నేటి నుంచి FIFA World Cup షురూ.. ఆటలో కొత్త నియమాలు ఇవే.!

FIFA World Cup: ఫుట్‌బాల్ అభిమానులు ఎంతో ఆసక్తిగా ఎదురుచూస్తున్న 2026 ఫిఫా వరల్డ్ కప్ నేటి నుంచి అమెరికా, మెక్సికో, కెనడా దేశాల్లో మొదలు కానుంది. ఈ మెగా టోర్నీకి ముందు ఆటను మరింత పారదర్శకంగా, క్రమశిక్షణతో నిర్వహించేందుకు ఇంటర్నేషనల్ ఫుట్‌బాల్ అసోసియేషన్ బోర్డు (IFAB) పలు కీలక నియమాలను అమల్లోకి తీసుక రానుంది. ఆటగాళ్ల ప్రవర్తన, ప్రత్యామ్నాయ ఆటగాళ్ల మార్పులు, VAR వినియోగం, సమయాన్ని వృథా చేయడం వంటి అంశాల్లో ఈ కొత్త మార్పులు చోటుచేసుకున్నాయి.

కొత్త నిబంధనల ప్రకారం..

నోరు మూసుకోవడం:

మైదానంలో ప్రత్యర్థి ఆటగాడితో వాగ్వాదానికి దిగిన సమయంలో ఆటగాడు తన నోరును చేతితో, చేతి భాగంతో లేదా జెర్సీతో కప్పుకుంటే రెఫరీ నేరుగా రెడ్ కార్డు చూపించే అవకాశం ఉంటుంది. ఆటలో పారదర్శకత పెంచడం, ఆటగాళ్లు ఏమి మాట్లాడుతున్నారో దాచిపెట్టే ప్రయత్నాలను అరికట్టడం ఈ నిర్ణయం వెనుక ప్రధాన ఉద్దేశంగా ఫిఫా పేర్కొంది.

కొత్త ప్రత్యామ్నాయం:

సబ్‌స్టిట్యూషన్ నిబంధనల్లో కూడా కీలక మార్పులు జరిగాయి. మార్పిడి చేయబడే ఆటగాడు 10 సెకన్లలోపు మైదానాన్ని విడిచి వెళ్లాలి. అలాగే తనకు దగ్గరలో ఉన్న ఎగ్జిట్ పాయింట్ ద్వారానే బయటకు వెళ్లాల్సి ఉంటుంది. ఒకవేళ ఆటగాడు కావాలనే ఆలస్యం చేస్తే, అతని స్థానంలో వచ్చే ఆటగాడిని వెంటనే మైదానంలోకి అనుమతించరు. తదుపరి ఆట నిలిచే వరకు ఆ జట్టు ఒక ఆటగాడు తక్కువగా ఆడాల్సి ఉంటుంది.

సమయం వృధా :

సమయాన్ని వృధా చేసే చర్యలపై కూడా ఫిఫా కఠిన వైఖరి అవలంబించింది. త్రో-ఇన్‌లు, కార్నర్ కిక్‌ల సమయంలో ఆటగాళ్లు కావాలనే ఆలస్యం చేస్తున్నట్లు రెఫరీ భావిస్తే ఐదు సెకన్ల కౌంట్‌డౌన్ ప్రారంభిస్తారు. నిర్ణీత సమయంలో ఆటను పునఃప్రారంభించకపోతే బంతి స్వాధీనం ప్రత్యర్థి జట్టుకు ఇవ్వబడుతుంది.

పరిస్థితులను VAR సమీక్ష:

వీడియో అసిస్టెంట్ రెఫరీ (VAR) పాత్రను కూడా మరింతగా పెంచారు. తప్పుగా కార్నర్ కిక్ ఇచ్చిన సందర్భాలు, ఆట పునఃప్రారంభానికి ముందు జరిగిన అటాకింగ్ ఫౌల్స్, స్పష్టంగా తప్పుగా చూపిన రెండో ఎల్లో కార్డులు, పొరపాటున తప్పు ఆటగాడిని శిక్షించిన సందర్భాల్లో VAR జోక్యం చేసుకునే అధికారం కల్పించారు. దీంతో మ్యాచ్‌ లలో జరిగే స్పష్టమైన తప్పిదాలను తగ్గించాలని ఫిఫా లక్ష్యంగా పెట్టుకుంది.

చికిత్స తర్వాత ఒక నిమిషం నిరీక్షణ:

మైదానంలో గాయపడి చికిత్స పొందిన అవుట్‌ఫీల్డ్ ఆటగాళ్లు కనీసం ఒక నిమిషం పాటు మైదానం బయటే ఉండాల్సి ఉంటుంది. అయితే గోల్‌ కీపర్లు, ఓక్రిఒకరు ఢీ కొట్టిన గాయపడిన ఆటగాళ్లు లేదా తీవ్రమైన గాయాల బారిన పడిన వారికి ఈ నిబంధన వర్తించదు.

నిరసనలకు కఠిన శిక్ష:

రెఫరీ నిర్ణయాలకు వ్యతిరేకంగా నిరసనలు వ్యక్తం చేసే ఆటగాళ్లు, కోచ్‌లపై కూడా కఠిన చర్యలు తీసుకోనున్నారు. రెఫరీ నిర్ణయాన్ని నిరసిస్తూ ఆటగాడు మైదానం విడిచి వెళ్లినా, అలాంటి చర్యలను ప్రోత్సహించిన కోచ్ అయినా రెడ్ కార్డు ఎదుర్కోవాల్సి ఉంటుంది. నిరసనల కారణంగా మ్యాచ్ రద్దయితే సంబంధిత జట్టు మ్యాచ్‌ను ఫోర్‌ఫీట్ చేసే పరిస్థితి కూడా ఏర్పడవచ్చు.

హైడ్రేషన్ విరామాలు:

అధిక ఉష్ణోగ్రతలు నమోదయ్యే వేదికలను దృష్టిలో ఉంచుకుని ప్రతి అర్ధభాగంలో హైడ్రేషన్ బ్రేక్‌ లను కూడా ప్రవేశపెట్టారు. దీని ద్వారా ఆటగాళ్లు నీరు తాగి శరీరాన్ని చల్లబరుచుకునే అవకాశం ఉంటుంది.

The new laws of the game which are set to debut at @FIFAWorldCup 2026 ⚽️ pic.twitter.com/cFKgQzKQrl

— FIFA (@FIFAcom) June 9, 2026