Abhishek-Vaibhav: నా ఇన్నింగ్స్‌ క్రెడిట్‌ వైభవ్‌కే.. అభిషేక్‌ శర్మ ఆసక్తికర వ్యాఖ్యలు!

Abhishek, Vaibhav Interview: న్యూజిలాండ్‌తో జరిగిన మూడో టీ20లో భారత్ ఘన విజయం సాధించింది. మొదట బ్యాటింగ్‌ చేసిన కివీస్‌ నిర్ణీత 20 ఓవర్లలో మూడు వికెట్ల నష్టానికి 198 పరుగులు చేసింది. అనంతరం భారీ లక్ష్య ఛేదనలో భారత ఓపెనర్లు అభిషేక్‌ శర్మ, వైభవ్‌ సూర్యవంశీ విధ్వంసం సృష్టించారు. వీరిద్దరి దూకుడుతో భారత్‌ కేవలం 13.2 ఓవర్లలోనే లక్ష్యాన్ని ఛేదించింది. అభిషేక్‌ 38 బంతుల్లో సెంచరీ (113 పరుగులు) చేయగా.. వైభవ్‌ 19 బంతుల్లో 45 పరుగులు బాదాడు. మ్యాచ్‌ అనంతరం ఈ ఇద్దరు యువ బ్యాటర్లు ప్రత్యేకంగా చిట్‌చాట్‌ నిర్వహించారు. ఇందులో ఒకరినొకరు ప్రశ్నలు అడుగుతూ.. తమ ఇన్నింగ్స్‌ల గురించి ఆసక్తికర విషయాలు పంచుకున్నారు.

మూడో టీ20లో తొలి బంతిని ఎదుర్కొనే సమయంలో ఏం ఆలోచించావని అభిషేక్‌ శర్మ అడగ్గా.. వైభవ్‌ సూర్యవంశీ ఆసక్తికర సమాధానం ఇచ్చాడు. ‘గత మ్యాచ్‌లో తాను బ్యాటింగ్‌ చేసేందుకు ఎక్కువ సమయం తీసుకున్నా. నా సహజమైన టీ20 ఆటతీరుకు భిన్నంగా నెమ్మదిగా ఆడేందుకు ప్రయత్నించా. ఈసారి మాత్రం నాకు మంచి అవకాశం లభించింది. తొలి బంతి నుంచే వేగంగా పరుగులు సాధించాలని నిర్ణయించుకున్నా. అది వర్కౌట్ అయింది. నా సహజమైన దూకుడుతో ఆడటమే ఈ ఇన్నింగ్స్‌లో మంచి ఫలితాన్ని ఇచ్చింది. చాలా సంతోషంగా ఉన్నా’ అని బుడ్డోడు చెప్పుకొచ్చాడు.

వైభవ్‌ సమాధానంపై అభిషేక్‌ శర్మ స్పందిస్తూ.. తాను కూడా అదే విషయాన్ని ఆలోచించానని చెప్పాడు. ‘ఇన్నింగ్స్‌ తొలి ఓవర్లలో భారీగా పరుగులు సాధించేందుకు వైభవ్‌ ఆటతీరు ఎంతగానో ఉపయోగపడుతుంది. అతడు తొలి బంతిని ఎదుర్కొంటున్నప్పుడు ఎలాంటి షాట్‌ ఆడతాడో తెలుసుకోవాలనే ఆసక్తి నాన్‌స్ట్రైకర్‌ ఎండ్‌లో ఉన్న బ్యాటర్‌కు కూడా ఉంటుంది. ఈ టీ20లో వైభవ్‌ అద్భుతంగా బ్యాటింగ్‌ చేశాడు. జట్టు విజయంలో కీలక పాత్ర పోషించాడు. అతడి దూకుడు భారత జట్టుకు అద్భుతమైన ఆరంభాన్ని అందించింది’ అని అభిషేక్‌ ప్రశంసించాడు. ఈ మ్యాచ్‌లో తాను సాధించిన సెంచరీ వెనుక వైభవ్‌ పాత్ర కూడా ఉందని అభిషేక్‌ చెప్పాడు. వైభవ్‌ వేగంగా పరుగులు సాధిస్తూ ప్రత్యర్థి బౌలర్లపై ఒత్తిడి పెంచాడని, అతడి బ్యాటింగ్‌ తనకు కూడా స్వేచ్ఛగా ఆడేందుకు అనుకూల పరిస్థితులను కల్పించిందని అభిప్రాయపడ్డాడు. అందుకే తన ఇన్నింగ్స్‌ క్రెడిట్‌ను వైభవ్‌కు కూడా ఇస్తానని తెలిపాడు.