New York: న్యూయార్క్‌లో బైబ్యాక్ కార్యక్రమం.. గిఫ్ట్‌కార్డుల కోసం తుపాకులను వదిలేశారు..

New York: అమెరికా గన్‌కల్చర్ గురించి అందరికి తెలిసిన విషయమే. అగ్రరాజ్యంలో ఎక్కడో ఓ చోట గన్‌ సౌండ్ వినబడుతూనే ఉంటుంది. ఆ గన్‌కల్చర్‌కు అడ్డుకట్టు వేయడానికి న్యూయార్క్ ఓ సరికొత్త కార్యక్రమాన్ని నిర్వహించింది. తుపాకులను వెనక్కి ఇచ్చిన వారికి గిఫ్ట్‌ కార్డులు అందిస్తామని ప్రకటించింది. న్యూయార్క్ బైబ్యాక్ పేరిట కార్యక్రమాన్ని ప్రారంభించిన తర్వాత న్యూయార్క్‌లో వేల సంఖ్యలో తుపాకులను వెనక్కి ఇచ్చారు. ప్రమాదకరమైన ఆయుధాలను వదిలిపెట్టిన తుపాకీ యజమానులకు బదులుగా 500 డాలర్ల విలువైన బహుమతి కార్డులను అందించినట్లు ది గార్డియన్ తెలిపింది. న్యూయార్క్ అటార్నీ జనరల్ లెటిటియా జేమ్స్ కార్యాలయం ఈ బైబ్యాక్ కార్యక్రమాన్ని నిర్వహించింది. 3,000 కంటే ఎక్కువ తుపాకులు వదులుకున్నట్లు తెలిసింది. వీటిలో అస్సాల్ట్-స్టైల్ రైఫిల్స్, ఘోస్ట్ గన్‌లు ఉన్నాయి. ఈ తుపాకులు అసెంబ్లింగ్ చేయకుండా విక్రయించిన తుపాకీ భాగాల నుంచి నిర్మించబడ్డాయని అవుట్‌లెట్ తన నివేదికలో పేర్కొంది. తాము ఈ రోజు 3,076 తుపాకులను స్వాధీనం చేసుకున్నామని న్యూయార్క్ అటార్నీ జనరల్ లెటిటియా జేమ్స్ తెలిపారు. ఇందులో 185 దాడి ఆయుధాలు ఉన్నాయన్నారు.

Read Also: BJP Manifesto: ఉచిత పాలు, ఉచిత సిలిండర్లు, యూనిఫాం సివిల్ కోడ్.. బీజేపీ హామీల వర్షం

న్యూయార్స్ వీధుల్లో నుంచి, ఇళ్ల నుంచి తుపాకులను బయటకు తీసుకురావడానికి సహాయం చేసిన వారంందరికీ, అధికారులకు న్యూయార్క్ అటార్నీ జనరల్ లెటిటియా జేమ్స్ ధన్యవాదాలు తెలిపారు. తుపాకీ హింస నుంచి న్యూయార్క్‌వాసులను రక్షించడానికి చేయగలిగినదంతా చేస్తామన్నారు. ఈ మేరకు ట్విటర్ వేదికగా తెలిపారు. తుపాకులను ఇచ్చిన వారికి 500 డాలర్లను గిఫ్ట్‌గా ఇచ్చారు. అటార్నీ జనరల్ కార్యాలయం న్యూయార్క్ అంతటా తొమ్మిది బైబ్యాక్ స్థానాలను ఏర్పాటు చేసింది. సిరక్యూస్‌లో అత్యధికంగా రికార్డు స్థాయిలో తుపాకులను అధికారులకు అందజేసినట్లు న్యూయార్క్ పోస్ట్ పేర్కొంది. ఒక్క చర్చిలోనే 90 తుపాకులు సేకరించినట్లు బ్రూక్లిన్ జిల్లా అటార్నీ ఎరిక్ గొంజాలెజ్ ట్వీట్ చేశారు.