The Paradise : ఏపీలో ‘ది ప్యారడైజ్’ టికెట్ రేట్ల హైక్

రాష్ట్రంలో మరోసారి సినిమా టికెట్ల ధరల పెంపు వ్యవహారం చర్చనీయాంశంగా మారింది. త్వరలో ప్రేక్షకుల ముందుకు రానున్న ‘ది ప్యారడైజ్’ ప్రదర్శనకు ఆంధ్రప్రదేశ్ ప్రభుత్వం గ్రీన్ సిగ్నల్ ఇవ్వడమే కాకుండా, టికెట్ ధరలను భారీగా పెంచుకునేందుకు అనుమతి మంజూరు చేసింది. ఈ మేరకు హోంశాఖ ప్రిన్సిపల్ సెక్రటరీ కుమార్ విశ్వజిత్ అధికారిక మెమో (నెం. 3419722/General.A/A1/2026) జారీ చేశారు. శ్రీ లక్ష్మీ వెంకటేశ్వర సినిమాస్ ఎల్‌ఎల్‌పీ బ్యానర్‌పై నిర్మాత చెరుకూరి సుధాకర్ సమర్పించిన వినతి మేరకు ప్రభుత్వం ఈ వెసులుబాటు కల్పించింది. సెప్టెంబర్ 23 సాయంత్రం అంటే సినిమా అధికారిక విడుదలకు ఒక రోజు ముందే ప్రదర్శించే స్పెషల్ ప్రీమియర్ షో టికెట్ ధరలను మల్టీప్లెక్స్‌లలో రూ. 400 (జీఎస్టీతో కలిపి), సింగిల్ స్క్రీన్‌లలో రూ. 300 (జీఎస్టీతో కలిపి)గా నిర్ణయించారు.

కేవలం ప్రీమియర్ షోలకే పరిమితం కాకుండా, సినిమా విడుదలైన తొలి పది రోజుల పాటు రోజుకు 5 షోలు ప్రదర్శించుకునేందుకు అనుమతినిచ్చారు. ప్రస్తుతం ఉన్న టికెట్ రేట్లకు అదనంగా: మల్టీప్లెక్స్‌లలో ప్రతి టికెట్‌పై రూ. 75 పెంచుకునే అవకాశంతో పాటు సింగిల్ స్క్రీన్‌లలో ప్రతి టికెట్‌పై రూ. 50 అదనపు పెంపు అమలులోకి రానుంది. నాని హీరోగా నటిస్తున్న ఈ సినిమాలో కయాదు హీరోయిన్ గా, సంపూర్నేష్ బాబు, మోహన్ బాబు, రాఘవ జుయాల్ వంటి వారు ఇతర కీలక పాత్రలలో నటిస్తున్నారు.