PM Modi: మోడీకి ప్రపంచ నాయకులు బర్త్‌డే విషెస్.. ట్రంప్, పుతిన్ శుభాకాంక్షలు

ప్రధాని మోడీ ఈరోజు 76వ పుట్టినరోజు జరుపుకుంటున్నారు. మోడీ కోసం దేశ వ్యాప్తంగా కార్యకర్తలు, అభిమానులు, నాయకులు ప్రత్యేక పూజలు చేస్తున్నారు. ఇక ప్రపంచ నాయకులు కూడా బర్త్‌డే విషెస్ చెప్పారు. రష్యా అధ్యక్షుడు వ్లాదిమిర్ పుతిన్, అమెరికా అధ్యక్షుడు డొనాల్డ్ ట్రంప్‌తో పాటు మాజీ ఆస్ట్రేలియా ప్రధాని స్కాట్ మోరిసన్ మోడీకి జన్మదిన శుభాకాంక్షలు చెప్పారు. ఈ సందర్భంగా భారత్-రష్యా వ్యూహాత్మక భాగస్వామ్యాన్ని బలోపేతం చేయడంలో మోడీ పాత్రను పుతిన్ ప్రశంసించారు.

పుతిన్ ప్రశంసలు

రష్యా రాయబార కార్యాలయం భారత్‌లో పుతిన్ పంపిన జన్మదిన సందేశాన్ని సోషల్ మీడియా వేదికగా వెల్లడించింది. భారత్‌లో మోడీకి ఉన్న ప్రజాదరణ, అంతర్జాతీయ వేదికపై ఆయనకు ఉన్న గౌరవాన్ని పుతిన్ ప్రస్తావించారు. భారత్-రష్యా మధ్య ప్రత్యేక, వ్యూహాత్మక భాగస్వామ్యాన్ని మరింత బలోపేతం చేయడంలో మోడీ వ్యక్తిగతంగా కీలక పాత్ర పోషిస్తున్నారని పుతిన్ పేర్కొన్నారు. ఇటీవల న్యూఢిల్లీలో తన పర్యటన సందర్భంగా తనకు, రష్యా ప్రతినిధి బృందానికి అందించిన ఆతిథ్యానికి కూడా మోడీకి ధన్యవాదాలు తెలిపారు. న్యూఢిల్లీలో మోడీతో జరిగిన చర్చలు సారవంతంగా, నిర్మాణాత్మకంగా సాగాయని పుతిన్ అన్నారు. ఇరువురు నేతల మధ్య జరిగిన చర్చలు మరోసారి మోడీ రాజకీయ పరిజ్ఞానం, దూరదృష్టిని చాటాయని పేర్కొన్నారు. భారత్, రష్యా తమ రెండు దేశాలకు సంబంధించిన కీలక అంశాలతో పాటు అంతర్జాతీయ సమస్యలపైనా భవిష్యత్తులోనూ నిర్మాణాత్మక సహకారాన్ని కొనసాగిస్తాయని పుతిన్ తెలిపారు.

మోడీకి ట్రంప్ బర్త్‌డే విషెస్

అమెరికా అధ్యక్షుడు డొనాల్డ్ ట్రంప్ తరఫున భారత్‌లోని అమెరికా రాయబార కార్యాలయం కూడా ప్రధాని మోడీకి జన్మదిన శుభాకాంక్షలు తెలిపింది. ట్రంప్ తరఫున మోడీకి పుట్టినరోజు శుభాకాంక్షలు చెబుతున్నామని, రాబోయే ఏడాది ఆయనకు ఆరోగ్యం, ఆనందం కలగాలని అమెరికా రాయబార కార్యాలయం సోషల్ మీడియా పోస్టులో పేర్కొంది.

మాజీ ఆస్ట్రేలియా ప్రధాని ప్రశంసలు

మాజీ ఆస్ట్రేలియా ప్రధాని స్కాట్ మోరిసన్ కూడా మోడీకి శుభాకాంక్షలు తెలిపారు. 76 ఏళ్ల వయసులోనూ మోడీ చూపిస్తున్న ఉత్సాహాన్ని ఆయన ప్రస్తావించారు. “ఆయన ఎనర్జీ లెవల్స్‌ను చూస్తే.. ఇన్నేళ్లు పదవిలో ఉన్నప్పటికీ ఆయన వేగం ఏమాత్రం తగ్గినట్లు కనిపించడం లేదు” అని మోరిసన్ వ్యాఖ్యానించారు.