Crime News: ప్రకాశంలో దారుణం.. ఇన్సూరెన్స్ డబ్బు కోసం సొంత చెల్లెలిని చంపిన అన్న!

డబ్బు.. మనిషిలోని మానవత్వాన్ని కూడా చంపేస్తోంది. పైసల కోసం సొంత వ్యక్తులను కూడా కడతేర్చుతున్నారు. గతంలో రైతుబీమా డబ్బు కోసం కన్న తల్లిని కొడుకు కడతేర్చిన ఘటన తెలంగాణలోని మెదక్ జిల్లాలో చోటుచేసుకుంది. తాజాగా ప్రకాశం జిల్లాలో ఓ అన్న ఇన్సూరెన్స్ డబ్బు కోసం సొంత చెల్లినే చంపేశాడు. యాక్సిడెంట్ అని నమ్మించే ప్రయత్నం చేసి.. పోలీసులకు దొరికిపోయాడు. అయితే ఈ ఘటన గతేడాది ఫిబ్రవరిలో జరగ్గా.. చాలా ఆలస్యంగా పోలీసులు నిందితుడిని పట్టుకున్నారు.

వివరాల్లోకి వెళితే… కాటూరివారిపాలెంకు చెందిన అశోక్ రెడ్డి, సంధ్యలు అన్నా చెల్లెళ్లు. అశోక్ రెడ్డి రియల్ ఎస్టేట్ వ్యాపారం చేసి.. అప్పుల పాలయ్యాడు. సంధ్యకు పెళ్లయినప్పటికీ.. అనారోగ్య కారణాలతో భర్త నుంచి విడాకులు తీసుకుని అన్న అశోక్ రెడ్డి ఇంట్లోనే ఉంటోంది. తీవ్ర ఆర్థిక ఇబ్బందుల్లో ఉన్న అశోక్ రెడ్డి.. పక్కా ప్లాన్‌తో చెల్లెలి పేరిట ఇన్సూరెన్స్ తీసుకున్నాడు. చెల్లెలు ప్రమాదంలో చనిపోతే.. ఆ డబ్బంతా తనకు వస్తుందని పథకం రచించాడు. ఈ క్రమంలో ఇన్సూరెన్స్ డబ్బులు చెల్లిస్తూ వచ్చాడు.

పక్కా ప్లాన్ ప్రకారం.. గతేడాది ఫిబ్రవరి 2న చెల్లెలు సంధ్యను అశోక్ రెడ్డి హత్య చేశాడు. అనంతరం యాక్సిడెంట్‌లో చనిపోయిందని చెప్పాడు. చెల్లెలిని ఇంటికే తీసుకువస్తుండగా కారు చెట్టుకు ఢీకొట్టిందని, ప్రమాదంలో ఆమె చనిపోయిందని అందరికీ చెప్పాడు. పలు కేసులను రీఓపెన్ చేసే సమయంలో స్థానిక పోలీసు అధికారికి ఈ కేసులో అనుమానం కలిగింది. మరలా దర్యాప్తు చేయగా అశోక్ రెడ్డి పన్నాగం బయటపడింది. ప్రకాశం జిల్లా పోలీసులు నిందితుడ్ని అరెస్ట్ చేశారు.