టాలీవుడ్ టాప్ హీరోయిన్ సమంత రూత్ ప్రభు స్వయంగా నిర్మిస్తూ ప్రధాన పాత్రలో నటిస్తున్న తాజా చిత్రం ‘మా ఇంటి బంగారం’. ‘ఓ బేబీ’ లాంటి సూపర్ హిట్ తర్వాత సామ్ – నందిని రెడ్డి కాంబినేషన్లో వస్తున్న సినిమా కావడంతో దీనిపై అంచనాలు ఉన్నాయి. అయితే, ఈ సినిమా విడుదల తేదీ విషయంలో గత కొన్ని రోజులుగా సోషల్ మీడియాలో రకరకాల చర్చలు నడుస్తున్నాయి. మే 15న రిలీజ్ అని మేకర్స్ గతంలో ప్రకటించారు. సుమతో ఒక ఇంటర్క్యూ సహా సమంత పుట్టినరోజు ఈవెంట్స్ కాకుండా పెద్దగా ప్రమోషన్స్ ఏవి చేయ లేదు. నిజానికి మొదట మే 15ను పక్కా డేట్గా భావించారు. ముఖ్యంగా యష్ ‘టాక్సిక్’ సినిమా వాయిదా పడటంతో, ఆ విండోను క్యాష్ చేసుకోవాలని ప్లాన్ చేసిన కొందరు డిస్ట్రిబ్యూటర్లు సినిమాని జూన్ 4వ తేదీన రిలీజ్ చేయించాలని అనుకున్నారు. కానీ, తాజా పరిణామాలు చూస్తుంటే పరిస్థితులు మారినట్లు కనిపిస్తోంది. జూన్ 4న ‘పెద్ది’ వస్తుండటం, ఆ వెంటనే జూన్ నెలాఖరులో ‘లెనిన్’ వంటి భారీ చిత్రాలు లైన్లో ఉండటంతో సమంత సినిమాకు సరైన రిలీజ్ డేట్ దొరకడం సవాల్గా మారింది.
ప్రస్తుతం ‘మా ఇంటి బంగారం’ టీమ్ ముందు రెండు ఆప్షన్లు మాత్రమే కనిపిస్తున్నాయి, అవేమంటే పెద్దగా రిస్క్ చేయకుండా మే 15నే రావడం, లేదా రిస్క్ చేసి పెద్ది రిలీజ్ అనంతరం జూన్ రెండో వారం లేదా జూన్ మధ్యలో రిలీజ్ ప్లాన్ చేయడం. సమంత-నందిని రెడ్డి కాంబో అంటే కచ్చితంగా మినిమం గ్యారెంటీ కంటెంట్ ఉంటుందని ఫ్యాన్స్ నమ్ముతున్నారు. అయితే సినిమా ఎంత బాగున్నా, బాక్సాఫీస్ వద్ద సరైన వసూళ్లు రావాలంటే పక్కా రిలీజ్ ప్లానింగ్ అవసరం. ప్రమోషన్స్ లేకుండా సడన్గా థియేటర్లలోకి వస్తే బాక్సాఫీస్ ఇంపాక్ట్ పడే ప్రమాదం ఉందని విశ్లేషకులు హెచ్చరిస్తున్నారు. మరి సమంత ఈ సస్పెన్స్కు ఎప్పుడు స్వస్తి పలుకుతుందో చూడాలి. ‘మా ఇంటి బంగారం’ నిజంగానే మే నెలలో మెరుస్తుందా? లేక జూన్కు షిఫ్ట్ అవుతుందా? అన్నది త్వరలోనే తేలనుంది.