Virat Kohli: అందరి చూపు కోహ్లీ వైపే.. ఇంగ్లాండ్‌తో వన్డే సిరీస్‌లో బద్దలు కొట్టగల రికార్డులు లిస్ట్ ఇదిగో.!

Virat Kohli: టీ20 సిరీస్‌లో ఊహించని ఫలితాన్ని ఎదుర్కొన్న టీమిండియా ఇప్పుడు ఇంగ్లాండ్‌తో జరిగే మూడు మ్యాచ్‌ల వన్డే సిరీస్‌పై దృష్టి పెట్టింది. ఈ సిరీస్‌కు రోహిత్ శర్మ, విరాట్ కోహ్లీ, జస్ప్రీత్ బుమ్రా తిరిగి జట్టులో చేరడంతో అభిమానుల్లో కొత్త ఆశలు నెలకొన్నాయి. ముఖ్యంగా స్టార్ బ్యాటర్ విరాట్ కోహ్లీ ఈ సిరీస్‌లో ఎలా ఆడబోతున్నాడని ఆలోచిస్తున్నారు. ఇందులో భాగంగానే.. ఎన్నో అరుదైన రికార్డులను సొంతం చేసుకునే అవకాశం ఉంది. అదికూడా ఒకటి కాదు.. ఏకంగా 5 రికార్డులు కోహ్లీని ఊరిస్తున్నాయి. మరి ఆ రికార్డ్స్ ఏంటో చూసేద్దామా..

15 వేల వన్డే పరుగులు:

విరాట్ కోహ్లీ ఈ సిరీస్‌లో 203 పరుగులు సాధిస్తే వన్డే క్రికెట్‌లో 15,000 పరుగుల మైలురాయిని చేరుకుంటాడు. సచిన్ తర్వాత ఈ ఘనత సాధించిన బ్యాటర్ల జాబితాలో చోటు దక్కించుకోనున్నాడు.

టాప్ రన్ స్కోరర్‌గా కోహ్లీ:

ఇంగ్లాండ్‌పై అంతర్జాతీయ క్రికెట్‌లో అత్యధిక పరుగులు చేసిన భారత బ్యాటర్‌గా నిలవడానికి కోహ్లీకి కేవలం 9 పరుగులు మాత్రమే అవసరం. ఈ రికార్డును తొలి మ్యాచ్‌లోనే అందుకునే అవకాశం ఉంది.

నంబర్-3లో అరుదైన ఘనత:

అంతర్జాతీయ క్రికెట్‌లో నంబర్-3 స్థానంలో బ్యాటింగ్ చేస్తూ 16,000 పరుగులు పూర్తి చేయడానికి కోహ్లీకి మరో 81 పరుగులు అవసరం.

వన్డేల్లో కొత్త చరిత్ర:

వన్డేల్లో ఇంగ్లాండ్‌పై అత్యధిక పరుగులు చేసిన భారత బ్యాటర్‌గా నిలవడానికి కోహ్లీకి 150 పరుగులు మాత్రమే కావాలి. ఈ సిరీస్‌లో మంచి ఫామ్ కొనసాగిస్తే ఈ రికార్డు కూడా అతని ఖాతాలో చేరే అవకాశం ఉంది.

అత్యధిక 50+ స్కోర్ల ఘనత:

ఇంగ్లాండ్‌పై అత్యధిక 50 లేదా అంతకంటే ఎక్కువ స్కోర్లు చేసిన ఆటగాడిగా నిలవడానికి కోహ్లీకి కేవలం ఒక్క 50+ ఇన్నింగ్స్ మాత్రమే అవసరం. ఈ రికార్డు కూడా ఈ సిరీస్‌లోనే అందుకునే అవకాశముంది. ఈ మూడు మ్యాచ్‌ల వన్డే సిరీస్‌లో విరాట్ కోహ్లీ ఫామ్‌లో కనిపిస్తే వ్యక్తిగతంగా ఎన్నో మైలురాళ్లను చేరుకోవడమే కాకుండా.. టీమిండియాకు సిరీస్ విజయంలోనూ కీలక పాత్ర పోషించే అవకాశం ఉంది. అందుకే ఈ సిరీస్‌లో అభిమానులందరి చూపు కోహ్లీ బ్యాట్‌పైనే నిలిచింది.