King Cobra: ప్రపంచవ్యాప్తంగా 1,47,517 జంతు జాతులలో 41,459 జాతులు అంతరించిపోయే ప్రమాదం ఉందని వెల్లడించింది ఇంటర్నేషనల్ యూనియన్ ఫర్ కన్జర్వేషన్ ఆఫ్ నేచర్ (IUCN) తన తాజా నివేదికలో పేర్కొంది. అంతరించి పోయే జాతుల జాబితాలో చాలా వరకు మనం పులులు, సింహాలు, చిరుతల గురించి మాత్రమే మాట్లాడుకుంటాం. అయితే ఇందులో ‘కింగ్ కోబ్రా’ ఉందనే విషయం చాలా మందికి తెలియదు. పర్యావరణానికి ఎంతో మేలు చేసే ఈ విషపూరిత సర్పం ఇప్పుడు ప్రమాదం అంచున ఉంది.
ప్రపంచంలో ఎన్నో పాముల జాతులు ఉన్నా.. కేవలం ‘కింగ్’ అనే పేరు మాత్రం ఒక్క కోబ్రాకు మాత్రమే సొంతం. ఇతర పాములతో పోలిస్తే దీని ఆహార్యం, జీవించే పద్దతులు ఎంతో గొప్పగా ఉంటాయి. ఇప్పుడు ఈ జాతి దశాబ్ధం క్రితం 2011లో రెడ్ లిస్ట్ లో చేర్చబడింది. దాదాపుగా 5.5 మీటర్ల పొడవు పెరిగే కింగ్ కోబ్రాను ఇప్పుడు రక్షించే ప్రయత్నాలు జరుగుతున్నాయి. మనదేశంలో ముఖ్యంగా పశ్చిమకనుమలు, తూర్పుకనుమలు, హిమాలయాలు వీటికి ప్రధాన ఆవాసాలుగా ఉన్నాయి. పశ్చిమ కనుమల్లో ఈ జాతి సంరక్షణ కోసం అగుంబే రెయిన్‌ఫారెస్ట్ రీసెర్చ్ స్టేషన్ (ARRS) భాగస్వామ్యం అయింది.
పాముల్లో రారాజు – పర్యావరణ వ్యవస్థకు ఎంతో ముఖ్యం..
కింగ్ కోబ్రాను, ఓపియోఫేగస్ హన్నా అని కూడా పిలుస్తారు. ఇది ప్రపంచంలో అతిపెద్ద విషపూరిత సర్పం. దాదాపుగా 5.5 మీటర్ల వరకు పెరుగుతుంది. చాలా వరకు మానవులకు దూరంగా ఇవి జీవిస్తుంటాయి. పాములు, ఎలుకను ఆహారంగా తీసుకుంటాయి. భారత్ తో పాటు థాయ్ లాండ్, మలేషియా, ఇండోనేషియా వంటి దేశాల్లో ఇవి ఎక్కువగా ఉంటాయి. నిమిషాల్లోనే దీని విషం పక్షవాతం, మరణానికి కారణం అవుతుంది.
ప్రపంచంలో ఎన్నో పాములు ఉన్నా.. కేవలం కింగ్ కోబ్రాకు మాత్రమే గూడు కట్టుకునే అలవాటు ఉంది. ఆడపాములను ఆకర్షించేందుకు మగపాములు తీవ్రమైన పోరాటాల్లో కూడా పాల్గొంటాయి. యుద్దంలో ఓడిపోయిన పాము తన పరిధిని ఖాళీ చేయాల్సి ఉంటుంది. గూడులోనే ఆడ కింగ్ కోబ్రా గుడ్లను పెడుతుంది. ఎండు ఆకులతో గూడు ఏర్పాటు చేస్తుంది.
కింగ్ కోబ్రాలు పర్యావరణ సమతౌల్యానికి కారణం అవుతున్నాయి. ఇతర పాములను, సరీసృపాలు, ఎలుకను ఆహారంగా తీసుకుంటూ పర్యావరణాన్ని రక్షిస్తోంది. వీటికి ఉంటే అత్యంత తీవ్రమైన వాసన శక్తిని ఉపయోగించి, చురుకుగా వ్యవహరిస్తాయి. పంటలకు నష్టం కలిగించే ఎలుకను చంపి, రైతుకు మేలుగా ఉంటుంది. ఎలుకల జనాభాను నియంత్రిస్తోంది.
మానవుడితో సంఘర్షణ:
విస్తృతంగా అడవుల నిర్మూలన కారణంగా కింగ్ కోబ్రాలకు ప్రమాదం ఏర్పడుతోంది. మానవుడితో నిత్యం సంఘర్షణ ఎదుర్కొంటోంది. నిజానికి మానవుడు ఉండే ప్రాంతాలకు చాలా దూరంగా ఈ పాములు నివసిస్తుంటాయి. తనకు ప్రమాదం అని తెలిస్తే తప్పా దాడి చేయవు. అయితే ప్రజలు మాత్రం కింగ్ కోబ్రా కనిపిస్తే చంపేదాకా వదలడం లేదు. ఈ నేపథ్యంలో దీన్ని రక్షించేందుకు రక్షణ చర్యలు జరుగుతున్నాయి. పశ్చిమ కనుమల్లో ఈ జాతిని రక్షించేందుకు చర్యలు ప్రారంభం అయ్యాయి. పరిశోధకులు కింగ్ కోబ్రాలను ట్యాగ్ చేస్తున్నారు. ట్యాగింగ్ ద్వారా ఎన్ని పాములు ఉన్నాయి, అవి ఎటు వెళ్తున్నాయనే వాటిని ట్రాక్ చేస్తున్నారు. అవి ఆడపాముల సంభోగం కోసం ఎంత దూరం ప్రయాణిస్తున్నాయనే వివరాలను పరిశోధకులు తెలుసుకుంటున్నారు.
