ముంబైలో మరోసారి సైబర్ మోసం సంచలనం రేపింది. బాలీవుడ్ ప్రముఖ గాయని నేహా కక్కర్ పేరును దుర్వినియోగం చేస్తూ, నకిలీ ఆన్లైన్ ట్రేడింగ్ ప్లాట్ఫామ్ ద్వారా ఒక మహిళా న్యాయవాదిని రూ.5 లక్షల వరకు మోసం చేసినట్లు పోలీసులు తెలిపారు. వర్లి ప్రాంతానికి చెందిన షబ్నం మొహమ్మద్ హుస్సేన్ సయ్యద్ అనే న్యాయవాది ఈ మోసానికి గురయ్యారు. జూన్ 2025లో ఇంటర్నెట్లో నేహా కక్కర్ ఒక ట్రేడింగ్ ప్లాట్ఫామ్ బ్రాండ్ అంబాసిడర్ అని పేర్కొంటూ వచ్చిన వీడియోలు, కథనాలను ఆమె చూసి నమ్మింది. ఆ వీడియోలలో FXOnetను “విశ్వసనీయమైన, చట్టబద్ధమైన ట్రేడింగ్ ప్లాట్ఫామ్”గా ప్రదర్శించారు.
Also Read : Mrunal Thakur : మృణాల్కు హిట్లు ఉన్నా..పట్టించుకోని టాలీవుడ్!
అది నమ్మిన షబ్నం, FXOnet ముసుగులో పనిచేస్తున్న విజయ్ మరియు జిమ్మీ డిసౌజా అనే ఇద్దరిని సంప్రదించారు. వారు ఆమెను ట్రేడింగ్ ఖాతా తెరిచి పెట్టుబడి పెట్టమని ఒప్పించారు. “నిపుణుల సూచనలు” అందిస్తామని నమ్మబలికి, ఆమె జూన్ 18 నుండి అక్టోబర్ 9, 2025 వరకు మొత్తం రూ. 5 లక్షల మొత్తాన్ని HDFC బ్యాంక్ ద్వారా పలు ఖాతాలకు బదిలీ చేసింది. కానీ, తర్వాత ఎటువంటి లాభాలు కనిపించకపోవడంతో షబ్నం మోసపోయినట్లు గ్రహించింది.
వెంటనే ఆమె వర్లి పోలీస్ స్టేషన్లో ఫిర్యాదు నమోదు చేసింది. పోలీసులు ఐటీ చట్టం మరియు భారత శిక్షాస్మృతి కింద కేసు నమోదు చేసి దర్యాప్తు ప్రారంభించారు. ప్రస్తుతం పోలీసులు టెలిగ్రామ్ చాట్లు, జూమ్ రికార్డింగ్లు, బ్యాంక్ లావాదేవీలను విశ్లేషిస్తున్నారు. నేరస్తుల గుర్తింపు కనుగొనడానికి ప్రయత్నిస్తున్నారు. ఈ ఘటన మరోసారి సైబర్ మోసాల పట్ల అప్రమత్తంగా ఉండాలని గుర్తు చేస్తుంది.
