Falcon : హైదరాబాద్‌లో వెలుగు చూసిన మరో భారీ స్కామ్‌

Falcon : హైదరాబాద్ నగరాన్ని కుదిపేసే విధంగా మరో భారీ స్కామ్ వెలుగుచూసింది. ఫాల్కన్ ఇన్వాయిస్ డిస్కౌంటింగ్ పేరిట కోట్లాది రూపాయలు మోసానికి పాల్పడిన ఫాల్కన్ క్యాపిటల్ ప్రొటెక్షన్ ఫోర్స్ డైరెక్టర్ కావ్య నల్లూరి, ఫాల్కన్ సంస్థ వైస్ ప్రెసిడెంట్ పవన్ కుమార్ ఓదెలును సైబరాబాద్ ఆర్థిక నేర విభాగం పోలీసులు అరెస్టు చేశారు.

ఫాల్కన్ సంస్థ చిన్న తరహా పెట్టుబడుల పేరుతో నిరుద్యోగులు, వ్యాపారులు, ఉద్యోగస్తులను ఆకర్షించి దేశవ్యాప్తంగా వేలాదిమందిని మోసం చేసింది. ప్రముఖ సంస్థలు బ్రిటానియా, అమెజాన్, గోద్రెజ్ లాంటి కంపెనీల్లో పెట్టుబడులు పెడతామంటూ పెద్ద ఎత్తున విరాళాలు సేకరించింది. ఈ స్కామ్ ద్వారా మొత్తం 6,979 మంది ఇన్వెస్టర్ల నుంచి దాదాపు రూ.1,700 కోట్లు వసూలు చేసినట్లు పోలీసులు వెల్లడించారు.

ఈ మోసంలో హైదరాబాద్ ప్రత్యేకంగా కీలక కేంద్రంగా మారింది. నగరంలోని పెద్ద ఎత్తున ఇన్వెస్టర్లు ఆకర్షితులై, రూ. 850 కోట్లు తమ పొదుపు డబ్బును ఫాల్కన్ సంస్థకు అందించారు. ఇలాంటి భారీ మొత్తాన్ని ప్రజల నుంచి వసూలు చేసి, పెట్టుబడుల పేరుతో డబ్బును తిప్పి పెట్టినట్లు విచారణలో తేలింది.

ఇవే కాకుండా, ఈ సంస్థ క్రిప్టో కరెన్సీ, కాయిన్ ట్రేడ్ లాంటి అధ్వాన్న వ్యాపారాల పేరుతో ప్రజలను మభ్యపెట్టింది. ఫాల్కన్ సంస్థకు అనుబంధంగా 14 షెల్ కంపెనీలను ఏర్పాటు చేసి, అందులోనే కోట్లాది రూపాయలు బదిలీ చేసినట్లు పోలీసులు గుర్తించారు.

ఈ కంపెనీల్లో కొన్నింటి పేర్లు ఇలా ఉన్నాయి:

• బ్లూ లైఫ్ ఇంటర్నేషనల్
• ఇండియా ఓకే రిసార్ట్స్
• ప్రిస్టేజ్
• ఫాల్కన్ ఇంటర్నేషనల్
• ఆర్డీబీ
• ఎంబీఆర్ దుబాయ్
• కాపిటల్ టెక్సోల్
• గోపాల్
• ఒజాస్
• లోక్ వెల్ఫేర్
• స్వస్తిక్

ఈ సంస్థలు అసలు వ్యాపారం నడిపేవి కాకుండా, ఫాల్కన్ సంస్థ ద్వారా వసూలైన నిధులను వీటికి బదిలీ చేసి, ట్రాన్సాక్షన్లను గుర్తుపట్టకుండా చేయడం కోసం ఉపయోగించాయి. ఫాల్కన్ సంస్థ పై విచారణ ఉధృతం కావడంతో, గత నెల 15న కంపెనీ బోర్డు సభ్యులు సంస్థను వదిలేసి తప్పించుకునే ప్రయత్నం చేశారు. దీనిపై సైబరాబాద్ పోలీసులు ప్రత్యేక దర్యాప్తు చేపట్టి, అనుమానాస్పద లావాదేవీలను గుర్తించి నిందితులను అరెస్టు చేశారు. ఈ కేసు నేపథ్యంలో, ఇలాంటి పెట్టుబడి ప్రణాళికల పేరుతో వచ్చే సంస్థలపై ప్రజలు పూర్తిగా అప్రమత్తంగా ఉండాలని పోలీసులు హెచ్చరించారు. సులభంగా డబ్బు రెట్టింపు చేస్తామంటూ వచ్చే ఆఫర్లను నమ్మి ఇన్వెస్ట్ చేయకుండా, ముందుగా సంస్థల బ్యాక్‌గ్రౌండ్ చెక్ చేసుకోవాలని సూచించారు. ఈ మోసంలో మరెన్ని సంచలన నిజాలు వెలుగు చూడబోతున్నట్లు పోలీసులు వెల్లడించారు.