Parliament Special Sessions: పార్లమెంట్ ప్రత్యేక సమావేశాలకు ప్లాన్?.. డీలిమిటేషన్, మహిళా రిజర్వేషన్ బిల్లులపై కసరత్తు

Parliament Special Sessions: ఓటర్ల జాబితాల ప్రత్యేక సమగ్ర సవరణ (ఎస్‌ఐఆర్‌), చీఫ్ ఎలక్షన్ కమిషనర్ జ్ఞానేష్ కుమార్‌కు వ్యతిరేకంగా ప్రతిపక్షాలు నిరసనలను తీవ్రతరం చేస్తున్న వేళ.. కేంద్ర ప్రభుత్వం ఈ నెలాఖరులో పార్లమెంట్ ప్రత్యేక సమావేశాలను నిర్వహించే అవకాశాలు కనిపిస్తున్నాయి. నియోజకవర్గాల పునర్విభజన (డీలిమిటేషన్), మహిళా రిజర్వేషన్లకు సంబంధించిన రాజ్యాంగ సవరణ బిల్లులను ఈ సమావేశాల్లో ప్రవేశపెట్టాలని ప్రభుత్వం భావిస్తోంది. లోక్‌సభలో ఈ బిల్లులను ఆమోదింపజేసుకోవడానికి అవసరమైన బలం తమకు ఉందని కేంద్ర ప్రభుత్వ అగ్రశ్రేణి వర్గాలు ధీమా వ్యక్తం చేస్తున్నాయి. సభలో తమకు పూర్తి బలం ఉందనే నమ్మకంతో ఉన్న ప్రభుత్వం.. ఈ ప్రతిపాదిత చట్టాలను ముందుకు తీసుకెళ్లేందుకు సిద్ధమవుతోంది. అదే సమయంలో, ఓటింగ్ జరిగే అవకాశం ఉండటంతో తమకు మద్దతును మరింత పెంచుకునేందుకు ప్రతిపక్ష పార్టీలతో కూడా సంప్రదింపులు జరుపుతున్నట్లు సమాచారం.

గతంలో ఏప్రిల్ 17న ముగిసిన బడ్జెట్ సమావేశాల సమయంలో మోడీ ప్రభుత్వానికి పెద్ద ఎదురుదెబ్బ తగిలింది. లోక్‌సభ, రాష్ట్ర అసెంబ్లీలలో డీలిమిటేషన్, మహిళా రిజర్వేషన్ల అమలుకు సంబంధించిన రాజ్యాంగ సవరణ బిల్లు దిగువ సభలో వీగిపోయింది. ఇప్పుడు ఆ పరిణామం జరిగిన కొన్ని నెలల తర్వాత ప్రభుత్వం మళ్లీ ఈ దిశగా అడుగులు వేస్తోంది. రాజ్యాంగ సవరణ బిల్లు నెగ్గాలంటే పార్లమెంట్‌లో ప్రత్యేక మెజారిటీ (స్పెషల్ మెజారిటీ) తప్పనిసరి. ప్రస్తుత లోక్‌సభలో ఎన్డీయే కూటమికి సాధారణ మెజారిటీ ఉన్నప్పటికీ, రాజ్యాంగ సవరణకు కావాల్సిన మూడింట రెండు వంతుల మెజారిటీకి కొన్ని సీట్లు తక్కువగా ఉన్నాయి. ప్రస్తుతం లోక్‌సభలో 540 మంది సభ్యులు ఉండగా, బిల్లు ఆమోదానికి దాదాపు 360 సీట్ల మద్దతు అవసరం. అయితే గత సమావేశాలతో పోలిస్తే ఇప్పుడు ప్రభుత్వ బలం కొంత పెరిగింది. తృణమూల్ కాంగ్రెస్‌కు చెందిన 20 మంది ఎంపీలు, శివసేన (యుబిటి)కి చెందిన ఆరుగురు ఎంపీలు అధికార పక్షం వైపునకు మారడంతో ప్రభుత్వ స్థానం మరింత బలపడింది.

ఈ బిల్లులకు మద్దతు పొందడం కోసం కేంద్ర ప్రభుత్వం ద్రవిడ మున్నేట్ర కజగం (డిఎమ్‌కె)తో కూడా చర్చలు జరుపుతోందని సమాచారం. తమిళనాడు అసెంబ్లీ ఎన్నికల తర్వాత కాంగ్రెస్‌తో విభేదించి, ‘ఇండియా’ (INDIA) కూటమి నుంచి డిఎమ్‌కె బయటకు వచ్చిన సంగతి తెలిసిందే. ఈ నేపథ్యంలో ఆ ప్రాంతీయ పార్టీ మద్దతును కూడగట్టేందుకు కేంద్రం ప్రయత్నాలు చేస్తోంది. ఓటింగ్ నాటికి తమ వైపు సంఖ్యను మరింత పెంచుకునేందుకు కొన్ని చిన్న ప్రతిపక్ష పార్టీలతో కూడా ప్రభుత్వం టచ్‌లో ఉందని ఆ వర్గాలు తెలిపాయి. ఆగస్టు 13న ముగిసిన పార్లమెంట్ వర్షాకాల సమావేశాలు ఇప్పటివరకు అధికారికంగా ప్రొరోగ్‌ (రద్దు) కాకపోవడం గమనార్హం. దీనివల్ల ప్రత్యేక సమావేశాలను తక్షణమే ఏర్పాటు చేయడానికి ప్రభుత్వానికి సులువుగా మార్గం సుగమమైంది. ఇక, ఈ నెల 26, 27 తేదీల్లో సంవిధాన్ సదన్‌లో 12వ బ్రెజిల్, రష్యా, ఇండియా, చైనా, సౌత్ ఆఫ్రికా (బ్రిక్స్) పార్లమెంటరీ ఫోరమ్ జరగాల్సి ఉంది. ఈ సమావేశాల తేదీలను దృష్టిలో ఉంచుకుని పార్లమెంట్ ప్రత్యేక సమావేశాల తేదీలను ఆఖరిగా ఖరారు చేసే అవకాశం ఉంది. ఈ ప్రత్యేక సమావేశాలను ప్రారంభించడానికి ముందు కనీసం ఒక వారం రోజుల ముందే నోటీసు ఇచ్చే అవకాశం ఉందని సమాచారం.