Rahul Gandhi: రాహుల్ గాంధీ ప్రయాణిస్తున్న విమానానికి గో-అరౌండ్.. రెండో ప్రయత్నంలో సేఫ్ ల్యాండింగ్!

లోక్‌సభ ప్రతిపక్ష నేత రాహుల్ గాంధీ ప్రయాణిస్తున్న ఎయిర్ ఇండియా విమానం లక్నో విమానాశ్రయంలో ల్యాండింగ్‌కు కొద్దిసేపటి ముందు గో-అరౌండ్ చేసింది. మంగళవారం ఈ ఘటన చోటుచేసుకున్నట్లు జాతీయ మీడియాలో కథనాలు వస్తున్నాయి. అయితే రెండో ప్రయత్నంలో విమానం సురక్షితంగా ల్యాండ్ అయింది.

ల్యాండింగ్‌కు ముందు ఏం జరిగింది?

AI-1717 విమానం ఢిల్లీ నుంచి లక్నోకు బయలుదేరింది. లక్నోలోని చౌదరి చరణ్ సింగ్ అంతర్జాతీయ విమానాశ్రయంలో ల్యాండ్ అయ్యేందుకు పైలట్ తొలుత ప్రయత్నించారు. అయితే విమానం రన్‌వేకు సమీపానికి వచ్చిన తర్వాత ఆ ల్యాండింగ్ ప్రయత్నాన్ని విరమించుకున్నారు. దీంతో విమానం మళ్లీ సురక్షితమైన ఎత్తుకు చేరుకునేలా పైలట్ చర్యలు చేపట్టారు. అనంతరం మరోసారి ల్యాండింగ్ కోసం విమానాన్ని తీసుకువచ్చి రెండో ప్రయత్నంలో సురక్షితంగా ల్యాండ్ చేశారు. ఈ విమానంలో రాహుల్ గాంధీ ప్రయాణిస్తున్నారు.

మధ్యాహ్నం ఢిల్లీ నుంచి బయలుదేరిన విమానం

AI-1717 విమానం మంగళవారం మధ్యాహ్నం సుమారు 2:20 గంటలకు ఢిల్లీ నుంచి బయలుదేరింది. సుమారు 3:30 గంటలకు లక్నో చేరుకోవాల్సి ఉంది. ల్యాండింగ్‌కు ముందు గో-అరౌండ్ చేసినప్పటికీ.. రెండో ప్రయత్నంలో విమానం ఎలాంటి ఇబ్బంది లేకుండా లక్నో విమానాశ్రయంలో దిగింది.

గో-అరౌండ్ అంటే ఏమిటి?

విమానం ల్యాండింగ్ ప్రక్రియలో ఉన్నప్పుడు పైలట్ ఆ ప్రయత్నాన్ని నిలిపివేసి.. మళ్లీ సురక్షితమైన ఎత్తుకు విమానాన్ని తీసుకెళ్లి, ఆ తర్వాత మరోసారి ల్యాండింగ్‌కు ప్రయత్నించడాన్ని ‘గో-అరౌండ్’ అంటారు. ఇది విమానయాన రంగంలో సాధారణంగా అనుసరించే భద్రతా విధానమే. రన్‌వే పరిస్థితులు, వాతావరణం, విమానాల రాకపోకలు లేదా ల్యాండింగ్‌కు అనువైన పరిస్థితులు లేకపోవడం వంటి పలు కారణాలతో పైలట్లు గో-అరౌండ్ చేయవచ్చు. ఈ ఘటనలోనూ తొలి ల్యాండింగ్ ప్రయత్నాన్ని విరమించుకున్న తర్వాత విమానం తిరిగి మరోసారి ల్యాండింగ్‌కు వచ్చి సురక్షితంగా ల్యాండ్ అయింది.