AP Mayor Seats: నేడు సీఎం చంద్రబాబు నివాసంలో కీలక భేటీ.. మేయర్ పీఠాలపై కూటమి కసరత్తు!

AP Mayor Seats Meeting: ఆంధ్రప్రదేశ్‌లో మున్సిపల్ ఎన్నికలకు సంబంధించి మేయర్, మున్సిపల్ చైర్‌పర్సన్‌ పదవుల కేటాయింపుపై కూటమి పార్టీల మధ్య చర్చలు ముమ్మరమయ్యాయి. ఈ నేపథ్యంలో ఈరోజు సాయంత్రం ఉండవల్లిలోని సీఎం చంద్రబాబు నివాసంలో కూటమి పార్టీల కీలక సమావేశం జరగనుంది. టీడీపీ అధినేత చంద్రబాబుతో పాటు జనసేన అధ్యక్షుడు పవన్ కల్యాణ్, బీజేపీ రాష్ట్ర అధ్యక్షుడు మాధవ్ ఈ భేటీలో పాల్గొననున్నారు.

కూటమి పార్టీల సమావేశంలో రాష్ట్రంలోని 17 నగరపాలక సంస్థల మేయర్‌ స్థానాల్లో ఏ పార్టీ ఎన్ని చోట్ల పోటీ చేయాలి?, ఏయే కార్పొరేషన్లను ఏ పార్టీకి కేటాయించాలి? అనే అంశాలపై ప్రధానంగా చర్చించనునున్నారు. కూటమిలోని మూడు పార్టీల మధ్య సీట్ల సర్దుబాటుపై ఒక అవగాహనకు రావడమే ఈ సమావేశం ప్రధాన లక్ష్యం. మేయర్‌ స్థానాల కేటాయింపులో విజయవాడ కార్పొరేషన్‌ కీలకంగా మారినట్లు సమాచారం. విజయవాడతో పాటు మచిలీపట్నం, కాకినాడ కార్పొరేషన్లలోనూ పోటీ చేసే అవకాశం కల్పించాలని జనసేన పట్టుబడుతున్నట్లు తెలుస్తోంది. ఈ మూడు స్థానాలపై కూటమి నేతల మధ్య ప్రత్యేకంగా చర్చ జరిగే అవకాశం ఉంది. ఇతర కార్పొరేషన్లలోనూ పార్టీ బలాబలాలు, స్థానిక పరిస్థితులు, గెలుపు అవకాశాలను పరిగణనలోకి తీసుకుని సీట్ల సర్దుబాటుపై నిర్ణయం తీసుకోనున్నారు.

కేవలం నగరపాలక సంస్థల మేయర్‌ స్థానాలకే కాకుండా రాష్ట్రంలోని మున్సిపాలిటీల్లో చైర్‌పర్సన్‌ పదవులు, వార్డు స్థాయి పోటీకి సంబంధించిన సర్దుబాటుపైనా మూడు పార్టీల నేతలు చర్చించనున్నట్లు తెలుస్తోంది. ఏ పార్టీ ఎక్కడ పోటీ చేయాలనే అంశంపై స్పష్టత తీసుకురావడంతో పాటు స్థానిక నాయకుల అభిప్రాయాలను కూడా పరిగణనలోకి తీసుకునే అవకాశం ఉంది. నేటి సమావేశం ఏపీ మున్సిపల్ ఎన్నికల్లో కూటమి పార్టీల సీట్ల పంపకాలపై కీలకంగా మారనుంది. ముఖ్యంగా విజయవాడ, మచిలీపట్నం కార్పొరేషన్ల విషయంలో ఎలాంటి నిర్ణయం తీసుకుంటారు?, మిగతా మేయర్‌ స్థానాలు, మున్సిపాలిటీలను మూడు పార్టీల మధ్య ఎలా సర్దుబాటు చేస్తారు? అన్న అంశాలపై ఆసక్తి నెలకొంది.