Sai Sudharsan: ఐపీఎల్ చరిత్రలోనే మొదటి బ్యాట్స్‌మెన్‌గా.. ఆ రికార్డు బద్దలు కొట్టిన సాయి సుదర్శన్..

టీ20 క్రికెట్‌లో గుజరాత్ టైటాన్స్ (GT) యువ ఓపెనర్ సాయి సుదర్శన్ సరికొత్త చరిత్ర సృష్టించాడు. కోల్‌కతా నైట్ రైడర్స్ (KKR)తో ఈడెన్ గార్డెన్స్‌లో జరిగిన మ్యాచ్‌లో ఆయన ఒక అరుదైన మైలురాయిని అందుకున్నాడు. టీ20 ఫార్మాట్‌లో అత్యంత వేగంగా 3,000 పరుగులు పూర్తి చేసిన ప్రపంచ క్రికెటర్‌గా సాయి సుదర్శన్ రికార్డుకెక్కాడు. కేవలం 78 ఇన్నింగ్స్‌ల్లోనే ఆయన ఈ మార్కును చేరుకుని, గతంలో 85 ఇన్నింగ్స్‌ల్లో ఈ ఘనత సాధించిన ఆస్ట్రేలియా మాజీ బ్యాటర్ షాన్ మార్ష్ రికార్డును బద్దలు కొట్టాడు.

ఈ మ్యాచ్‌లో కార్తీక్ త్యాగి వేసిన బంతి ఎడమ చేతి మోచేతికి బలంగా తగలడంతో సుదర్శన్ మొదట రిటైర్డ్ హర్ట్‌గా వెనుతిరిగాడు. అయినా పట్టుదలతో మళ్లీ క్రీజులోకి వచ్చి 28 బంతుల్లో 6 ఫోర్లు, 3 సిక్సర్లతో 53 పరుగులు చేసి నాటౌట్‌గా నిలిచాడు. ప్రస్తుతం 24 ఏళ్ల సుదర్శన్ 79 మ్యాచ్‌ల్లో 43.72 సగటుతో 3,017 పరుగులు చేశాడు. ఈ సీజన్‌లో వరుసగా నాలుగు హాఫ్ సెంచరీలు (KKRపై 53*, SRHపై 61, RRపై 55, PBKSపై 57) బాదిన ఆయన, 554 పరుగులతో ‘ఆరెంజ్ క్యాప్’ రేసులో అగ్రస్థానంలో కొనసాగుతున్నాడు.

మ్యాచ్ విషయానికి వస్తే..
టాస్ ఓడి మొదట బ్యాటింగ్ చేసిన కేకేఆర్ నిర్ణీత 20 ఓవర్లలో 247/2 పరుగుల భారీ స్కోరు చేసింది. ఓపెనర్ ఫిన్ అలెన్ కేవలం 35 బంతుల్లో 10 సిక్సర్లు, 4 ఫోర్లతో 93 పరుగులు చేయగా, అంగ్క్రిష్ రఘువంశీ (44 బంతుల్లో 82*) మరియు కెమరూన్ గ్రీన్ (28 బంతుల్లో 52*) మెరుపు ఇన్నింగ్స్‌లు ఆడారు.

భారీ ఛేదనలో గుజరాత్ కెప్టెన్ శుభ్‌మన్ గిల్ (49 బంతుల్లో 85), జోస్ బట్లర్ (35 బంతుల్లో 57) రెండో వికెట్‌కు 128 పరుగులు జోడించి గెలుపు ఆశలు రేపారు. కానీ, వీరిద్దరూ అవుటైన తర్వాత రన్ రేట్ పెరిగిపోవడంతో గుజరాత్ 20 ఓవర్లలో 218/4 పరుగులకే పరిమితమై, 29 పరుగుల తేడాతో ఓడిపోయింది. కేకేఆర్ బౌలర్ సునీల్ నరైన్ (2/29) ‘ప్లేయర్ ఆఫ్ ది మ్యాచ్’గా నిలిచాడు. ప్రస్తుతం పాయింట్ల పట్టికలో గుజరాత్ రెండో స్థానంలో, కేకేఆర్ ఏడో స్థానంలో ఉన్నాయి.