West Bengal : బట్టీ కార్మికులపై పడిన చిమ్నీ.. ముగ్గురి మృతి.. 30మందికి గాయాలు
West Bengal : పశ్చిమ బెంగాల్లో 24 పరగణాల్లోని ఇటుక బట్టీలోని చిమ్నీ ఒక్కసారిగా కుప్పకూలింది. ఈ ప్రమాదంలో బట్టీలో పనిచేస్తున్న ముగ్గురు కూలీలు మృతి చెందారు. 30 మందికి పైగా కార్మికులు గాయపడ్డారు. గాయపడిన వారందరినీ ఆసుపత్రికి తరలించారు. సమాచారం అందుకున్న పోలీసులు సంఘటనా స్థలానికి చేరుకుని మృతదేహాలను పోస్టుమార్టం నిమిత్తం తరలించారు. ప్రమాదానికి గల కారణాలు ఇంకా తెలియరాలేదని కేసు దర్యాప్తు చేస్తున్న పోలీసులు తెలిపారు. ఈ ఘటన 24 పరగణాస్లోని బసిర్హత్లోని ధాల్టితా గ్రామంలో చోటుచేసుకుంది.
Read Also:SP Jagadish: రౌడీ మూకలకు ఎస్పీ స్ట్రాంగ్ వార్నింగ్.
పోలీసులు తెలిపిన వివరాల ప్రకారం.. బుధవారం ఇక్కడి ఇటుక బట్టీలో యథావిధిగా పనులు జరుగుతున్నాయి. ఇక్కడ 60 మందికి పైగా కూలీలు పనులు చేసుకుంటున్నారు. ఇంతలో ప్రధాన చిమ్నీ దిగువ నుండి విరిగిపోయి ఒక వైపు ఒరిగిపోయింది. ఈ చిమ్నీని చూసిన కార్మికులు అక్కడి నుంచి వెళ్లే ప్రయత్నంలోనే చిమ్నీ కార్మికులపై పడింది. ఈ చిమ్నీ వల్ల మొత్తం 33 మంది కూలీలు ప్రభావితమయ్యారు. వీరిలో ఇద్దరు కూలీలు అక్కడికక్కడే మృతి చెందగా, గాయపడిన 31 మంది కూలీలను ఆస్పత్రికి తరలించారు.
Read Also:Prabhas Rajamouli: ఈ పాన్ ఇండియా కలయిక ఎన్నాళ్లకో…
ఆస్పత్రిలో చికిత్స పొందుతూ ఓ కార్మికుడు మృతి చెందినట్లు పోలీసులు తెలిపారు. మిగిలిన 30 మంది కూలీలకు చికిత్స అందిస్తున్నారు. గాయపడిన వారిలో డజనుకు పైగా కూలీల పరిస్థితి విషమంగా ఉందని వైద్యులు తెలిపారు. ఈ ఘటనకు సంబంధించి బట్టీ యజమానిపై హత్యాయత్నం, నిర్లక్ష్యం సెక్షన్ల కింద కేసు నమోదు చేసినట్లు పోలీసులు తెలిపారు. పోలీసులు కేసు దర్యాప్తు చేస్తున్నారు. చిమ్నీ కూలిన ఘటనపై కూడా విచారణ జరుపుతున్నట్లు పోలీసులు తెలిపారు. అయితే, ఖచ్చితమైన కారణాలు వెలువడలేదు.