CAA: సీఏఏపై అమెరికా గాయని ప్రశంసల వర్షం.. ఏమన్నారంటే?
CAA: భారత్లో అమలవుతున్న పౌరసత్వ సవరణ చట్టం (సీఏఏ)పై అమెరికా గాయని మేరీ మిల్బెన్ శుక్రవారం ప్రధాని నరేంద్ర మోడీని ప్రశంసించారు. విశ్వాసం కారణంగా చిత్రహింసలకు గురైన ప్రజల పట్ల ప్రధాని మోడీ దయతో కూడిన దృక్పథాన్ని అవలంబిస్తున్నారని, వారికి భారత్లో నివాసం కల్పిస్తున్నారన్నారు. సీఏఏ నిజమైన చర్య అని కూడా ఆమె పేర్కొన్నారు. మత స్వేచ్ఛను కోరుకునే క్రైస్తవులు, హిందువులు, సిక్కులు, జైనులు, బౌద్ధులకు ఇది శాంతి మార్గం అని అమెరికన్ గాయని అన్నారు. ప్రధానమంత్రి మూడవసారి తిరిగి ఎన్నికైనప్పుడు, అమెరికా ఏకగ్రీవంగా మెరుగైన ప్రజాస్వామ్య భాగస్వామి కావాలనే లక్ష్యంతో ఉండాలన్నారు. పౌరసవరణ చట్టం నిజమైన ప్రజాస్వామ్య చర్య అని పేర్కొన్నారు.
భారతదేశంలో పౌరసత్వ సవరణ చట్టం అమల్లోకి వచ్చింది. ప్రభుత్వం నోటిఫికేషన్ జారీ చేసింది, అయితే ఇది అమెరికాకు ఇష్టం లేదు. దానిపై అభ్యంతరం దాఖలు చేస్తోంది. అయితే అమెరికాకు భారత్ ధీటుగా సమాధానం ఇచ్చింది. మార్చి 11 నుండి పౌరసత్వ సవరణ చట్టం నోటిఫికేషన్ గురించి మేము ఆందోళన చెందుతున్నామని యూఎస్ స్టేట్ డిపార్ట్మెంట్ ప్రతినిధి మాథ్యూ మిల్లర్ చెప్పారు. ఈ చట్టం ఎలా అమలు చేయబడుతుందో నిశితంగా పరిశీలిస్తున్నామన్నారు. మత స్వేచ్ఛను గౌరవించడం, అన్ని వర్గాలకు సమానమైన చట్టాన్ని అందించడం ప్రాథమిక ప్రజాస్వామ్య సూత్రమని ఆయన అన్నారు.
Read Also: Yogi Adityanath: రాజకీయాలను నేరపూరితం చేయడాన్ని ఎప్పటికీ అనుమతించం..
ఇదిలా ఉండగా.. భారత్ అమలు చేయనున్న పౌరసత్వ సవరణ చట్టం(సీఏఏ)పై పలు దేశాలు, అంతర్జాతీయ సంస్థలు కామెంట్స్ చేస్తున్నాయి. భారత అంతర్గత విషయాల్లో ఎక్కువగా కలుగజేసుకుంటున్నాయి. ఆమ్నెస్టీ ఇంటర్నేషనల్, ఐక్యరాజ్యసమితి హక్కుల విభాగాలు ఈ చట్టం అమలును మతవివక్ష అంటూ వ్యతిరేకిస్తున్నాయి. పాకిస్తాన్, ఆఫ్ఘనిస్తాన్, బంగ్లాదేశ్లలో ముస్లిమేతర మైనారిటీలకు భారత పౌరసత్వం అందించడం ఈ చట్టం యొక్క ముఖ్య ఉద్దేశం. అయితే, ఇందులో ముస్లింలను మినహాయించడంపై పలు సంస్థలు ఆందోళన వ్యక్తం చేస్తున్నాయి.
డిసెంబర్ 31, 2014 కంటే ముందు బంగ్లాదేశ్, పాకిస్తాన్, ఆఫ్ఘనిస్తాన్ నుంచి మతపరమైన హింసను ఎదుర్కొని భారతదేశానికి శరణార్థులుగా వచ్చిన హిందువులు, సిక్కులు, పార్సీలు, క్రైస్తవులు, బౌద్ధులు వంటి ముస్లిమేతరులకు భారత పౌరసత్వాన్ని సీఏఏ అందిస్తుంది. వలసదారులకు పౌరసత్వం కోసం దరఖాస్తు అర్హత 11 ఏళ్ల నుంచి 5 ఏళ్లకు తగ్గించింది. సీఏఏ భారత ముస్లింల పౌరసత్వాన్ని హరించదని, వారికి ఎలాంటి ఇబ్బందులు ఉండవని కేంద్ర హోంమంత్రి అమిత్ షా స్పష్టం చేశారు.