DRDO TARA Test: డీఆర్‌డీఓ స్వదేశీ ‘తారా’ కిట్ టెస్ట్ సక్సెస్.. శత్రువులకిక దబిడి దిబిడే

భారత రక్షణ రంగంలో స్వదేశీ సాంకేతికతకు మరో పెద్ద విజయంగా, రక్షణ పరిశోధన, అభివృద్ధి సంస్థ (DRDO) అభివృద్ధి చేసిన టాక్టికల్ అడ్వాన్స్‌డ్ రేంజ్ ఆగ్మెంటేషన్ (TARA) వ్యవస్థ తొలి పరీక్ష విజయవంతమైంది. మే 7న భారత వైమానిక దళం (IAF), DRDO సంయుక్తంగా ఒడిశా తీరంలో ఈ పరీక్షను నిర్వహించాయి. TARA అనేది దేశంలోనే మొట్టమొదటి స్వదేశీ గ్లైడ్ ఆయుధ వ్యవస్థ. ఇది మార్గనిర్దేశం లేని సాధారణ బాంబులను అత్యంత కచ్చితత్వంతో లక్ష్యాన్ని ఛేదించే స్మార్ట్ ఆయుధాలుగా మారుస్తుంది. ఈ వ్యవస్థలో ఉపయోగించే మాడ్యులర్ రేంజ్ ఎక్స్‌టెన్షన్ కిట్ ద్వారా బాంబుల దూర సామర్థ్యం 150 నుంచి 180 కిలోమీటర్ల వరకు పెరుగుతుంది.

తారా ప్రత్యేకతలు

TARAలో ఎలక్ట్రో-ఆప్టికల్ / ఇన్‌ఫ్రారెడ్ (EO/IR) గైడెన్స్ సిస్టమ్ అమర్చబడింది. దీని సహాయంతో భూ లక్ష్యాలను అత్యంత ఖచ్చితత్వంతో గుర్తించి దాడి చేయవచ్చు. ముఖ్యంగా, ఈ వ్యవస్థ బాంబులు లక్ష్యానికి కేవలం 3 మీటర్ల వ్యాసార్థంలోనే పడేలా నిర్ధారిస్తుంది. దీంతో శత్రు స్థావరాలపై దాడుల్లో విజయావకాశాలు పెరుగుతాయి. అలాగే, దీని ద్వారా యుద్ధ విమానాలు శత్రు వైమానిక రక్షణ వ్యవస్థలకు దూరంగా నుంచే దాడి చేయగలవు. ఫలితంగా పైలట్లకు ఉండే ముప్పు గణనీయంగా తగ్గుతుంది.

హైదరాబాద్‌లో అభివృద్ధి

రక్షణ మంత్రిత్వ శాఖ విడుదల చేసిన ప్రకటన ప్రకారం, హైదరాబాద్‌లోని రిసెర్చ్ సెంటర్ ఇమారత్ (RCI) ఇతర DRDO ప్రయోగశాలల సహకారంతో ఈ తక్కువ ఖర్చుతో కూడిన ఆయుధ వ్యవస్థను రూపొందించి అభివృద్ధి చేసింది. భూ లక్ష్యాలను సమర్థవంతంగా నిర్వీర్యం చేయడానికి దీని విధ్వంసక శక్తిని, కచ్చితత్వాన్ని పెంచేలా దీనిని తయారు చేశారు.

రక్షణ మంత్రి అభినందనలు

ఈ విజయాన్ని భారత స్వదేశీ రక్షణ సామర్థ్యాల పెంపులో కీలక మైలురాయిగా అభివర్ణిస్తూ, రక్షణ మంత్రి రాజ్‌నాథ్ సింగ్ DRDO, భారత వైమానిక దళం, DCPP, పరిశ్రమ భాగస్వాములను అభినందించారు. అలాగే, రక్షణ పరిశోధన, అభివృద్ధి విభాగ కార్యదర్శి, DRDO ఛైర్మన్ సమీర్ వి. కామత్ కూడా ఈ విజయవంతమైన పరీక్షలో పాల్గొన్న బృందాలను ప్రశంసించారు. భారత్ స్వదేశీ రక్షణ తయారీలో వేగంగా ముందుకు సాగుతోందని, TARA విజయం దీనికి నిదర్శనమని నిపుణులు అభిప్రాయపడుతున్నారు.