MK Stalin: తిరుచ్చి ఈస్ట్ ఉపఎన్నికపై రాజకీయ ఉత్కంఠ.. స్టాలిన్ బరిలోకి దిగుతారా? డీఎంకేలో పెరుగుతున్న డిమాండ్

తమిళనాడు రాజకీయాల్లో తిరుచ్చి ఈస్ట్ అసెంబ్లీ ఉపఎన్నికపై ఉత్కంఠ నెలకొంది. డీఎంకే అధ్యక్షుడు, మాజీ ముఖ్యమంత్రి ఎం.కే. స్టాలిన్ ఈ స్థానం నుంచి పోటీ చేయాలని పార్టీ శ్రేణుల నుంచి ఒత్తిడి పెరుగుతోంది. అయితే, దీనిపై ఇప్పటివరకు పార్టీ అధిష్ఠానం ఎలాంటి అధికారిక ప్రకటన చేయలేదు. ఇటీవల జరిగిన తమిళనాడు అసెంబ్లీ ఎన్నికల్లో స్టాలిన్ చెన్నైలోని కొలత్తూరు నియోజకవర్గం నుంచి పోటీ చేసి ఓటమి పాలయ్యారు. దీంతో ప్రస్తుతం ఆయన అసెంబ్లీ వెలుపలే ఉన్నారు. ఈ నేపథ్యంలో ఆయన తిరిగి శాసనసభలో అడుగుపెట్టాల్సిన అవసరం ఉందని డీఎంకే వర్గాలు భావిస్తున్నాయి.

తిరుచ్చి ఈస్ట్ ఎందుకు ఖాళీ అయింది?

తమిళనాడు ముఖ్యమంత్రి విజయ్ అసెంబ్లీ ఎన్నికల్లో పెరంబూర్, తిరుచ్చి ఈస్ట్ అనే రెండు నియోజకవర్గాల నుంచి విజయం సాధించారు. రాజ్యాంగ నిబంధనల ప్రకారం ఒక స్థానాన్ని మాత్రమే కొనసాగించాల్సి ఉండటంతో ఆయన పెరంబూర్ స్థానాన్ని కొనసాగిస్తూ తిరుచ్చి ఈస్ట్ ఎమ్మెల్యే పదవికి రాజీనామా చేశారు. దీంతో ఈ స్థానానికి ఉపఎన్నిక జరగనుంది.

స్టాలిన్‌ను బరిలోకి దించాలని తీర్మానం

తిరుచ్చి దక్షిణ జిల్లా డీఎంకే కార్యవర్గం ఇప్పటికే ప్రత్యేక తీర్మానం చేసి, తిరుచ్చి ఈస్ట్ ఉపఎన్నికలో స్టాలిన్‌ను పోటీ చేయించాలని పార్టీ నాయకత్వాన్ని కోరింది. ఈ ప్రతిపాదనకు మాజీ మంత్రులు కే.ఎన్. నెహ్రూ, అన్బిల్ మహేష్ పొయ్యామొళి వంటి నేతలు కూడా మద్దతు తెలుపుతున్నట్లు సమాచారం.

‘స్టాలిన్ త్వరలోనే అసెంబ్లీలోకి వస్తారు’

మాజీ మంత్రి, తిరుచ్చి వెస్ట్ ఎమ్మెల్యే కే.ఎన్. నెహ్రూ ఇటీవల మాట్లాడుతూ, స్టాలిన్ త్వరలోనే తమిళనాడు అసెంబ్లీలోకి తిరిగి వస్తారని వ్యాఖ్యానించారు. అయితే ఆయన ఏ నియోజకవర్గం నుంచి పోటీ చేస్తారనే విషయాన్ని మాత్రం వెల్లడించలేదు.

అధికారిక ప్రకటన కోసం ఎదురుచూపు

ప్రస్తుతం తిరుచ్చి ఈస్ట్ ఉపఎన్నికకు సంబంధించి డీఎంకే అభ్యర్థిని పార్టీ ప్రకటించలేదు. స్టాలిన్ స్వయంగా బరిలోకి దిగుతారా? లేక మరో నేతకు అవకాశం ఇస్తారా? అనే అంశంపై రాజకీయ వర్గాల్లో చర్చ కొనసాగుతోంది. పార్టీ అధిష్ఠానం తీసుకునే నిర్ణయంపై అందరి దృష్టి నెలకొంది.