Fire Accident : అంబర్‌పేటలో భారీ అగ్నిప్రమాదం.. తగలబడిన షోరూం గోదాం..

Fire Accident : హైదరాబాద్ లోని అంబర్‌పేట నెంబర్ చౌరస్తా వద్ద సోమవారం భారీ అగ్నిప్రమాదం సంభవించింది. స్థానిక మహీంద్రా , రెనాల్ట్ కార్ల షోరూంలకు చెందిన స్క్రాప్ గోదాంలో ఒక్కసారిగా మంటలు చెలరేగడంతో ఆ ప్రాంతమంతా యుద్ధ వాతావరణాన్ని తలపించింది. గోదాంలో ఉన్న పాత స్పేర్ పార్ట్స్, టైర్లు, లెదర్ సీట్లు అంటుకోవడంతో ఆకాశమంతా నల్లటి దట్టమైన పొగ కమ్ముకుంది. కార్ సర్వీసింగ్ సెంటర్లలో మార్చిన పాత వస్తువులను భద్రపరిచే గోదాంలో ఈ ప్రమాదం జరిగింది. అప్పటికే సర్వీసింగ్ కోసం వచ్చిన అనేక కార్లు అక్కడ పార్క్ చేసి ఉండటంతో, మంటలు వాటికి కూడా వ్యాపించే ప్రమాదం ఏర్పడింది. దీనితో అప్రమత్తమైన షోరూం సిబ్బంది వెంటనే ఆ వాహనాలను సురక్షిత ప్రాంతాలకు తరలించారు. అదృష్టవశాత్తూ ప్రమాద సమయంలో గోదాంలో ఎవరూ లేకపోవడంతో ప్రాణనష్టం తప్పింది.

గోదాంలో టైర్లు, లెదర్ ఐటమ్స్ కాలిపోవడంతో వెలువడిన దట్టమైన పొగ కారణంగా చుట్టుపక్కల నివాసితులు శ్వాస తీసుకోవడానికి తీవ్రంగా ఇబ్బంది పడ్డారు. షోరూం వెనుక వైపున ఉన్న అపార్ట్‌మెంట్లు, నివాస గృహాలకు మంటలు వ్యాపించే ముప్పు ఉండటంతో పోలీసులు, అగ్నిమాపక సిబ్బంది అక్కడి ప్రజలను తక్షణమే ఖాళీ చేయించారు. రద్దీగా ఉండే అంబర్‌పేట చౌరస్తాలో ఈ ప్రమాదం జరగడంతో భారీగా ట్రాఫిక్ నిలిచిపోయింది. సమాచారం అందిన వెంటనే రెండు ఫైర్ ఇంజన్లు ఘటనా స్థలానికి చేరుకుని మంటలను అదుపు చేసేందుకు శ్రమించాయి. పొగ ఎక్కువగా ఉండటంతో గోదాం లోపలికి వెళ్లడం సిబ్బందికి కష్టంగా మారింది. వాటర్ స్ప్రే చేయడంతో పాటు పరిస్థితిని బట్టి ఫోమ్ (Foam) ఉపయోగించి మంటలను అదుపులోకి తెచ్చారు. ఈ ప్రమాదం షార్ట్ సర్క్యూట్ వల్ల జరిగిందా లేదా ఇతర కారణాలేమైనా ఉన్నాయా అనే కోణంలో పోలీసులు దర్యాప్తు చేస్తున్నారు.