El Nino : తెలంగాణలో కరువు ముప్పు.. రెండో పంట వేయొద్దంటూ మంత్రి కీలక విజ్ఞప్తి

El Nino : రాష్ట్రంలో రానున్న కాలంలో తీవ్ర వర్షాభావ పరిస్థితులు, నీటి ఎద్దడి ఏర్పడే ప్రమాదం ఉందని రాష్ట్ర రెవెన్యూ, గృహనిర్మాణ, సమాచార శాఖల మంత్రి పొంగులేటి శ్రీనివాస్ రెడ్డి హెచ్చరించారు. ఖమ్మం జిల్లా పాలేరు నియోజకవర్గంలో నిర్వహించిన వివిధ కార్యక్రమాల్లో ఆయన పాల్గొని మాట్లాడారు. ఈ సందర్భంగా ప్రపంచవ్యాప్తంగా, దేశవ్యాప్తంగా ప్రభావం చూపుతున్న ‘ఎల్‌నినో’ (El Nino) పరిస్థితుల కారణంగా రాష్ట్రంలో సాగు నీటితో పాటు రాబోయే రోజుల్లో తాగునీటికి కూడా తీవ్ర ఇబ్బందులు తలెత్తే అవకాశం ఉందని ఆందోళన వ్యక్తం చేశారు. ప్రస్తుతం పొలాల్లో ఉన్న మొదటి పంటను ఎలాగైనా కష్టపడి వంద శాతం కాపాడుకుంటామని, అయితే రైతులు ఎవరూ కూడా దయచేసి రెండో పంట (యాసంగి/వేసంగి) వేయవద్దని ఆయన ప్రభుత్వం తరఫున విజ్ఞప్తి చేశారు.

విద్యుత్ కొనుగోలు భారంగా మారింది..  

రాష్ట్రంలో తలెత్తబోయే విద్యుత్ సంక్షోభం, కరెంటు ఇబ్బట్లపై మంత్రి పొంగులేటి స్పష్టతనిచ్చారు. పవర్‌ గ్రిడ్‌లో డిమాండ్‌కు తగినట్లుగా విద్యుత్ సరఫరా చేయడం కష్టంగా మారుతోందని, విద్యుత్‌ను బయటి మార్కెట్ నుంచి కొనుగోలు చేయాలంటే యూనిట్‌కు రూ. 15 వెచ్చించినా దొరకని దయనీయ పరిస్థితి నెలకొందని తెలిపారు. అందువల్ల ప్రజలందరూ కూడా విద్యుత్‌ను అత్యంత పొదుపుగా వాడుకోవాలని కోరారు. ఒకవేళ రైతులు ఎవరైనా రెండో పంట వేస్తే.. అటు ప్రభుత్వం నీటిని, విద్యుత్‌ను సరఫరా చేయలేక సతమతమవుతుందని, ఇటు రైతులు తీవ్రంగా నష్టపోయి ఆర్థికంగా బాధపడాల్సి వస్తుందని ఆయన హితవు పలికారు. రైతులు ఈ పరిస్థితులను అర్థం చేసుకుని ప్రభుత్వానికి సహకరించాలని కోరారు.

రేపు, ఎల్లుండి కేబినెట్ భేటీ.. కేంద్రం పాత్రపై చర్చ

వర్షాభావ పరిస్థితులు, తాగు-సాగు నీటి ఎద్దడి, విద్యుత్ కొరతను సమర్థవంతంగా ఎలా ఎదుర్కోవాలో చర్చించేందుకు రేపు, ఎల్లుండి ముఖ్యమంత్రి రేవంత్ రెడ్డి ఆధ్వర్యంలో రాష్ట్ర మంత్రివర్గ ప్రత్యేక సమావేశం (Cabinet Meeting) జరగనున్నట్లు మంత్రి వెల్లడించారు. ఈ కేబినెట్ భేటీలో సంక్షోభ నివారణకు ప్రత్యామ్నాయ చర్యలపై చర్చిస్తామని తెలిపారు. కేంద్ర ప్రభుత్వం పెద్దన్న పాత్ర పోషించి కరువు నివారణకు, రాష్ట్రానికి అండగా నిలవాలని ఈ సమావేశంలో తీర్మానించి విజ్ఞప్తి చేస్తామన్నారు. త్వరలోనే అన్ని రాజకీయ పార్టీల నేతలతో అఖిలపక్ష సమావేశం (All-Party Meeting) ఏర్పాటు చేసి, ఎల్‌నినో ప్రభావంపై వారి నుంచి విలువైన సలహాలు, సూచనలు స్వీకరిస్తామని మంత్రి పొంగులేటి శ్రీనివాస్ రెడ్డి స్పష్టం చేశారు.