AP Municipal Elections : ఏపీలో మున్సిపల్ ఎన్నికల ప్రక్రియకు తాత్కాలిక బ్రేక్.. SEC కీలక ఉత్తర్వులు..

ఆంధ్రప్రదేశ్‌లోని 100 పట్టణ స్థానిక సంస్థలకు సంబంధించి ప్రస్తుతం కొనసాగుతున్న ఎన్నికల ప్రక్రియను నిలిపివేస్తూ రాష్ట్ర ఎన్నికల సంఘం (SEC) కీలక ఉత్తర్వులు జారీ చేసింది. అత్యున్నత నాయస్థానం సుప్రీంకోర్టు ఇచ్చిన ఆదేశాల మేరకు ఈ నిర్ణయం తీసుకున్నారు. ఇందులో భాగంగా రాష్ట్రంలోని 13 మున్సిపల్ కార్పొరేషన్లు, 87 మున్సిపాలిటీల్లో ముమ్మరంగా సాగుతున్న ఎన్నికల సరళి తాత్కాలికంగా ఆగిపోయింది. పోటీలో ఉన్న అభ్యర్థుల తుది జాబితా ప్రచురణను ఈ నెల 25వ తేదీ వరకు వాయిదా వేయాలని సుప్రీంకోర్టు స్పష్టమైన మార్గదర్శకాలను జారీ చేసింది.

ఎన్నికల సమయంలో కొన్ని ప్రాంతాల్లో తలెత్తిన శాంతిభద్రతల సమస్యలు, అవాంఛనీయ సంఘటనల కారణాల వల్ల అనేకమంది అభ్యర్థులు నామినేషన్లు వేయలేకపోయారనే వినతులు రావడం ఈ పరిణామానికి ప్రధాన కారణమైంది. నామినేషన్లు సమర్పించలేకపోయిన అభ్యర్థులు అందించిన ఆధారాలు, వినతులను రాష్ట్ర ఎన్నికల సంఘం క్షుణ్ణంగా పరిశీలించనుంది. క్షేత్రస్థాయిలోని వాస్తవ పరిస్థితులను అంచనా వేసేందుకు సంబంధిత జిల్లాల కలెక్టర్లు, జిల్లా ఎన్నికల అధికారులు , పోలీస్ ఉన్నతాధికారులు అందించే సమగ్ర నివేదికల ఆధారంగా ఎన్నికల కమిషన్ నిర్ణయం తీసుకోనుంది.

ఒకవేళ నామినేషన్ల దాఖలుకు అదనపు గడువు పొడిగించాల్సి వస్తే, ఆయా అభ్యర్థులకు కనీసం 48 గంటల వ్యవధి సమయం తప్పనిసరిగా ఇవ్వాలని సుప్రీంకోర్టు ఆదేశించింది. ఈ నేపథ్యంలో, పరిస్థితులకు అనుగుణంగా ఎన్నికల నోటిఫికేషన్‌ను సవరించి గడువును పొడిగించాల్సిన అవసరం ఏర్పడితే, దానికి తగిన చర్యలు తీసుకోవడానికి రాష్ట్ర ఎన్నికల సంఘం సిద్ధమవుతోంది. సుప్రీంకోర్టు జోక్యంతో ఎన్నికల సంఘం తీసుకున్న ఈ నిర్ణయం రాష్ట్ర రాజకీయాల్లో ప్రాధాన్యత సంతరించుకుంది.