Kolikapudi Srinivasa Rao: తిరువూరు పట్టణంలో కొలికపూడి ఎన్నికల ప్రచారం..

ఎన్టీఆర్ జిల్లా తిరువూరు పట్టణంలోని 19వ వార్డులో ఎన్డీయే కూటమి అభ్యర్థి కొలికపూడి శ్రీనివాసరావు ఎన్నికల ప్రచారం నిర్వహించారు. ఈ సందర్భంగా ప్రతి ఇంటింటికి తిరుగుతూ వార్డు ప్రజలను మీకు ఏ సమస్యలు ఉన్నాయో తెలపండి, మీ సమస్యలు నేను తీరుస్తాను అంటూ హామీ ఇస్తూ.. ఎన్నికల ప్రచారం నిర్వహించారు. 19 వార్డులోని కొంతమంది ప్రజలు కొలికపూడి సమక్షంలో తెలుగుదేశం పార్టీలో చేరారు. ఇక, ప్రచార కార్యక్రమంలో కొలికపూడి శ్రీనివాసరావు మీడియా సమావేశంలో మాట్లాడుతూ.. ఎన్నికల ప్రచారంలో భాగంగా 19 వార్డులో రజక బజారులో ఇంటింటికి ప్రచారం చేస్తున్నప్పుడు చాలా మంది రజక కుటుంబస్తులు టీడీపీలో చేరడం సంతోషంగా ఉందన్నారు.

Read Also: Maheshwaram: కొండా విశ్వేశ్వర్ రెడ్డి సమక్షంలో బీజేపీలోకి 8మంది కార్పొరేటర్లు..

దాదాపుగా బీసీ కులాల్లో రజకులు నిర్లక్ష్యానికి గురి అవుతున్నారని కొలికపూడి శ్రీనివాసరావు అన్నారు. సాంప్రదాయ వృత్తి చేసుకుంటూ, వేరే అవకాశాలు లేక ఆర్థికంగా కూడా రజకులు వెనకబడిపోయారన్నారు. రాబోయే టీడీపీ- జనసేన- బీజేపీ ప్రభుత్వంలో రజకులకు సంబంధించి రజక కార్పొరేషన్ ద్వారా వారి సాంప్రదాయ వృత్తిని ప్రోత్సహిస్తూనే.. మరో పక్క వాళ్ల కుటుంబాలలో ఉన్న పిల్లలు చదువుకొని ఆధునిక వృత్తుల వైపు వెళ్లే విధంగా ప్రోత్సహిస్తామని ఆయన వెల్లడించారు. వార్డులో ఉన్న ప్రతి ఒక్కరు టిడిపికి ఓటు వేయండి తిరువూరు నియోజకవర్గాన్ని అభివృద్ధి చేసి చూపిస్తామన్నారు. అలాగే, తిరువూరు పట్టణంలో రజక బజార్లో వీళ్లకు కావాల్సిన ఒక మల్టీ పర్పస్ కమ్యూనిటీ హాలుతో పాటు వారికి అన్ని సౌకర్యాలతో కూడిన ఒక దోబి ఘాట్ ను రాబోయే రోజుల్లో ఏర్పాటు చేస్తామని టీడీపీ ఎమ్మెల్యే అభ్యర్థి కొలికపూడి శ్రీనివాసరావు వెల్లడించారు.