Tollywood: ఒకే ఒక్క ఫ్లాప్.. ప్రశ్నార్థకంగా మారిన స్టార్ డైరెక్టర్ల భవిష్యత్తు!

Tollywood: సినిమా పరిశ్రమలో విజయం ఉన్నంతవరకే ఎవరికైనా విలువ. ఒక్క శుక్రవారం తలరాతను మార్చేస్తుందనే పాత నానుడి నేటి డిజిటల్, పాన్-ఇండియా యుగంలో దర్శకుల విషయంలో మరింత కఠినంగా నిజమవుతోంది. నిన్నటి వరకు ఇండస్ట్రీని షేక్ చేసిన మేకర్స్ అయినా, వందల కోట్ల రికార్డులను తిరగరాసిన దిగ్గజాలైనా.. బాక్సాఫీస్ వద్ద ఎదురయ్యే ఒకే ఒక్క పరాజయం వారి కెరీర్‌ను ఒక్కసారిగా సందిగ్ధంలో పడేస్తోంది. స్టార్ హీరోల కాల్‌షీట్లు, భారీ నిర్మాణ సంస్థల అండ ఉన్నప్పటికీ.. ఫలితం తేడా కొడితే తదుపరి అడుగు వేయడం ఎంత కష్టంగా మారుతోందో తాజా టాలీవుడ్ సమీకరణాలు స్పష్టం చేస్తున్నాయి.

తొలి చిత్రంతో సెన్సేషన్ క్రియేట్ చేసిన యువ దర్శకులకు రెండో సినిమా అగ్నిపరీక్షగా మారుతోంది. ‘దసరా’తో టాలీవుడ్‌ను ఊపేసిన శ్రీకాంత్ ఓదెల.. తన రెండో చిత్రం ‘ది ప్యారడైజ్’తో అంచనాలను అందుకోలేకపోయారు. ముఖ్యంగా బడ్జెట్ అదుపు తప్పడం, థియేట్రికల్ రన్‌లో ఆశించిన ఫలితం రాకపోవడంతో ఆ ప్రభావం ఆయన తదుపరి ప్రాజెక్టులపై పడింది. మెగాస్టార్ చిరంజీవితో చేయాల్సిన సినిమా మరింత ఆలస్యమయ్యే పరిస్థితులు కనిపిస్తుండటంతో, ఇప్పుడు ఆయన తన సత్తాను మళ్లీ నిరూపించుకోవాల్సిన ఒత్తిడిలో పడ్డారు. ‘ఉప్పెన’తో ఇండస్ట్రీ దృష్టిని ఆకర్షించిన బుచ్చిబాబు.. రామ్ చరణ్‌తో భారీ అంచనాల నడుమ తెచ్చిన స్పోర్ట్స్ డ్రామా ‘పెద్ది’ బాక్సాఫీస్ వద్ద పెట్టుబడికి తగ్గ వసూళ్లు సాధించలేకపోయింది. దీంతో చిరంజీవి, సూర్య, మహేష్ బాబు వంటి పేర్లు ప్రచారంలోకి వస్తున్నప్పటికీ.. ఆయన నెక్స్ట్ ప్రాజెక్ట్‌పై ఇంకా పూర్తి స్పష్టత రాలేదు.

కేవలం కొత్తవారే కాదు.. దశాబ్దాలుగా ఇండస్ట్రీని శాసించిన టాప్ డైరెక్టర్ల పరిస్థితి కూడా ఇలాగే మారింది. భారతీయ సినిమాకు సరికొత్త టెక్నాలజీని పరిచయం చేసిన దిగ్గజ దర్శకుడు శంకర్ బ్రాండ్‌కే ‘ఇండియన్ 2’, ‘గేమ్ చేంజర్’ ఫలితాలు భారీ డ్యామేజ్ చేశాయి. కథనం కంటే గ్రాండియర్‌కే ఎక్కువ ప్రాధాన్యత ఇవ్వడం దెబ్బకొట్టింది. దీంతో నిర్మాతలు ఆయనతో భారీ బడ్జెట్ చిత్రాలు ప్లాన్ చేయాలంటేనే వెనుకంజ వేసే పరిస్థితి వచ్చింది. బోయపాటి శ్రీను తనదైన ఊరమాస్ ఫార్ములాతో సాగినా.. ‘వినయ విధేయ రామ’, ‘స్కంద’, ‘అఖండ 2’ ఆశించిన స్థాయిలో మెప్పించలేకపోవడంతో ఆయన తదుపరి అడుగుపై ఇంకా అనిశ్చితి కొనసాగుతోంది. ‘ఏజెంట్’ డిజాస్టర్ తర్వాత సురేందర్ రెడ్డి ట్రాక్ తప్పడం ఇండస్ట్రీలో ఒక్క ఫ్లాప్ తెచ్చే నష్టాన్ని కళ్లకు కడుతోంది.

కామెడీ, ఫ్యామిలీ కథలతో హిట్లు కొట్టిన దర్శకులు స్టార్ హీరోలతో భారీ కాన్వాస్ వైపు వెళ్లి చేతులు కాల్చుకుంటున్నారు. ప్రభాస్‌తో రూ.400 కోట్ల బడ్జెట్‌తో ‘ది రాజా సాబ్’ తెరకెక్కించిన మారుతి, బాక్సాఫీస్ వద్ద చేదు ఫలితాన్ని చవిచూశారు. ఇప్పుడు మళ్లీ తన బలం అయిన కామెడీ ట్రాక్‌లోకి వచ్చినట్లు కనిపిస్తుంది. పవన్ కళ్యాణ్‌తో చేసిన ‘ఉస్తాద్ భగత్ సింగ్’ బ్రేక్ ఈవెన్ సాధించలేకపోవడంతో హరీష్ శంకర్ కూడా గట్టి విమర్శలు ఎదుర్కొన్నారు. అటు ‘ది ఫ్యామిలీ స్టార్’తో పరశురాం, ‘ప్రిన్స్’, ‘ఫంకీ’లతో అనుదీప్ తమ మునుపటి మ్యాజిక్‌ను రిపీట్ చేయలేక తదుపరి సినిమాల కోసం ఎదురుచూపులు చూడాల్సి వస్తోంది. కథ, స్క్రీన్‌ప్లేలో బలం లేకుండా కేవలం హీరో ఇమేజ్, భారీ బడ్జెట్లనే నమ్ముకుంటే బాక్సాఫీస్ ఏమాత్రం కనికరించదని ఈ వరుస వైఫల్యాలు నిరూపిస్తున్నాయి. ఒక్క పరాజయం రాగానే నిర్మాతలు, హీరోలు ముఖం చాటేస్తున్న ఈ తరుణంలో.. మారిన ప్రేక్షకుల అభిరుచికి తగ్గట్టుగా తమను తాము అప్‌డేట్ చేసుకుని నిలబడటమే దర్శకుల ముందున్న ఏకైక మార్గం.