China: చైనాలో మళ్లీ మహమ్మారి వ్యాప్తి చెందుతుందా..? ఆసుపత్రుల్లో ఐసీయూ పడకలను పెంచాలని సిఫార్సు

చైనాతో పాటు ప్రపంచదేశాలను కరోనా మహమ్మారి హడలెత్తించిన సంగతి తెలిసిందే.. చైనాలో ఈ మహమ్మారి కారణంగా లక్షలాది మంది చనిపోయారు. అదే సమయంలో.. అంటువ్యాధి కారణంగా సంభవించే మరణాల నుండి చైనా గుణపాఠం నేర్చుకుంది. ఈ క్రమంలో.. దేశంలో ఐసియు పడకల సంఖ్యను పెంచాలని చైనాకు చెందిన అనేక ఏజెన్సీలు సోమవారం తెలిపాయి. 2025 నాటికి దేశంలో 100,000 మందికి 15 ఐసీయూ పడకలు, 2027 నాటికి 18 ఉండాలని ఏజెన్సీలు తమ ప్రతిపాదనలో పేర్కొన్నాయి.

చైనాలో ఐసీయూ బెడ్లు తక్కువగా ఉన్నాయి
ప్రజారోగ్య చర్యల్లో భాగంగా.. చైనా ఇటీవలి కాలంలో ఐసీయూ పడకల సంఖ్యను కొంతమేర పెంచింది. అయితే దేశ జనాభాను పరిగణనలోకి తీసుకుంటే ఈ విషయంలో చైనా విమర్శలు ఎదుర్కోవాల్సి వస్తుంది. దేశంలోని ఆరోగ్య వ్యవస్థ ఇప్పటికీ తక్కువ వనరులతో ఉందని చాలా మంది విమర్శకులు అంటున్నారు.

ఐసీయూ పడకల సంఖ్య పెంపుపై దృష్టి సారించారు
పలు చైనా ఏజెన్సీలు సోమవారం సంయుక్త ప్రకటన విడుదల చేశాయి. 2025 చివరి నాటికి దేశంలో 100,000 మందికి ఐసీయూ పడకల సంఖ్య 15, 2027 చివరి నాటికి 18 ఉండాలని ఏజెన్సీలు తన సిఫార్సులో పేర్కొన్నాయి. జాతీయ ఆరోగ్య కమీషన్‌తో సహా అనేక ఏజెన్సీలు కూడా తమ సిఫార్సులలో హాస్పిటల్ బెడ్‌ల సంఖ్యను పెంచాలని నొక్కిచెప్పాయి. 2025 నాటికి వేరియబుల్-కెపాసిటీ ICU పడకల సంఖ్య 100,000 మందికి 10, 2027 నాటికి 12కి చేరుకోవాలని ఏజెన్సీ పేర్కొంది.

ఈ విషయంలో అమెరికాకు చైనా చాలా దూరంగా ఉంది
షాంఘైలోని ఫుడాన్ స్కూల్ ఆఫ్ పబ్లిక్ హెల్త్ నుండి వచ్చిన డేటా ప్రకారం.. 2015లో అమెరికాలో 34.2తో పోలిస్తే, 2021లో 100,000 మందికి చైనాలో 4.37 ఐసీయూ పడకలు మాత్రమే ఉన్నాయి.