Holidays: శుభవార్త చెప్పిన ఏపీ సర్కార్.. ఇక నుంచి వారి పుట్టిన రోజు, పెళ్లిరోజులకు కూడా సెలవులే..

ఆంధ్రప్రదేశ్ రాష్ట్ర పోలీసు శాఖలో పనిచేస్తున్న సిబ్బందికి ప్రభుత్వం , ఉన్నతాధికారులు తీపి కబురు అందించారు. పోలీసుల సంక్షేమం కోసం ఒక గొప్ప ముందడుగు వేస్తూ.. వారి వ్యక్తిగత జీవితానికి ప్రాధాన్యతనిచ్చేలా డీజీపీ (DGP) కార్యాలయం నుంచి తాజాగా ఒక అధికారిక ఉత్తర్వు వెలువడింది.

కుటుంబానికి ప్రాధాన్యత..

పోలీసు ఉద్యోగం అంటే ఎంతో బాధ్యతతో కూడుకున్నది. పండుగలు, పబ్బాలు అని తేడా లేకుండా వారు ప్రజల రక్షణ కోసం నిరంతరం శ్రమిస్తుంటారు. దీనివల్ల వారు తమ సొంత కుటుంబ సభ్యులతో సమయం గడపలేక పోతున్నారు. ఈ సమస్యను గుర్తించిన డీజీపీ.. పోలీసుల మనోధైర్యాన్ని పెంచేందుకు “వేడుక సెలవు” విధానాన్ని అమల్లోకి తెచ్చారు. ఇకపై ప్రతి పోలీస్ సిబ్బంది తమ పుట్టినరోజు , వివాహ వార్షికోత్సవం (పెళ్లి రోజు) రోజున సెలవు తీసుకోవచ్చు.

అందరికీ సమాన అవకాశం..

ఈ ఉత్తర్వుల ప్రకారం.. కానిస్టేబుల్ నుంచి ఉన్నతాధికారి వరకు అందరికీ ఈ సెలవు వర్తిస్తుంది. తమ జీవితంలో ఎంతో కీలకమైన ఈ రెండు రోజులను కుటుంబ సభ్యులతో సంతోషంగా గడపడం వల్ల.. వారిలో ఒత్తిడి తగ్గి, పని పట్ల మరింత ఉత్సాహం కలుగుతుందని అధికారులు ఆశిస్తున్నారు.

Also Read:Holidays: శుభవార్త చెప్పిన ఏపీ సర్కార్.. ఇక నుంచి వారి పుట్టిన రోజు, పెళ్లిరోజులకు కూడా సెలవులే..

అధికారులకు ఆదేశాలు..

ఏవైనా అత్యవసర పరిస్థితులు (ఉదాహరణకు శాంతిభద్రతల సమస్యలు లేదా పెద్ద ప్రమాదాలు) ఉంటే తప్ప, మిగిలిన సమయాల్లో సిబ్బంది ఈ సెలవు అడిగినప్పుడు యూనిట్ అధికారులు ఖచ్చితంగా మంజూరు చేయాలని డీజీపీ స్పష్టం చేశారు. ఈ ఉత్తర్వుల పట్ల ఏపీ పోలీసు సిబ్బంది హర్షం వ్యక్తం చేస్తున్నారు. నిరంతరం డ్యూటీలో ఉండే తమకు, ఏటా ఈ రెండు రోజులు కుటుంబంతో గడిపే అవకాశం దక్కడం పెద్ద ఊరటనిస్తుందని వారు భావిస్తున్నారు.