Virat Kohli: ప్రపంచ క్రికెట్‌లో విరాట్ కోహ్లీ సరికొత్త రికార్డు.. 146 ఏళ్ల క్రికెట్ చరిత్రలో ‘ఒకే ఒక్కడు’!

Virat Kohli Achieves a World Record in 146 Years: టీమిండియా మాజీ కెప్టెన్, ‘కింగ్’ విరాట్‌ కోహ్లీ సరికొత్త చరిత్ర సృష్టించాడు. వేర్వేరు క్యాలెండర్ ఇయర్‌లో అత్యధికసార్లు 2000 పరుగులు చేసిన తొలి బ్యాటర్‌గా కోహ్లీ నిలిచాడు. విరాట్ ఇప్పటివరకు ఏడు క్యాలెండర్ ఇయర్‌లలో 2000 కంటే ఎక్కువ పరుగులు చేశాడు. దక్షిణాఫ్రికాతో జరిగిన సెంచూరియన్‌ టెస్టు రెండో ఇన్నింగ్స్‌లో కోహ్లీ 76 పరుగులు చేసి ఈ ఘనతను అందుకున్నాడు. 146 ఏళ్లలో దిగ్గజాలకు సైతం సాధ్యం కాని ఘనతను కింగ్ సొంతం చేసుకున్నాడు.

విరాట్‌ కోహ్లీ గతంలో 2012 (2186 పరుగులు), 2014 (2286 పరుగులు), 2016 (2595 పరుగులు), 2017 (2818 పరుగులు), 2018 (2735 పరుగులు), 2019 (2455 పరుగులు)లలో2000 కంటే ఎక్కువ పరుగులు సాధించాడు. 1877లో తొలిసారిగా అంతర్జాతీయ క్రికెట్ ఆడినప్పటి నుంచి (అధికారిక రికార్డు ప్రకారం) మరే ఇతర ఆటగాడు ఈ ఫీట్ సాధించలేదు. శ్రీలంక ఆటగాడు కుమార సంగక్కర ఆరు క్యాలెండర్ ఇయర్‌లలో 2000 కంటే ఎక్కువ పరుగులు చేశాడు. మాస్టర్‌ బ్లాస్టర్‌ సచిన్ టెండూల్కర్, శ్రీలంక మాజీ కెప్టెన్ మహేల జయవర్ధనే 5 సార్లు ఈఘనత సాధించగా.. జాక్వెస్ కల్లిస్, రికీ పాంటింగ్, సౌరవ్ గంగూలీ, మాథ్యూ హేడెన్ 4 సార్లు ఈ ఫీట్‌ సాధించారు.

Also Read: ISRO: ఇంటెలిజెన్స్ సేకరణ కోసం వచ్చే ఐదేళ్లలో 50 ఉపగ్రహాలను ప్రయోగిస్తాం..

సెంచూరియన్‌ టెస్టు రెండో ఇన్నింగ్స్‌లో విరాట్ కోహ్లీ ఒంటరి పోరాటం చేశాడు. 82 బంతుల్లో 76 పరుగులు చేసిన కోహ్లీ.. పదో వికెట్‌గా పెవిలియన్ చేరాడు. విరాట్ ఇన్నింగ్స్‌లో 12 ఫోర్లు, ఒక సిక్సర్ ఉన్నాయి. మొదటి ఇన్నింగ్స్‌లో కీలక ఇన్నింగ్స్ ఆడిన విషయం తెలిసిందే. ఇక ఈ మ్యాచ్‌లో టీమిండియా ఇన్నింగ్స్ 32 పరుగుల తేడాతో ఘోర పరాజయం పాలైంది. చివరి టెస్ట్ సిరీస్ ఆడుతున్న డీన్ ఎల్గర్ ‘మ్యాన్ ఆఫ్ ది మ్యాచ్’గా నిలిచాడు. ఇక రెండో టెస్టు 2024 జనవరి 3న కేప్‌టౌన్‌లో ఆరంభమవుతుంది.