United Kingdom: యూకే ఎయిర్ ట్రాఫిక్ కంట్రోల్ సిస్టమ్‌లో సాంకేతిక సమస్య.. గగనతలం మూసివేత

UK air traffic control system: యునైటెడ్ కింగ్‌డమ్ ఎయిర్‌ ట్రాఫిక్‌ కంట్రోల్‌ సిస్టమ్ సాంకేతిక సమస్యతో పోరాడుతోంది. కంపూటర్లలో సాంకేతిక సమస్య వల్ల ఈ వ్యవస్థ పనిచేయలేదు. ఈ నేపథ్యంలోనే బ్రిటన్‌ గగనతలాన్ని మూసివేశారు. దీంతో విమానాలు ఎక్కడికక్కడ నిలిచిపోయాయి. అలాగే విమానాల రాకపోకలకు అంతరాయం ఏర్పడింది. ఈ నేపథ్యంలో ఎయిర్‌పోర్టులు, విమానాల్లో చిక్కుకున్న ప్రయాణికులు పలు ఇబ్బందులకు గురయ్యారు. బ్రిటన్ నేషనల్ ఎయిర్ ట్రాఫిక్ సర్వీసెస్‌లో సాంకేతిక సమస్య తలెత్తినట్లు బ్రిటన్‌లోని విమానయాన సంస్థలు చెప్పాయి. దీంతో దేశంలో విమాన సర్వీసులు ఆలస్యమవుతాయని స్పష్ట చేశాయి. ఇంజినీర్లు లోపాన్ని కనుగొని పరిష్కరించడానికి కృషి చేస్తున్నారని, దీని వలన కలిగే అసౌకర్యానికి తాము క్షమాపణలు కోరుతున్నట్లు ఆయా సంస్థలు పేర్కొన్నాయి. అయితే సాంకేతిక సమస్య ఎప్పుడు పరిష్కారం అవుతుందనే దానిపై క్లారిటీ లేదు. సాంకేతిక సమస్య నేపథ్యంలో స్కాటిష్ విమానయాన సంస్థ లోగనైర్, ఈజీజెట్ విమానాలు ఆలస్యం అయ్యే అవకాశం ఉందని ప్రయాణికుల ట్విట్టర్ వేదికగా హెచ్చరించాయి.

Read Also: Earthquake: ఆఫ్ఘనిస్థాన్‌లో మరోసారి భూకంపం.. భయంతో పరుగులు తీసిన ప్రజలు

అంతర్జాతీయ విమానాలు ఆలస్యం కావచ్చని విమానయాన సంస్థ హెచ్చరించింది. ఈ ఉదయం యూకే ఎయిర్ ట్రాఫిక్ కంట్రోల్ కంప్యూటర్ సిస్టమ్ నెట్‌వర్క్-వ్యాప్త వైఫల్యం జరిగిందని పేర్కొంది. ప్రస్తుతానికి యునైటెడ్‌ కింగ్‌డమ్‌లో విమానాల రాకపోకల విషయంలో ల్యాండింగ్‌కు మాత్రమే అనుమతి ఇస్తున్నారు. కానీ టేకాఫ్‌కు అనుమతి లేదు. సుధీర్ఘ వారంతపు సెలవులకు విదేశాలకు వెళ్లిన వారు ఎక్కువ సంఖ్యలో తిరిగి వస్తున్న సమయంలో విమాన సర్వీసులు ఆగిపోవడం వల్ల వేలాది మంది ప్రయాణికులు ఇబ్బందులకు గురవుతారని ట్రావెల్ జర్నలిస్ట్ సైమన్ కాల్డర్ అన్నారు. ఇది ఎప్పుడు పరిష్కరించబడుతుందో కచ్చితంగా తెలియదన్నారు. సమస్యకు కారణాన్ని కూడా అధికారులు గుర్తించలేదని పేర్కొన్నారు. సమస్య ప్రభావాన్ని అర్థం చేసుకోవడానికి, సాధారణ కార్యకలాపాలు తిరిగి ప్రారంభించడానికి తాము సంబంధిత అధికారులతో కలిసి పని చేస్తున్నామని ఈజీజెట్ ఎయిర్ లైన్ తెలిపింది.

కాగా, సాంకేతిక సమస్య వల్ల ఎయిర్‌ ట్రాఫిక్‌ కంట్రోల్‌ నెట్‌వర్క్‌ వ్యవస్థ పని చేయడంలేదని బ్రిటన్‌ జాతీయ ఎయిర్‌ ట్రాఫిక్‌ సర్వీస్‌ (ఎన్‌ఏటీఎస్‌) ప్రతినిధి తెలిపారు. ఈ నేపథ్యంలో విమానాల రాకపోకలపై ఆంక్షలు విధించినట్లు చెప్పారు. ఈ లోపాన్ని సరిచేసేందుకు ఇంజినీర్లు ప్రయత్నిస్తున్నట్టు వెల్లడించారు. మరోవైపు ఎయిర్‌ ట్రాఫిక్‌ కంట్రోల్‌ నెట్‌వర్క్‌ వ్యవస్థ ఫెయిల్‌ నేపథ్యంలో తమ సర్వీసులకు అంతరాయం ఏర్పడినట్లు బ్రిటన్‌కు చెందిన పలు విమానయాన సంస్థలు ప్రకటించాయి. అయినప్పటికీ సేవలకు ఎలాంటి ఆటంకం కలుగకుండా చూసేందుకు ప్రయత్నినట్టు వెల్లడించాయి.