Fuel Prices: గత కొంత కాలంగా కేంద్రం పెట్రోల్, డిజిల్ ధరలు తగ్గిస్తుందనే ఊహాగానాలు వెలువడుతున్నాయి. వీటిన్నింటిపై కేంద్ర పెట్రోలియం శాఖ మంత్రి హర్దీప్ సింగ్ పూరీ స్పందించారు. ప్రస్తుతమైతే పెట్రోల్, డీజిల్ ధరలను తగ్గించే ప్రతిపాదన లేదని ప్రభుత్వం బుధవారం తెలిపింది. అంతర్జాతీయ మార్కెట్లో ముడిచమురు ధరల్లో అస్థిరత ఎక్కువగా ఉన్నందు వల్ల ప్రస్తుతం కేంద్రానికి అలాంటి ప్రతిపాదన లేదని హర్దీప్ సింగ్ పూరీ చెప్పారు. ఇంధన ధరల తగ్గింపుపై మీడియాలో వస్తున్న వార్తలు ఊహాగానాలే అని కొట్టిపారేశారు. ఇంధన లభ్యత ప్రభుత్వ ప్రధాన ప్రాధాన్యత అని ఆయన అన్నారు.
Read Also: NCP: “రాముడు శాఖాహరి కాదు మాంసం తినేవాడు”.. ఎన్సీపీ నేత వ్యాఖ్యలపై బీజేపీ ఫైర్..
ఇటీవల క్రూడాయిల్ ధరలు విపరీతంగా పెరగడంతో చమురు మార్కెటింగ్ కంపెనీలు, ఇండియన్ ఆయిల్, బీపీసీఎల్, హెచ్పీసీఎల్ భారీ నష్టాలను చవిచూశాయని, ఇంధన ధరల తగ్గింపుపై చమురు మార్కెటింగ్ కంపెనీలతో ఎలాంటి చర్చలు లేవని చెప్పారు. ధరల పరిస్థితిని సమీక్షిస్తూ తాము స్థిరంగా, సానుకూలంగా ముందుకు సాగాలని కోరుకుంటున్నామని హర్దీప్ సింగ్ పూరి అన్నారు. ఇటీవలి నెలల్లో ఇంధన ధరలు తగ్గిన ఏకైక దేశం భారత్ అని ఆయన చెప్పారు. దక్షిణాసియా దేశాల్లో పెట్రోల్, డిజిల్ ధరలు దాదాపుగా 40-80 శాతం పెరిగాయని, ఇతర పాశ్చాత్య దేశాల్లో కూడా ఇదే పరిస్థితి ఉందని, కానీ భారత్లో మాత్రం ధరలు తగ్గుముఖం పట్టాయని అన్నారు. నవంబర్ 2021, మే 2022లో రెండు సందర్భాలలో సెంట్రల్ ఎక్సైజ్ సుంకాన్ని కేంద్రం తగ్గించిందని కేంద్రమంత్రి గుర్తు చేశారు.
