Padma Devendar Reddy : భారీ వర్షాలతో అతలాకుతలం.. అమ్మవారికి బోనం

తెలంగాణలో వర్షాలు దంచికొడుతున్నాయి. ఈ నేపథ్యంలో వాగులు, వంకలు పొంగిపొర్లుతున్నాయి. అయితే.. ఆదివారం మెదక్ ఎమ్మెల్యే పద్మా దేవేందర్ రెడ్డి ఏడుపాయల శ్రీవనదుర్గ భవాని ఆలయం అమ్మవారికి ప్రత్యేక పూజలు చేశారు. మంజీర పరివాహక ప్రాంతంలో కురుస్తున్న భారీ వర్షాల కారణంగా మంజీర ఉధృతంగా ప్రవహిస్తున్నందున, తెలంగాణలోని నది ఒడ్డున నివసించే ప్రజలు క్షేమంగా ఉండాలని ఎమ్మెల్యే పద్మా దేవేందర్ రెడ్డి ప్రార్థించారు. ఏడుపాయల దేవాలయం గుండా ప్రవహించే మంజీర నది వద్ద గంగామాతకు పద్మా దేవేందర్ రెడ్డి హారతి ఇచ్చారు. ఆలయం దగ్గరగా ఉన్నందున రాజ గోపురం వద్ద ఉత్సవ విగ్రహానికి ఆమె పూజలు చేశారు. పద్మదేవేందర్‌రెడ్డి తో పాటు మహిళలు పెద్ద ఎత్తున అమ్మవారికి బోనం సమర్పించారు. ఈ సందర్భంగా ఆమె మాట్లాడుతూ.. నీటి ప్రవాహం తగ్గే వరకు రైతులు నది దగ్గరకు వెళ్లవద్దని విజ్ఞప్తి చేశారు. రానున్న మూడు రోజుల పాటు భారీ వర్షాలు కురిసే అవకాశం ఉన్నందున, నదీ తీరం వెంబడి ఉన్న కొన్ని వ్యవసాయ పొలాలు ముంపునకు గురయ్యే అవకాశం ఉందని పద్మా దేవేందర్ రెడ్డి తెలిపారు. అయితే ప్రజలు తమ ఇళ్లలోనే సురక్షితంగా ఉండాలని ఆమె కోరారు. ముఖ్యమంత్రి కే చంద్రశేఖర్‌రావు జిల్లా కలెక్టర్లు, ఇతర అధికారులను అప్రమత్తం చేశారని ఆమె అన్నారు.

 

ఆలయ చైర్మన్ బాల గౌడ్, తదితరులు పాల్గొన్నారు. ఇదిలా ఉండగా, సింగూర్ ప్రాజెక్టుకు ఎగువ నుంచి భారీ సంఖ్యలో ఇన్ ఫ్లోలు వస్తున్నాయి. ఆదివారం సాయంత్రం 6 గంటలకు ఎగువ నుంచి 29,901 క్యూసెక్కుల నీరు వస్తుండటంతో ఇరిగేషన్ అధికారులు మూడు గేట్లను ఎత్తివేశారు. ఔట్‌ఫ్లోలను 35 వేల క్యూసెక్కులుగా ఉంచారు. పూర్తి సామర్థ్యం 29.917 టీఎంసీలకుగానూ 29.293టీఎంసీల నీరు ఉంది.