మణికంఠ కోట, ఐరా బన్సాల్ ప్రధాన పాత్రల్లో నటించిన తెలుగు యాక్షన్-థ్రిల్లర్ చిత్రం ‘ఫైటర్ శివ’ డిసెంబర్ 19న థియేటర్లలో విడుదలైంది. ప్రభాస్ నిమ్మల దర్శకత్వం వహించిన ఈ సినిమాలో సునీల్, వికాస్ వశిష్ఠ కీలక పాత్రల్లో కనిపించారు. క్రైమ్ థ్రిల్లర్ నేపథ్యంతో తెరకెక్కిన ఈ సినిమా ప్రేక్షకులను ఎంతవరకు ఆకట్టుకుందో ఇప్పుడు చూద్దాం.
కథ: శివ (మణికంఠ కోట) ఒక డైరెక్టర్ కావాలనే కలతో నిర్మాతల చుట్టూ తిరుగుతూ ఉంటాడు. ఈ క్రమంలో ఓ నిర్మాత డెమో తీసుకురావాలని చెప్పడంతో శివ ఒక షార్ట్ డెమో షూట్ చేస్తాడు. అదే సమయంలో డ్రగ్స్ సరఫరాపై విచారణ జరుపుతున్న పోలీసులు, శివ తీసిన డెమోలో అనుకోకుండా కీలక ఆధారాలను గుర్తిస్తారు. శివకు సంబంధం లేకపోయినా, డ్రగ్స్ కేసులో అతడు అనుమానితుడిగా మారతాడు. ఈ పరిస్థితుల్లో శివ నిర్దోషిగా బయటపడతాడా? తన డైరెక్టర్ కావాలన్న కల నెరవేరుతుందా? అన్నదే మిగతా కథ.
విశ్లేషణ: మణికంఠ కోట తన తొలి సినిమానే అయినా అనుభవం ఉన్న నటుడిలా మెప్పించాడు. డైరెక్టర్ అవ్వాలనే యువకుడి పాత్రలో అతని నటన సహజంగా సాగింది. హీరోయిన్ ఐరా బన్సాల్ నటి కావాలనే ఆశతో ఉన్న అమ్మాయి పాత్రలో ఒదిగిపోయింది. వీరిద్దరి మధ్య కెమిస్ట్రీ బాగా వర్క్ అవుట్ అయింది. పోలీస్ పాత్రలో సునీల్ ఆకట్టుకున్నాడు. వికాస్ వశిష్ఠ, మీసాల లక్ష్మణ్, అభయ్ బీతిగంటి తమ పాత్రల పరిధిలో బాగా నటించారు. నిర్మాతలు నరసింహ గౌడ్, రమేష్ ఉన్నం ప్రొడక్షన్ విలువల్లో ఎక్కడా రాజీ పడకుండా సినిమాను నిర్మించారు. సినిమా మొదటి భాగంలో కథ నడక కాస్త నెమ్మదిగా అనిపిస్తుంది. కొన్ని సన్నివేశాలు అవసరం లేకుండా లాగినట్లు అనిపిస్తాయి. మంచి కాన్సెప్ట్ ఉన్నా, స్క్రీన్ప్లే మరియు ఎగ్జిక్యూషన్లో ఇంకొంచెం మెరుగుదల ఉంటే ఫైటర్ శివ మరింత స్ట్రాంగ్ క్రైమ్ థ్రిల్లర్ అయ్యేది.
తుది మాట: ఫైటర్ శివ అశ్లీలత లేకుండా రూపొందించిన క్లీన్ క్రైమ్ థ్రిల్లర్. చివరి వరకు “తర్వాత ఏం జరుగుతుంది?” అనే ఆసక్తిని నిలబెట్టేలా సాగుతుంది.
