Abhishek Sharma: ఒత్తిడిని తట్టుకోలేకపోతున్న అభిషేక్ శర్మ.. కీలక మ్యాచ్‌ల్లో చేతులెత్తేస్తున్న కాటేరమ్మ కొడుకు!

Abhishek Sharma’s poor record in knockout matches: భారత యువ ఓపెనర్ అభిషేక్ శర్మ ప్రతిభపై ఎలాంటి సందేహం లేదు. పవర్‌ప్లేలో దూకుడైన బ్యాటింగ్‌తో మ్యాచ్‌ను ఒంటిచేత్తో మలిచే సామర్థ్యం అతడికి ఉంది. ముఖ్యంగా ఐపీఎల్‌లో సన్‌రైజర్స్ హైదరాబాద్ తరఫున ఎన్నో విధ్వంసక ఇన్నింగ్స్ ఆడుతూ అభిమానులను అలరించాడు. అయితే కీలక మ్యాచ్‌లు, నాకౌట్ పోరుల్లో మాత్రం అభిషేక్ వరుసగా విఫలమవుతున్నాడు. దాంతో బిగ్ మ్యాచ్‌ల్లో ఒత్తిడిని తట్టుకోలేకపోతున్నాడా? అనే చర్చ ఇప్పుడు సోషల్ మీడియాలో జోరుగా సాగుతోంది.

అంతర్జాతీయ క్రికెట్‌లో కూడా అభిషేక్‌ శర్మ నాకౌట్ మ్యాచ్‌లలో పరుగులు చేయలేదు. ఆసియా కప్ ఫైనల్‌లో పాకిస్థాన్‌పై కేవలం 6 బంతుల్లో 5 పరుగులు మాత్రమే చేశాడు. 2026 టీ20 ప్రపంచ కప్‌లో పాకిస్థాన్‌పై 4 బంతులు ఆడి డకౌట్ అయ్యాడు. వెస్టిండీస్‌తో జరిగిన నాకౌట్ మ్యాచ్‌లో 11 బంతుల్లో 10 పరుగులు మాత్రమే చేశాడు. ఇంగ్లాండ్‌తో జరిగిన సెమీఫైనల్లో 7 బంతుల్లో 9 పరుగులకే పరిమితమయ్యాడు. కీలక సమయంలో జట్టుకు మంచి ఆరంభం ఇవ్వాల్సిన అభిషేక్.. తక్కువ స్కోర్లకే పెవిలియన్ చేరడం అభిమానులను తీవ్రంగా నిరాశపరుస్తోంది.

కాటేరమ్మ కొడుకుగా పేరొందిన అభిషేక్‌ పరిస్థితి ఐపీఎల్ ప్లేఆఫ్స్‌లోనూ అంతే. గత నాలుగు కీలక మ్యాచ్‌ల్లో అతడి స్కోర్లు చూసి అభిమానులు షాక్ అవుతున్నారు. ఓ ప్లేఆఫ్ మ్యాచ్‌లో 4 బంతుల్లో 3 పరుగులు, మరో మ్యాచ్‌లో 5 బంతుల్లో 12 పరుగులు చేశాడు. ఐపీఎల్ ఫైనల్‌లో 5 బంతుల్లో కేవలం 2 పరుగులకే ఔటయ్యాడు. ఐపీఎల్ 2026 ఎలిమినేటర్ మ్యాచ్‌లో 2 బంతులు ఆడి డకౌట్ అయ్యాడు. లీగ్ మ్యాచ్‌ల్లో బౌలర్లపై విరుచుకుపడే అభిషేక్.. నాకౌట్ దశకు వచ్చేసరికి పూర్తిగా తడబడుతున్నాడనే విమర్శలు వినిపిస్తున్నాయి.

అభిషేక్ శర్మ ఆటతీరు దూకుడైనది కావడంతో కొన్నిసార్లు త్వరగా ఔటవడం సహజమే. కానీ వరుసగా కీలక మ్యాచ్‌ల్లో విఫలమవడం మాత్రం ఆందోళన కలిగించే అంశంగా మారింది. నాకౌట్ మ్యాచ్‌లలో ఇన్నింగ్స్‌ను నిర్మించడంలో అతడు మరింత మెచ్యూరిటీ చూపించాల్సిన అవసరం ఉందని మాజీ క్రికెటర్లు అభిప్రాయపడుతున్నారు. పవర్ హిట్టింగ్‌తో పాటు పరిస్థితులకు తగ్గట్టు ఆడటం కూడా నేర్చుకోవాలని సూచిస్తున్నారు. ఇక సన్‌రైజర్స్ హైదరాబాద్ తరఫున ఐపీఎల్ 2026లో అభిషేక్ అద్భుతమైన ప్రదర్శన కనబరిచాడు. 15 ఇన్నింగ్స్‌లలో 206.23 స్ట్రైక్ రేట్, 43.31 సగటుతో 653 పరుగులు చేశాడు. ఈ సీజన్‌లో 1 సెంచరీ, 4 హాఫ్ సెంచరీలు ఉండగా.. అత్యుత్తమ స్కోరు 135 నాటౌట్.