Bumrah ICC Finals Stats: ఐసీసీ ఫైనల్స్‌లో ‘బౌలింగ్ కింగ్’.. ఒత్తిడిలోనూ క్లాస్ చూపించిన జస్ప్రీత్ బుమ్రా!

Jasprit Bumrah’s ICC Finals Stats యార్కర్ కింగ్, స్టార్ పేసర్ జస్ప్రీత్ బుమ్రా తన ప్రత్యేకమైన బౌలింగ్‌తో ఎన్నోసార్లు భారత జట్టుకు కీలక విజయాలు అందించాడు. ముఖ్యంగా ఐసీసీ టోర్నీల్లో అద్భుత బౌలింగ్ చేశాడు. అందులోనూ ఫైనల్ మ్యాచ్‌ల వంటి అత్యంత ఒత్తిడితో కూడిన సందర్భాల్లో కూడా బాధ్యతాయుతంగా బౌలింగ్ చేసి తన క్లాస్ నిరూపించాడు. ఐసీసీ టోర్నమెంట్ ఫైనల్స్‌లో బుమ్రా బౌలింగ్ గణాంకాలు చూస్తే.. అతని బౌలింగ్‌ ప్రభావం మ్యాచ్‌పై స్పష్టంగా కనిపిస్తుంది. భారత్, న్యూజిలాండ్‌ జట్ల మధ్య ఈరోజు టీ20 ప్రపంచ కప్‌ 2026 ఫైనల్‌ జరగనుంది. ఈ నేపథ్యంలో బుమ్రా ఐసీసీ స్టాట్స్ ఓసారి చూద్దాం.

2017 ఛాంపియన్స్ ట్రోఫీ:
ఐసీసీ ఛాంపియన్స్ ట్రోఫీ 2017 ఫైనల్‌లో జస్ప్రీత్ బుమ్రా ఆడాడు. అప్పుడప్పుడే కెరీర్ ఆరంభించిన బుమ్రా 9 ఓవర్లు బౌలింగ్ చేసి 68 పరుగులు ఇచ్చాడు. ఆ మ్యాచ్‌లో వికెట్లు తీయకపోయినా భారత బౌలింగ్ దళంలో కీలక పాత్ర పోషించాడు. ఆర్ అశ్విన్, ఆర్ జడేజా కంటే బాగా బౌలింగ్ చేశాడు. ఆ మ్యాచ్‌లో పాకిస్తాన్ ఏకంగా 180 పరుగుల తేడాతో గెలిచింది.

2023 వన్డే వరల్డ్ కప్:
2023 వన్డే వరల్డ్ కప్ ఫైనల్‌లో జస్ప్రీత్ బుమ్రా అద్భుతమైన స్పెల్ వేశాడు. 9 ఓవర్లలో కేవలం 43 పరుగులు మాత్రమే ఇచ్చి.. 2 కీలక వికెట్లు తీశాడు. ఆ మ్యాచ్‌లో బూమ్ బూమ్ కట్టుదిట్టమైన బౌలింగ్ ప్రత్యర్థి బ్యాటర్లపై ఒత్తిడి తీసుకొచ్చింది. అహ్మదాబాద్‌లోని నరేంద్ర మోడీ స్టేడియంలో మ్యాచ్‌లో ఆస్ట్రేలియా 6 వికెట్ల తేడాతో గెలిచింది. మొదట బ్యాటింగ్ చేసిన భారత్ 240 పరుగులకు ఆలౌట్ కాగా.. ఆసీస్ 43 ఓవర్లలోనే లక్ష్యాన్ని చేరుకుంది.

2024 టీ20 వరల్డ్ కప్:
ఇక 2024 టీ20 వరల్డ్ కప్ ఫైనల్‌లో కూడా జస్ప్రీత్ బుమ్రా అద్భుత ప్రదర్శన చేశాడు. నాలుగు ఓవర్లు వేసి 18 పరుగులు మాత్రమే ఇచ్చి.. 2 వికెట్లు పడగొట్టాడు. టీ20 ఫార్మాట్‌లో ఇది బెస్ట్ బౌలింగ్ స్పెల్‌లలో ఒకటిగా చెప్పుకోవచ్చు. ఉత్కంఠభరితంగా సాగిన ఫైనల్లో భారత్‌ విజయం సాధించింది.

ఫైనల్లీ:
మొత్తంగా చూస్తే.. ఐసీసీ ఫైనల్స్‌లో బుమ్రా ఎప్పుడూ జట్టుకు నమ్మకమైన బౌలర్‌గా నిలిచాడు. కీలక మ్యాచ్‌ల్లో అతని నియంత్రణ, యార్కర్లు, స్లోయర్ బంతులు ప్రత్యర్థి బ్యాటర్లను ఇబ్బందులకు గురిచేశాయి. అందుకే ప్రపంచ క్రికెట్‌లో అత్యుత్తమ ఫాస్ట్ బౌలర్లలో బుమ్రా ఒకడిగా గుర్తింపు పొందాడు.