Yashasvi Jaiswal: ‘అలా ప్రవర్తించకూడదు’.. జైస్వాల్‌పై ఐసీసీ చర్యలు తప్పవు?

Yashasvi Jaiswal: శ్రీలంకతో జరిగిన కొలంబో టెస్టులో మైదానంలో సహనం కోల్పోయి లంక పేసర్ అసిథ ఫెర్నాండోతో ఘర్షణకు దిగిన భారత యువ ఓపెనర్ యశస్వి జైస్వాల్‌పై ఇప్పుడు ఐసీసీ (ICC) చర్యలు తీసుకునే అవకాశం కనిపిస్తోంది. మాటల యుద్ధం కాస్తా హెల్మెట్‌తో శారీరకంగా తాకేంత తీవ్రరూపం దాల్చడంతో ఈ అంశం ఐసీసీ కోడ్ ఆఫ్ కండక్ట్ పరిధిలోకి వచ్చింది. ఈ వివాదంపై భారత బ్యాటింగ్ కోచ్ సితాన్షు కోటక్ స్పందిస్తూ, మ్యాచ్ తదనంతర విలేకరుల సమావేశంలో కీలక వ్యాఖ్యలు చేశారు. “అక్కడ శ్రీలంక ఆటగాళ్ళు ఏదో అనే ఉంటారు. ఆవేశంలో (Heat of the moment) జైస్వాల్ అలా స్పందించి ఉంటాడు. కానీ, అంత దగ్గరగా ఫెర్నాండో వైపు వెళ్లి ఒంటికి తగిలేలా ప్రవర్తించి ఉండకూడదు. ఆటలోని ఆవేశంలో అలాంటివి జరిగిపోతుంటాయి” అని కోటక్ పేర్కొన్నారు.

మొదటి సెషన్‌లో అద్భుతంగా బ్యాటింగ్ చేస్తున్న జైస్వాల్ 45 పరుగుల వద్ద ఫెర్నాండో వేసిన లోపలికి స్వింగ్ అయిన అద్భుతమైన బంతికి బౌల్డ్ అయ్యాడు. జైస్వాల్‌ను అవుట్ చేసిన ఆనందంలో ఫెర్నాండో తీవ్రమైన మైండ్ గేమ్‌తో సెండ్ ఆఫ్ ఇచ్చాడు. వికెట్ కోల్పోయి తీవ్ర నిరాశతో పెవిలియన్ వైపు వెళ్తున్న జైస్వాల్, ఫెర్నాండో మాటలు విని ఆగ్రహంతో వెనక్కి తిరిగి వచ్చి పేసర్‌తో నేరుగా వాదనకు దిగాడు. ఈ క్రమంలో జైస్వాల్ హెల్మెట్ ఫెర్నాండో నుదిటిని తాకింది. వెంటనే లంక కెప్టెన్ ధనంజయ డి సిల్వాతో పాటు ఇతర ఆటగాళ్లు వచ్చి ఇద్దరినీ విడదీయడంతో వివాదం సర్దుమనిగింది.

ఐసీసీ నియమావళిలోని ఆర్టికల్ 2.12 ప్రకారం అంతర్జాతీయ మ్యాచ్‌లలో వేరొక ఆటగాడితో అనుచిత శారీరక స్పర్శ (Inappropriate physical contact) కు దిగడం తీవ్రమైన నేరం. ఈ ఘటనపై శ్రీలంక ఫాస్ట్ బౌలింగ్ కోచ్ ర్యాన్ వాన్ నీకెర్క్ మాట్లాడుతూ, మాటల ఘర్షణ భావోద్వేగాల తీవ్రతకు సంకేతమని, అయితే ఈ మొత్తం విషయాన్ని మ్యాచ్ రిఫరీ ఆండీ పైక్రాఫ్ట్ చూసుకుంటారని స్పష్టం చేశారు. జైస్వాల్ ఈ ఘటనలో లెవెల్-1 నేరానికి పాల్పడినట్లు రుజువైతే, అతనికి మ్యాచ్ ఫీజులో 50 శాతం వరకు కోత పడే అవకాశం ఉంది. దాంతో పాటు అధికారిక హెచ్చరిక, ఒకటి లేదా రెండు డిమెరిట్ పాయింట్లు పడే ఛాన్స్ ఉంది. మ్యాచ్ రిఫరీ నివేదిక ఆధారంగా ఐసీసీ ఈ యువ ఓపెనర్‌పై ఎలాంటి క్రమశిక్షణా చర్యలు తీసుకుంటుందో వేచి చూడాలి.