Cinema Chettu: సినిమా చెట్టుకు పునర్జీవం

తూర్పు గోదావరి జిల్లా కొవ్వూరు మండలం, కుమారదేవం గ్రామంలో గోదావరి నది తీరంలో ‘సినిమా చెట్టు’ మళ్లీ జీవం పోసుకుంది. తెలుగు సినీ పరిశ్రమలో దాదాపు 300కి పైగా చిత్రాలకు సాక్షిగా నిలిచిన ఈ నిద్రగన్నేరు వృక్షం, దర్శకులు, నటులు మరియు సినీ అభిమానుల హృదయాల్లో ప్రత్యేక స్థానం సంపాదించింది. గతేడాది గోదావరి వరదల సమయంలో ఈ మహావృక్షం రెండుగా చీలి నేలవాలిపోవడంతో సినీ ప్రియులు, స్థానికులు తీవ్ర ఆవేదన వ్యక్తం చేశారు. ఈ చెట్టును కాపాడాలని పలువురు విజ్ఞప్తులు చేశారు. ఈ సవాలును స్వీకరించిన రోటరీ క్లబ్ ఆఫ్ రాజమహేంద్రవరం ఐకాన్స్, గ్రీన్ భారత్ – వనం మనం విభాగం ఆధ్వర్యంలో ఈ చెట్టును పునరుజ్జీవం చేసేందుకు ప్రత్యేక ప్రాజెక్టును ప్రారంభించింది. ఈ ప్రాజెక్టు కింద నిర్వాహకులు చెట్టుకు రసాయనాలతో దీర్ఘకాల చికిత్స అందించారు. ఈ ప్రయత్నాల ఫలితంగా, చెట్టు వేరు మధ్య ఒక కొత్త అంకురం జీవం పోసుకుంది. ప్రస్తుతం ఈ అంకురం 10 అడుగుల ఎత్తున మొక్కగా పెరిగింది.

Also Read:Anupama: కమర్షియల్ సినిమాలో 1000 తప్పులున్నా పట్టించుకోరు.. మా సినిమాకి మాత్రం ఇలానా!

రోటరీ క్లబ్ ఛైర్మన్ రేకపల్లి దుర్గాప్రసాద్ మాట్లాడుతూ, “గోదావరి గట్టున ఉన్న ఈ చెట్టు స్థానం కోతకు గురవడం, వరుస వర్షాల వల్ల పనులకు ఆటంకం ఏర్పడినప్పటికీ, ముగ్గురు వ్యక్తులు నిరంతరం పర్యవేక్షణ చేస్తూ, అవసరమైన రసాయనాలు అందించి శ్రద్ధ తీసుకున్నారు. ఈ కృషి ఫలితంగా చెట్టు మళ్లీ చిగురించింది. వచ్చే ఏడాది నాటికి ఈ మొక్క పెద్దదై, నాలుగైదుగురికి నీడనిచ్చే స్థాయికి చేరుకుంటుందని ఆశిస్తున్నాము,” అని తెలిపారు. ఈ సినిమా చెట్టు తెలుగు సినిమా చరిత్రలో ఒక ఐకానిక్ చిహ్నంగా నిలిచింది. ‘పాడిపంటలు’ నుంచి రామ్ చరణ్ నటించిన ‘గేమ్ ఛేంజర్’ వరకు ఎన్నో బ్లాక్‌బస్టర్ సినిమాలలో ఈ చెట్టు కనిపించింది. ఈ చెట్టు పునర్జీవం పొందడం సినీ అభిమానులకు మాత్రమే కాక, పర్యావరణ ప్రియులకు కూడా ఆనందకరమైన విషయం. స్థానికులు ఈ విజయాన్ని ఉత్సాహంగా స్వాగతిస్తున్నారు. “ఈ చెట్టు మా గ్రామానికి, తెలుగు సినిమాకు ఒక గుర్తింపు. దీని పునర్జన్మం మాకు గర్వకారణం,” అని కుమారదేవం గ్రామస్థులు ఆనందం వ్యక్తం చేశారు.