Varanasi: మహేష్ పుట్టినరోజుకు ‘వారణాసి’ గిఫ్ట్ ఉంటుందా?.. 80% షూటింగ్ పూర్తయినా పోస్టర్ తో సరిపెట్టుకుంటారా ?

Varanasi: సూపర్ స్టార్ మహేష్ బాబు పుట్టినరోజు దగ్గరపడుతున్న కొద్దీ అభిమానుల్లో ఉత్సాహం రోజురోజుకూ పెరుగుతోంది. ఆగస్టు 9న మహేష్ బాబు జన్మదినాన్ని పురస్కరించుకుని ‘వారణాసి’ నుంచి ఏదో ఒక ప్రత్యేక అప్డేట్ వస్తుందని అభిమానులు ఎన్నో రోజులుగా ఎదురుచూస్తున్నారు. దిగ్గజ దర్శకుడు ఎస్.ఎస్. రాజమౌళి ప్రతిష్టాత్మకంగా తెరకెక్కిస్తుండటంతో ‘వారణాసి’పై అంచనాలు దేశవ్యాప్తంగా భారీగానే ఉన్నాయి. అలాంటి సమయంలో ఈ సినిమా గురించి వస్తున్న అప్డేట్స్ మాత్రం అభిమానులను నిరాశలో ముంచెత్తుతున్నాయి. ఇప్పటికే ఈ మూవీ దాదాపు 80 శాతం షూటింగ్ పూర్తి చేసుకున్నట్లు తెలుస్తోంది. దీంతో మహేష్ బాబు పుట్టినరోజు సందర్భంగా కనీసం ఒక గ్లింప్స్, టీజర్ లేదా ఫస్ట్ లుక్ వీడియో విడుదల చేస్తారని అభిమానులు ఆశించారు. గతంలో కూడా స్టార్ హీరోల పుట్టినరోజులకు మేకర్స్ ప్రత్యేక టీజర్లు విడుదల చేయడం ఆనవాయితీగా మారడంతో ఈసారి కూడా అలాంటి సర్‌ప్రైజ్ ఉంటుందని సోషల్ మీడియాలో పెద్ద ఎత్తున ప్రచారం జరిగింది.

అయితే తాజా సమాచారం ప్రకారం అభిమానుల అంచనాలకు ఈసారి బ్రేక్ పడే అవకాశం కనిపిస్తోంది. చిత్రబృందం ‘వారణాసి’ నుంచి ఎలాంటి గ్లింబ్స్, టీజర్ ను గాని రిలీజ్ చేసే ఆలోచనలో లేనట్లు టాక్ వినిపిస్తోంది. మహేష్ బాబు పుట్టినరోజు సందర్భంగా ఒక ప్రత్యేక పోస్టర్‌ను మాత్రమే విడుదల చేసే అవకాశాలు ఉన్నట్లు తెలుస్తోంది. దీంతో అభిమానులు మరో సారి నిరాశలో పడుతున్నట్లే కనిపిస్తోంది. అయితే ఈ నిర్ణయం వెనుక రాజమౌళి పనితీరు కూడా ఒక ప్రధాన కారణంగా కనిపిస్తోంది. ఆయన తన సినిమాలకు సంబంధించిన ప్రతి ప్రమోషనల్ కంటెంట్‌ను ఎంతో వ్యూహాత్మకంగా ప్లాన్ చేస్తారని తెలిసిందే. అందుకే సినిమా విడుదలకు ఇంకా సమయం ఉండటంతో ప్రస్తుతం పెద్ద రివీల్స్ చేయకుండా, మంచి అవుట్ పుట్ వచ్చాక రిలీజ్ చేసేందుకు జక్కన్న వ్యూహం రచిస్తున్నట్లు కూడా సినీ వర్గాలలో టాక్ వినిపిస్తోంది.

ఇదిలా ఉంటే, ‘వారణాసి’ చిత్రాన్ని నిర్ణయించిన షెడ్యూల్ ప్రకారమే పూర్తి చేయడానికి రాజమౌళి బృందం వేగంగా పనిచేస్తోంది. ప్రపంచవ్యాప్తంగా 2027 ఏప్రిల్ 7న విడుదల చేయాలనే లక్ష్యంతో చిత్రీకరణను పూర్తి చేసే పనిలో యూనిట్ నిమగ్నమై ఉంది. భారీ అడ్వెంచర్, ప్రపంచ యాత్ర నేపథ్యంలో రూపొందుతున్న ఈ సినిమాలో మహేష్ బాబుతో పాటు బాలీవుడ్ స్టార్ ప్రియాంక చోప్రా జోనాస్, మలయాళ నటుడు పృథ్వీరాజ్ సుకుమారన్ కీలక పాత్రల్లో నటిస్తున్నారు. ఈ ప్రతిష్టాత్మక చిత్రాన్ని ప్రముఖ నిర్మాత కె.ఎల్. నారాయణ, ఎస్.ఎస్. కార్తికేయ సంయుక్తంగా నిర్మిస్తున్నారు. ఆస్కార్ అవార్డు గ్రహీత ఎం.ఎం. కీరవాణి సంగీతం అందిస్తున్నారు. అయితే మహేష్ అభిమానులకు ఈసారి గ్లింప్స్ దక్కకపోయినా, రాజమౌళి సినిమాల విషయంలో ప్రతి అప్‌డేట్ కూడా పెద్ద ఈవెంట్‌లా మారుతుందనే విషయం తెలిసిందే. అందుకే మేకర్స్ సరైన సమయంలో విడుదల చేసే మొదటి విజువల్ కోసం అభిమానులు ఇంకొంతకాలం ఓపిక పట్టాల్సిందేనని తాజా పరిణామాలు సూచిస్తున్నాయి.