Pawan Kalyan: ‘పవన్ కళ్యాణ్’ నా పేరు కాదు.. అసలు పేరు చెప్పి షాకిచ్చిన పీకే!

Pawan Kalyan: జనసేన అధినేత, పవర్ స్టార్ పవన్ కళ్యాణ్ గురించి ఆయన అభిమానులకు తెలియని విషయాలు దాదాపు ఏవీ ఉండవు. కానీ తాజాగా ఆయన తన పేరుకు సంబంధించిన ఒక ఆసక్తికరమైన విషయాన్ని వెల్లడించి అందరినీ ఆశ్చర్యపరిచారు. తన అసలు పేరు ‘పవన్ కళ్యాణ్’ కాదని, చిన్నప్పుడు తన తల్లిదండ్రులు తనకు వేరే పేరు పెట్టారని ఆయన స్వయంగా వెల్లడించారు. ఒక పాడ్‌కాస్ట్‌లో పాల్గొన్న పవన్ కళ్యాణ్.. తన బాల్యం, పేరు వెనుక ఉన్న రహస్యాన్ని పంచుకున్నారు. ఈ విశేషాలు ఇప్పుడు సోషల్ మీడియాలో వైరల్ అవుతున్నాయి.

ఈ సందర్భంగా ఆయన మాట్లాడుతూ.. తనకు నామకరణం చేసిన పేరు శ్రీ కళ్యాణ్ కుమార్ అని వెల్లడించారు. స్కూల్‌లో జాయిన్ అయ్యే టైంకి తన పేరు నుంచి శ్రీ కనిపించకుండా పోయిందని సరదాగా చెప్పుకొచ్చారు. కె.కళ్యాణ్ కుమార్‌గా స్కూల్ రికార్డ్స్‌లో తన పేరు ఎక్కిందని చెప్పారు. సినిమాల్లోకి రాకముందు మార్షల్ ఆర్ట్స్ నేర్చుకునే సమయంలో తన గురువు కళ్యాణ్ కుమార్‌కు ముందు పవన్ చేర్చారని పేర్కొన్నారు. అలా తన పేరు పవన్ కళ్యాణ్ అయ్యిందని వెల్లడించారు. తన పేరుకు ముందు పవన్ అని చేర్చడానికి కారణం వివరిస్తూ.. తను మార్షల్ ఆర్ట్స్ నేర్చుకునే టైంలో తన పవర్ చూసి తన గురువు నువ్వు పవనపుత్ర హనుమంతుడిలాగా ఉన్నావ్ అని తన పేరు ముందు పవన్ అని జత చేసినట్లు చెప్పారు. ఇదే విషయాన్ని పవన్ కళ్యాణ్ తల్లి అంజనాదేవి గారు కూడా ఒక ఇంటర్వ్యూలో మాట్లాడుతూ.. “మేము మొదట కళ్యాణ్ బాబుకు ‘శ్రీ కళ్యాణ్ కుమార్’ అని పేరు పెట్టాము. కానీ ఇంట్లో అందరికంటే చిన్నవాడు కావడంతో ముద్దుగా ‘కళ్యాణ్ బాబు’ అని పిలిచేవాళ్లం” అని వెల్లడించారు. ప్రస్తుతం ఈ వీడియో సోషల్ మీడియాలో తెగ వైరల్ అవుతుంది.