ఆరడుగులపైనున్న అమితాబ్ బచ్చన్, ఐదున్నర అడుగులకు కాస్త పైనున్న గోవిందాను ఓ సారి లాగి లెంపకాయ కొడతానన్నారట. అసలే ఆయన బిగ్ బి, తానేమో ‘చీచీ’ భయపడక ఏం చేస్తాను అని గోవిందా ఓ సందర్భంలో చెప్పాడు. ఇంతకూ అసలు విషయమేమిటంటే, ఈ లంబూజంబూ కలసి ‘బడేమియా- చోటేమియా’లో నటించారు. అందులో ఓ సన్నివేశం గురించి, గోవిందాతో చర్చిస్తూ బిగ్ బి ఈ సినిమా సక్సెస్ కాకుంటే చాచి లెంపకాయ కొడతానని బెదిరించారట. దాంతో తాను హడలి పోయానని గోవిందా చెప్పాడు.
‘బడే మియా చోటే మియా’ సినిమాకు డేవిడ్ ధవన్ డైరెక్టర్. ఈ సినిమాలో రవీనా టాండన్, రమ్యకృష్ణ, అనుపమ్ ఖేర్, పరేశ్ రావెల్ తదితరులు నటించారు. ఓ సీన్ సరిగా లేనందున అక్కడ పాట పెట్టాలని డేవిడ్ ధవన్ భావించారు. డేవిడ్ తీసే ఈ సినిమా బాక్సాఫీస్ వద్ద సక్సెస్ కాకుంటే నీ చెంప పగిలిపోతుందని గోవిందాకు బిగ్ బి సరదాగా వార్నింగ్ ఇచ్చారట. దాంతో గోవిందా, డేవిడ్ కు ఈ విషయం చెప్పి, ఆ సీన్ బదులు అదిరి పోయే పాట తీయాలని భావించారు. చివరకు నాటి మేటి నాయిక మాధురీ దీక్షిత్ తో బిగ్ బి, గోవిందా కలసి చిందులేసేలా “మఖ్నా…” పాటను తీశారు. ఆ పాట ఆ రోజుల్లో అదరహో అనిపించింది. సినిమా సక్సెస్ రూటులో సాగింది. గోవిందా చెంపను అమితాబ్ చేయి చేరకుండా కాపాడింది. ఇప్పుడు ఈ సరదా విషయాన్ని పలువురు ఆసక్తిగా ఆలకిస్తూ ఉండడం విశేషం!
