా.. ఎవరు అధికారంలోకి వస్తారో ప్రజలే తేలుస్తారు” అని సవాల్ విసిరారు. అలాగే బీఆర్ఎస్ నుంచి కాంగ్రెస్‌లోకి మారిన ఎమ్మెల్యేలతో తక్షణమే రాజీనామాలు చేయించాలని, అప్పుడు మీ బలమేంటో, మా బలమేంటో ఉప ఎన్నికల బరిలో చూసుకుందామని హరీష్ రావు స్పష్టం చేశారు.