Harish Rao : రాష్ట్రంలో రైతు రాజ్యం పోయి రాక్షస రాజ్యం వచ్చింది

యాదాద్రి భువనగిరి జిల్లా పర్యటనలో భాగంగా బీఆర్ఎస్ సీనియర్ నేత, మాజీ మంత్రి హరీష్ రావు కాంగ్రెస్ ప్రభుత్వంపై, ముఖ్యమంత్రి రేవంత్ రెడ్డిపై తీవ్రస్థాయిలో ధ్వజమెత్తారు. రాష్ట్రంలో కేసీఆర్ హయాంలో ఉన్న రైతు రాజ్యం పోయి, ప్రస్తుతం రాక్షస రాజ్యం వచ్చిందని ఆయన మండిపడ్డారు. ప్రభుత్వం పూర్తిగా మిల్లర్లు, దళారుల చేతిలో కీలుబొమ్మగా మారిందని, కాంగ్రెస్ పాలనా వైఫల్యం , నిర్లక్ష్యం వల్లే ఎక్కడికక్కడ పంటలు ఎండిపోతున్నాయని ఆవేదన వ్యక్తం చేశారు. ప్రస్తుతం రాష్ట్రంలో “ఆంధ్రప్రదేశ్ కు నీళ్లు.. తెలంగాణకు కన్నీళ్లు” అనే దుస్థితి దాపురించిందని విమర్శించారు.

విద్యుత్ కోతలతో ఎండుతున్న పంటలు.. మంత్రి కోమటిరెడ్డికి సవాల్

బొగ్గు కొరత ఉందనే నెపంతో యాదాద్రి థర్మల్ పవర్ ప్లాంట్‌లో విద్యుత్ ఉత్పత్తిని ప్రభుత్వం కావాలనే నిలిపివేసిందని హరీష్ రావు ఆరోపించారు. రాష్ట్రంలో ఎక్కడ చూసినా విద్యుత్ కోతలు పెరిగిపోయి రైతులకు తీవ్ర శాపంగా మారాయని ఆందోళన వ్యక్తం చేశారు. గతంలో ప్రతిపక్ష ఎంపీగా ఉన్న సమయంలో విద్యుత్ సబ్‌స్టేషన్లకు వెళ్లి లాగ్ బుక్‌లను తనిఖీ చేసిన ప్రస్తుత మంత్రి కోమటిరెడ్డి వెంకట్ రెడ్డికి, ఇప్పుడు సొంత ప్రభుత్వ హయాంలో జరుగుతున్న కోతలపై లాగ్ బుక్‌లను చూసే దమ్ము, ధైర్యం ఉన్నాయా అని హరీష్ రావు నేరుగా సవాల్ విసిరారు.

భూకబ్జాలు, కమీషన్ల పాలన.. ఎంపీలకు హితవు

ముఖ్యమంత్రి రేవంత్ రెడ్డి, ఆయన సోదరులు రాష్ట్రంలో యథేచ్ఛగా భూకబ్జాలకు పాల్పడుతున్నారని హరీష్ రావు తీవ్ర ఆరోపణలు చేశారు. ఈ కబ్జాలను తాము నిలదీస్తున్నందుకే తమపై తప్పుడు ఆరోపణలు చేస్తూ విమర్శలకు దిగుతున్నారని మండిపడ్డారు. రాజ్యంలో భూమి క్లియరెన్స్ కావాలంటే 30 శాతం, కాంట్రాక్ట్ బిల్లులు పాస్ కావాలంటే 15 శాతం కమీషన్లు డిమాండ్ చేస్తున్నారని ధ్వజమెత్తారు. కాంగ్రెస్ ఎంపీలు పొలాల్లో తిరుగుతూ డ్రామాలు చేయడం మాని, రీజినల్ రింగ్ రోడ్డు (RRR), మెట్రో రెండో దశ నిధులు, కృష్ణా నదిలో తెలంగాణ నీటి వాటా సాధన కోసం ఢిల్లీ వేదికగా పోరాటాలు చేయాలని హితవు పలికారు.

ఆరు గ్యారంటీలపై నిలదీస్తాం.. కేసీఆర్‌ కంటే గొప్పగా పనిచేయాలి

తమకు ఉద్యమాలు, పోరాటాలు, జైలు కేసులు కొత్తేమీ కాదని, రేవంత్ రెడ్డి ఎన్ని బెదిరింపులకు దిగినా భయపడే ప్రసక్తే లేదని హరీష్ రావు తేల్చిచెప్పారు. ఎన్నికల్లో ప్రజలకు ఇచ్చిన ఆరు గ్యారంటీలను అమలు చేసే వరకు కాంగ్రెస్ ప్రభుత్వాన్ని వదిలిపెట్టేది లేదని, నిరంతరం నిలదీస్తూనే ఉంటామని స్పష్టం చేశారు. నాయకులు కేసీఆర్ చావును కోరుకోవడం మాని, చేతనైతే కేసీఆర్ సాధించిన అభివృద్ధి కంటే గొప్పగా పనిచేసి చూపించాలని హరీష్ రావు సవాలు విసిరారు.