Yamaha R15, MT-15 MotoGP ఎడిషన్ బైక్స్ మళ్లీ వచ్చేశాయి.. కొత్త కలర్ ఆప్షన్‌లతో FZ-S సిరీస్ కూడా అప్‌డేట్..!

Yamaha R15, MT-15 MotoGP: భారత మార్కెట్లో మరోసారి యమహా (Yamaha) మాన్‌స్టర్ ఎనర్జీ MotoGP ఎడిషన్ (Monster Energy MotoGP Edition)ను YZF-R15 V4, MT-15 Version 2.0 బైక్‌లలో అందుబాటులోకి తీసుకొచ్చింది. రేసింగ్ లివరీకి వినియోగదారుల నుంచి మంచి ఆదరణ రావడంతో కంపెనీ ఈ ప్రత్యేక ఎడిషన్‌లను మళ్లీ విడుదల చేసింది. వీటితోపాటు FZ-S Fi Hybrid, FZ-S Fi మోడళ్లకు కూడా కొత్త కలర్ ఆప్షన్‌లను అందించింది.

ధరలు:

యమహా విడుదల చేసిన కొత్త మోడళ్ల ఎక్స్‌షోరూమ్ ధరలు ఇలా ఉన్నాయి.
* యమహా R15 V4 MotoGP ఎడిషన్ – రూ.1,76,050.
* యమహా MT-15 MotoGP ఎడిషన్ – రూ.1,77,230.
* యమహా FZ-S Fi హైబ్రిడ్ – రూ.1,39,200.
* యమహా FZ-S Fi – రూ.1,29,880.

MotoGP రేసింగ్ లివరీతో ప్రత్యేక ఎడిషన్:

R15 V4, MT-15 MotoGP ఎడిషన్ బైక్‌లలో గతంలో అందించిన అదే Monster Energy MotoGP రేసింగ్ లివరీని కొనసాగించారు. ఫ్యూయల్ ట్యాంక్, ట్యాంక్ ష్రౌడ్స్, సైడ్ ప్యానెల్స్‌పై MotoGP ప్రేరణతో రూపొందించిన ప్రత్యేక గ్రాఫిక్స్, రేసింగ్ డెకల్స్ ఈ బైక్‌లకు స్పోర్టీ లుక్‌ను అందిస్తున్నాయి. స్టాండర్డ్ వేరియంట్‌ లతో పోలిస్తే ఈ ప్రత్యేక డిజైన్‌నే ప్రధాన తేడాగా కంపెనీ పేర్కొంది.

ఇంజిన్‌లో మార్పులు:

ఈ రెండు MotoGP ఎడిషన్ బైక్‌లలో 155cc సింగిల్-సిలిండర్, లిక్విడ్-కూల్డ్ ఇంజిన్నే కొనసాగించారు. Variable Valve Actuation (VVA) టెక్నాలజీతో కూడిన ఈ ఇంజిన్ 18.4PS పవర్, 14.2Nm టార్క్ ఉత్పత్తి చేస్తుంది. దీనికి 6-స్పీడ్ గేర్‌బాక్స్ జత చేశారు. అయితే R15 V4, MT-15 మధ్య పవర్ డెలివరీలో స్వల్ప తేడా కోసం స్ప్రాకెట్ సెటప్‌ను భిన్నంగా ఉంచారు.

అధునాతన ఫీచర్లు:

ఈ రెండు బైక్‌లలో కూడా TFT ఇన్‌స్ట్రుమెంట్ క్లస్టర్, స్మార్ట్‌ఫోన్ కనెక్టివిటీ, డ్యూయల్-చానల్ ABS, USB ఛార్జింగ్ పోర్ట్ వంటి ఫీచర్లు స్టాండర్డ్‌గా అందుబాటులో ఉన్నాయి. అంతేకాకుండా R15 V4లో ట్రాక్షన్ కంట్రోల్, క్విక్ షిఫ్టర్ వంటి ఫీచర్లు కూడా ఉన్నాయి. అయితే ఈ రెండు ఫీచర్లు MT-15 MotoGP ఎడిషన్ లో అందుబాటులో లేవు.

FZ-S సిరీస్‌:

యమహా FZ-S Fi హైబ్రిడ్ బైక్‌ను కొత్త ఐస్ స్టోర్మ్ కలర్‌లో విడుదల చేసింది. గ్రే, బ్లూ షేడ్స్‌తో కూడిన ఈ కొత్త పెయింట్ స్కీమ్‌కు కొత్త గ్రాఫిక్స్ జత చేశారు. ఇప్పటికే ఉన్న మాట్టే బ్లాక్ కలర్‌కు కూడా కొత్త డెకల్స్ అందించారు. అలాగే FZ-S Fi మోడల్‌కు కొత్త మెటాలిక్ బ్లాక్ కలర్ ఆప్షన్‌ను అందించారు. బ్లాక్ బాడీతో పాటు రెడ్ గ్రాఫిక్స్, రెడ్ కలర్ అల్లాయ్ వీల్స్ ఈ బైక్‌కు మరింత స్ట్రీట్-ఫ్రెండ్లీ లుక్‌ను అందిస్తున్నాయి. 2026 Yamaha FZ-S Fi ఇప్పుడు ఐస్ స్టార్మ్, మ్యాట్ బ్లాక్, సియాన్ మెటాలిక్ గ్రే, మెటాలిక్ బ్లాక్, ఐస్ ఫ్లూయో-వర్మిలియన్ అనే ఐదు రంగుల్లో లభించనుంది.