Rohit Sharma: రోహిత్ శర్మకి పద్మశ్రీ ప్రకటించిన కేంద్రం.. మే 25న ఆ అవార్డును ఎందుకు అందుకోలేదు?

Rohit Sharma: భారత క్రికెట్ జట్టు మాజీ కెప్టెన్, స్టార్ బ్యాటర్ రోహిత్ శర్మ మే 25న న్యూఢిల్లీలో జరిగిన పద్మశ్రీ అవార్డుల ప్రదానోత్సవానికి హాజరుకాకపోవడం అభిమానులను తీవ్ర ఆశ్చర్యానికి గురిచేసింది. అద్భుతమైన సేవలు, అత్యుత్తమ నాయకత్వ ప్రతిభ, అంతర్జాతీయ వేదికలపై సాధించిన విజయాలకు గుర్తింపుగా కేంద్ర ప్రభుత్వం రోహిత్ శర్మతో పాటు భారత మహిళల క్రికెట్ జట్టు కెప్టెన్ హర్మన్‌ప్రీత్ కౌర్‌కు సైతం పద్మశ్రీ అవార్డును ప్రకటించింది. అయితే, ఇంగ్లాండ్‌లో జరగబోయే మహిళల వన్డే ప్రపంచ కప్ సన్నాహకాల్లో బిజీగా ఉన్నప్పటికీ హర్మన్‌ప్రీత్ కౌర్ ప్రత్యేకంగా సమయం కేటాయించి స్వయంగా హాజరై ఈ అవార్డును అందుకున్నారు. కానీ, రోహిత్ శర్మ కొన్ని షెడ్యూల్ కారణాల వల్ల ఈ మొదటి విడత అవార్డుల ప్రధానోత్సవానికి రాలేకపోయారు. సాధారణంగా పద్మ అవార్డులను రాష్ట్రపతి భవన్‌లో కొన్ని వారాల వ్యవధిలో వేర్వేరు బ్యాచ్‌లుగా విభజించి, పలు కార్యక్రమాల ద్వారా అందజేస్తుంటారు. అందువల్ల రోహిత్ శర్మ ఈ ఏడాది చివర్లో జరగబోయే తదుపరి కార్యక్రమంలో అధికారికంగా తన పతకాన్ని అందుకోనున్నారు.

రోహిత్ శర్మ ఎందుకు హాజరుకాలేదంటే?
గత రిపబ్లిక్ డే సందర్భంగా ప్రకటించిన పద్మశ్రీ గ్రహీతల జాబితాలో రోహిత్ శర్మ పేరు ప్రముఖంగా ఉండటంతో మే 25న న్యూఢిల్లీలో జరిగిన వేడుకకు తప్పకుండా వస్తారని ఫ్యాన్స్ ఎంతగానో ఎదురుచూశారు. కానీ రాష్ట్రపతి ద్రౌపది ముర్ము చేతుల మీదుగా అవార్డులు అందుకున్న మొదటి బ్యాచ్‌లో రోహిత్ లేకపోవడంతో సోషల్ మీడియాలో దీనిపై పెద్ద ఎత్తున చర్చ నడిచింది. రోహిత్ ఎందుకు రాలేదంటూ ఫ్యాన్స్ ఆరా తీయడం మొదలుపెట్టారు. అయితే దీని వెనుక ఎలాంటి వివాదం లేదు, ఇది పూర్తిగా సాంకేతికమైన ప్రక్రియ మాత్రమే. పద్మ అవార్డుల వేడుకలు దశలవారీగా జరుగుతాయి. అవార్డు గ్రహీతల వ్యక్తిగత షెడ్యూల్‌లు, ప్రభుత్వ కేటాయింపులను బట్టి మిగిలిన వారికి తర్వాతి విడతల్లో వీటిని అందజేస్తారు. ఇక, రాష్ట్రపతి భవన్‌లో త్వరలో జరగబోయే తదుపరి పద్మ అవార్డుల ప్రదానోత్సవంలో రోహిత్ శర్మ పద్మశ్రీ మెడల్‌ను అందుకోనున్నారు. అయితే దీనికి సంబంధించిన అధికారిక తేదీని ఇంకా ప్రకటించాల్సి ఉంది. మొదటి విడత కార్యక్రమానికి రాలేకపోయిన విజేతలకు ప్రభుత్వం నిర్వహించే తదుపరి వేడుకల్లో అవార్డులు ఇవ్వడం సర్వసాధారణం.