IMD Rain Forecast: వరుణుడు రైతులను కరుణిస్తాడా?.. రుతుపవనాలపై ఐఎమ్‌డీ తొలి అప్‌డేట్‌.. ఈఏడాది వర్షాలు ఎలా ఉంటాయంటే?

భారత్ వ్యవసాయాధారిత దేశం. ఎక్కువ మంది అగ్రికల్చర్ పైనే ఆధారపడి జీవిస్తుంటారు. వ్యవసాయానికి ప్రధానంగా కావాల్సింది నీరు. రైతులంతా వర్షాల కోసం ఎదురుచూస్తుంటారు. తొలకరి మొదలవ్వగానే వ్యవసాయ పనులను ప్రారంభిస్తుంటారు. అయితే ఇటీవలి కాలంలో వాతావరణంలో మార్పుల వల్ల వర్షాలు సమయానికి పడకపోవడంతో రైతులు తీవ్రంగా నష్టపోతున్నారు. ఈ నేపథ్యంలో భారత వాతావరణ శాఖ రుతుపవనాలపై తొలి అప్ డేట్ ఇచ్చింది. భారత వాతావరణ శాఖ (ఐఎమ్‌డి) ఈ ఏడాది రుతుపవనాలపై తన తొలి నివేదికను విడుదల చేసింది. ఇది రైతులు, సాధారణ ప్రజలలో ఆందోళనలను రేకెత్తిస్తోంది. భారత వాతావరణ శాఖ ప్రకారం, 2026 నైరుతి రుతుపవనాల సమయంలో దేశంలో సాధారణం కంటే తక్కువ వర్షపాతం నమోదయ్యే అవకాశం ఉందని తెలిపింది.

Also Read:Holidays: శుభవార్త చెప్పిన ఏపీ సర్కార్.. ఇక నుంచి వారి పుట్టిన రోజు, పెళ్లిరోజులకు కూడా సెలవులే..

వాతావరణ శాఖ డైరెక్టర్ జనరల్ డాక్టర్ ఎం. మహాపాత్ర మాట్లాడుతూ, ఈ ఏడాది మొత్తం వర్షపాతం సుమారు 92 శాతంగా ఉంటుందని అంచనా వేస్తున్నట్లు తెలిపారు. అయితే, ఇందులో 5 శాతం వరకు వ్యత్యాసాలు ఉండే అవకాశం ఉందని అన్నారు. పసిఫిక్ మహాసముద్రంలో ఏర్పడుతున్న ఎల్ నినో ఈ ఏడాది రుతుపవనాలకు భారీ ఆటంకం కలిగించవచ్చని వాతావరణ శాఖ స్పష్టం చేసింది. జూన్ నెలలో ఎల్ నినో ఏర్పడవచ్చని, ఇది రుతుపవనాల పురోగతిని నెమ్మదింపజేయవచ్చని నమూనాలు సూచిస్తున్నాయి.

మందకొడిగా సాగుతున్న రుతుపవనాల కారణంగా, ఢిల్లీ-ఎన్‌సిఆర్‌తో సహా ఉత్తర భారతదేశంలోని ప్రజలు ప్రస్తుతానికి తీవ్రమైన వేడిని భరించాల్సి ఉంటుంది. వచ్చే వారం నాటికి గరిష్ట ఉష్ణోగ్రతలు 38 నుండి 40 డిగ్రీల సెల్సియస్‌కు చేరుకోవచ్చు. రాబోయే రోజుల్లో ప్రజలు వడగాలులను ఎదుర్కొనే అవకాశం ఉన్నందున, ప్రత్యేక ఆరోగ్య సంరక్షణ తీసుకోవాలని సూచించారు.

ఎల్ నినో జూన్ నెలలో

ఐఎండి ప్రకారం, 1971 నుండి 2020 మధ్య సగటున 87 సెంటీమీటర్ల వర్షపాతం నమోదవ్వగా, జూన్ నుండి సెప్టెంబర్ మధ్య దేశంలో సుమారు 80 సెంటీమీటర్ల వర్షపాతం కురిసే అవకాశం ఉంది. అంటే ఈ ఏడాది వర్షపాతం సాధారణం కంటే కొద్దిగా తక్కువగా ఉంటుందని అంచనా. దీనికి ప్రధాన కారణం ఎల్ నినో పరిస్థితులే, ఇవి రుతుపవనాలను బలహీనపరచగలవు. వాతావరణ నమూనాల ప్రకారం, జూన్ నెలలో ఎల్ నినో ఏర్పడే అవకాశం ఉంది.

తక్కువ వర్షపాతం ఉంటుందనే అంచనాల మధ్య, ఒక సానుకూల అంశం ఏమిటంటే, జనవరి- మార్చి మధ్య ఉత్తరార్ధగోళంలో హిమపాతం సాధారణం కంటే తక్కువగా ఉంది, ఇది భారత రుతుపవనాలకు ఒక శుభసూచకంగా పరిగణిస్తున్నారు. అంతేకాకుండా, రుతుపవనాల రెండవ దశలో ఒక అనుకూలమైన హిందూ మహాసముద్ర ద్విధ్రువం (IOD) ఏర్పడుతుందని అంచనా వేశారు. హిందూ మహాసముద్రంలోని ఉష్ణోగ్రత మార్పుల వల్ల ఏర్పడే ఈ పరిస్థితి, ఎల్ నినో ప్రతికూల ప్రభావాలను తగ్గించి, భారతదేశంలో మంచి వర్షపాతానికి దోహదపడుతుందని అంచనా వేస్తున్నారు.

మే నెలాఖరులో ఈ రుతుపవనాల అంచనాను మళ్లీ అప్ డేట్ చేస్తామని వాతావరణ శాఖ తెలిపింది. అప్పటికి పరిస్థితి మరింత స్పష్టమవుతుంది. సాధారణ సగటు 87 సెంటీమీటర్లతో పోలిస్తే, ప్రస్తుతం జూన్ నుంచి సెప్టెంబర్ మధ్య దేశంలో సుమారు 80 సెంటీమీటర్ల వర్షపాతం కురుస్తుందని అంచనా వేస్తున్నారు.